Dŭm hruê êgao, gŏ sang amai Hoàng Thị Duyên, ti să Phúc Thọ, kdriêk Lâm Hà, čar Lâm Đồng kñăm kơ bruă kriê dlăng, kriê êa mkiêt mkiêm mơ̆ng ênao kdơ̆ng êa điêt čiăng krơ̆ng dưi krih kơ kphê mâo mnga, mâo boh, čăt đĭ siam. Amao Duyên brei thâo:

“Wưng ară anei jing yuôm bhăn êdi, kriê dlăng čiăng mâo hbâo pruê, krih êa kơh dưi rơ̆ng kơ kphê mâo mnga leh anăn ana đĭ hriê jăk. Mâo lu boh mnga srăng dưi đru kơ gŏ sang mđĭ hnư hrui wĭt, klei hdĭp mơak mñai hĭn”.

          Hluê si Vũ Bá Yêu, k’iăng khua dŭ bruă lŏ hma leh anăn mđĭ kyar krĭng ƀuôn sang kdriêk Lâm Hà, ară anei jing wưng bi klă kơ hnơ̆ng boh mnga leh anăn hnơ̆ng tŭ jăk mơ̆ng wưng pla mjing kphê 2023 - 2024. Bi kơ mra mkăn, yan adiê ti alŭ wăl mâo leh klei bi knăl dhu krô, mđiă ktang, hưn êlâo kơ wưng không kƀah êa dơ̆ng truh leh, kyuanăn bruă bi mdrơ̆ng hŏng klei không kƀah êa dôk dưi mtrŭt mđĭ:

“Dôk gĭt gai čiăng bi kna êa krih hluê si hdră êlan bi mdrơ̆ng hŏng klei không kƀah êa mơ̆ng kdriêk. Ară anei bi kdơ̆ng leh êa ti dŭm ênao êa, knơ̆ng kdơ̆ng êa leh anăn dŭm ênao êa čiăng rơ̆ng mâo ênŭm êa krih kơ ana pla mjing”.

Kphê jing sa hlăm dŭm ana pla mjing phŭn ti čar Lâm Đồng, hŏng ênhă êbeh 170.000ha, pla mjing lu hĭn ti dŭm kdriêk Lâm Hà, Di Linh, Đức Trọng leh anăn Bảo Lâm. Čiăng rơ̆ng ba wĭt boh tŭ hlăm bruă pla mjing, ƀĭng ngă lŏ hma leh anăn bruă sang čư êa alŭ wăl dôk hluê ngă dŭm hdră êlan bi mdrơ̆ng hŏng klei không kƀah êa.

            Ti čar Kon Tum ară anei mâo 178 bruă mkŏ mkra, hlăm anăn mâo 73 ênao êa, 98 knơ̆ng kdơ̆ng êa leh anăn 7 anôk pom êa mơ̆ng anôk bruă ksiêm kriê dlăng, bi êran ăt dôk rơ̆ng kơ êbeh 16.600ha ana pla mjing dŭm mta. Ƀiădah đa đa bruă mkŏ mkra dôk knang kơ klei mkăp êa, kyuanăn klei kƀah êa krih srăng mâo hlăm knhal jih wưng krih êa. Nguyễn Hữu Nghĩa, Khua adŭ bruă hdră mnêč, êpul kriê dlăng, ba yua dŭm knơ̆ng kdơ̆ng êa čar Kon Tum brei thâo, mơ̆ng ară anei truh kơ wưng knhal jih wưng krih êa, ti alŭ wăl mâo 19 knơ̆ng kdơ̆ng êa hŏng 250ha ana pla mjing, mâo 74ha mdiê leh anăn 176ha ana sui thŭn mâo klei hŭi hyưt amâo mâo êa krih.

“Bi hŏng dŭm ênao êa mơ̆ng êpul kriê dlăng, mkŏ mjing leh klei waih mnuôr čiăng bi hluh êlan êa doh. Êngao kơnăn, tơdah mâo klei không kƀah êa, anôk bruă dăp leh măi pom êa čiăng mă êa mơ̆ng êa mdoh hlăm mnuôr đru kơ bruă krih êa. Bi hŏng dŭm knơ̆ng kdơ̆ng êa amâo amâo bŏ êa, êpul ăt dăp leh masin pom êjai pom êa mơ̆ng dŭm hnoh êa mđoh hlăm mnuôr čiăng đru kơ bruă krih êa mơ̆ng mnuih ƀuôn sang.

Bi kơ bruă gang mkhư̆ klei pui ƀơ̆ng dliê yan bhang, Anôk bruă răng kriê dliê čar Kon Tum brei thâo: Ară anei mâo 7 alŭ wăl hlăm čar hưn brei răng jing gưl 5, jing arưp aram êdi. Hlăm ênoh êbeh 610.600ha dliê hlăm čar, ênhă lăn dliê dưi bi klă ênưih mâo pui ƀơ̆ng jing êbeh 227.000ha. Knŏng 4 kdriêk nah Yŭ mâo: Ngọc Hồi, Đăk Tô, Sa Thầy leh anăn Ia H'Drai mâo êbeh 96.100ha dliê amâo klei arưp aram pui ƀơ̆ng ktang. Nguyễn Văn Nam, k’iăng khua kiă kriê anôk bruă kriê dlăng dliê Kon Tum brei thâo:

“Pô dliê čŏng pô, bruă sang čư êa mâo hdră êlan ktrâo lač kơ dŭm êpul êya. Dŭm anôk bruă pô dliê mâo anôk gak răng, mđĭ hĭn bruă brei răng, ktuê dlăng mnuih mŭt hlăm dliê. Boh nik jing anôk gak răng. Thâo klă, hâo hưn kơ dŭm gŏ sang ngă pưk hma giăm dliê. Bi hŏng gưl čar, anôk bruă đru mơ̆ng Êpul gĭt gai jing anôk bruă kriê dlăng dliê, hmei mkŏ mjing leh hdră êlan nao ksiêm dlăng mâo knhuah bi mguôp leh anăn ƀư̆ mkra ngă jăk bruă gang mkhư̆ klei pui ƀơ̆ng”.

            Bi ti čar Lâm Đồng, jing alŭ wăl mâo ênhă dliê hngô leh anăn dŭm mta dliê ênưih pui ƀơ̆ng, hŏng kluôm ênhă êbeh 513.000ha. Mrâo kčưm hlăm yan bhang ƀiădah mâo 3 klei ƀui ƀơ̆ng bhĭt ti gŭ êyui dliê. Kyua hmao ƀuh leh anăn truih mdjiê, kyuanăn amâo mâo klei hmăi kơ dliê. Ară anei yan adiê ti Lâm Đồng dôk dhu krô, mđiă ktang, klei arưp aram pui ƀơ̆ng dliê jing lu êdi. Bruă sang čư êa čar Lâm Đồng mâo leh lu hră mơar ktrâo lač, gĭt gai dŭm anôk bruă amâo dưi luč klei răng, ngă ngơi mang, čŏng hluê ngă dŭm hdră êlan gang mkhư̆ klei pui ƀơ̆ng dliê.