Mâo ênoh ba wĭt đĭ kyua mâo hdră hgŭm duh mkra

VOV4.Êđê- Jing să mâo êbeh 42% ênoh mnuih jing mnuih djuê ƀiă, 2 thŭn êgao, khădah hmăi mơ̆ng klei ruă Covid 19, ƀiădah să Phú Hội, kdriêk Đức Trọng (Lâm Đồng) ăt bi leh jih hnơ̆ng čuăn mđĭ kyar bruă duh mkra – ala ƀuôn. Mă bruă lŏ hma hluê kdrăp mrâo, pla mjing ngă lŏ hma hluê klei kuôl kă blei mnơ̆ng.

Drông hmei hlăm sa boh sang kjăp siam, hŏng djăp mnơ̆ng mnuă yua, Kră Jăn Ha Sung, ti alŭ R’Chai, să Phú Hội, kdriêk Đức Trọng (Lâm Đồng) hơ̆k mơak brei thâo, kyua yan adiê găl, ênoh ênil anôk čhĭ mnia boh mnga ăt hơĭt, snăn yan pla mjing boh kruĕ hruĕ đru leh kơ gŏ sang mâo sa ênoh prăk prŏng dŭm êtuh êklăk prăk. Mbĭt hŏng ênoh mâo ba wĭt mơ̆ng dua ha kphê, 4 sao djam mtam, gŏ sang dưi tlaih leh mơ̆ng klei dleh dlan kyua klei ruă tưp Covid-19, lehanăn lŏ mâo mkuôm pioh sa ênoh lu mơh. Tui si Kră Jăn Ha Sung, mâo hĕ klei tŭ dưn anei kyua mâo klei bi mguôp hlăm klei duh mkra mnia mblei, lehanăn mâo anôk kăp čhĭ mnia hơĭt mơ̆ng dŭm anôk kăp blei. Klei duh mkra pla mjing hơĭt, mâo ba wĭt leh sa ênoh prŏng tết anei gŏ sang mkŏ mjing tết h’uh mđao djăp ênŭm mbĭt hŏng ƀuôn sang:

Kơ klei duh mkra leh klei ruă tưp Covid-19 truh kơ ară anei gŏ sang kâo mâo pla mbĭt amrêč, snăn mâo ba wĭt ênoh hơĭt, klei hdĭp đĭ kyar hĭn. Wăt hlăm thŭn 2021 khădah klei ruă tưp adôk dleh dlan ksiêm dlăng. Ƀiădah ênoh mâo ba wĭt ăt hơĭt. Êlâo dih, phung ƀuôn sang djăp djuê ana ka thâo ba yua ôh klei kreh knhâo, klei duh ƀơ̆ng ka đĭ kyar ôh. Ƀiădah hlăm dŭm thŭn giăm anei, tui hriăm mơ̆ng hdră duh mơ̆ng mơ̆ng ayŏng adei djuê lar, êngao kơ kphê, snăn phung ƀuôn sang lŏ thâo pla djam mtam hŏng hdră mă bruă ênuk mrâo, snăn klei hdĭp đĭ hĭn mơh”.

Bruă pla djam mtam, mnga, hbei mtei tui si mâo anôk kăp blei leh, lehanăn mâo klei hgŭm bruă hŏng klei kjăp, snăn hlăm mnuih djuê ana K’ho ti Phú Hội. Ară anei să mâo leh giăm 900 gŏ sang kuôl kă klei hgŭm duh mkra pla mjing lehanăn mâo klei bi mguôp kjăp hŏng phung duh mkra mnia mblei, hŏng êpul hgŭm bruă hlăm ăn mâo giăm 300 gŏ sang mnuih djuê ƀiă. Mbĭt hŏng anăn, phung ƀuôn sang lŏ thâo ba yua klei kreh knhâo, kñăm čiăng mđĭ klei boh tŭ dưn mâo ba wĭt. Lač kơ klei ƀuôn sang pô mâo klei bi mlih, K’Hoan, mnuih K’ho ti ƀuôn Chi Rông, să Phú Hội, yăl dliê:

Êlâo dih, phung ƀuôn sang djuê ana K’Ho knŏng ngă lŏ sa yan đuič, lehanăn dŭm ênhă kphê leh khua, boh mnga amâo mâo ôh, ka thâo ba yua ôh hdră duh mkra mrâo. Snăn klei hdiưp bŏ hŏng klei dleh dlan. Ƀiădah hlăm dŭm thŭn giăm anei, mâo knŭk kna mđing đru mâo hriăm adŭ mtô bi hriăm hdră duh ƀơ̆ng msĕ si hdră grep kphê, pla mjing djam mtam, snăn klei hdĭp phung ƀuôn sang dơ̆ng mâo klei đĭ kyar leh mkă hŏng êlâo.

Tui si Nguyễn Thành Trung, k’iăng khua knơ̆ng bruă sang čư̆ êa să Phú Hội, kyua jhŏng bi mlih hdră duh ƀơ̆ng snăn ênoh mâo čhĭ mnia boh mnga pô mâo kah knar hlăm să êbeh 270 êklăk prăk/ha/thŭn. Kluôm să ênoh gŏ êsei ƀun hrŏ knŏng adôk mă ka bŏ mơh 1%. Čiăng lŏ mđĭ hĭn klei tŭ dưn leh mâo, hlăm thŭn 2023, gưl bruă Đảng lehanăn bruă sang čư̆ êa alŭ wăl jing lŏ bi mlih hdră êlan duh ƀơ̆ng mđĭ boh mnga mâo ba wĭt, boh nik krĭng mnuih djuê ƀiă. Nguyễn Thành Trung, yăl:

“Hlăm wưng kơ anăp, hmei srăng pai mă dŭm klei găl kơ prăk kăk pioh duh kơ krĭng mnuih djuê ƀiă , mprăp tal êlâo kơ klei duh mkra duh ƀơ̆ng hlăm dŭm gŏ sang. Hmei mjing kdrông mkŏ plah wah phung ƀuôn sang lehanăn hŏng phung duh mkra, êpul hgŭm bruă, čiăng kơ jih jang mnuih tui duah klei thâo săng, tui hriăm klei duh ƀơ̆ng mrâo. Mơ̆ng anăn, mâo hdră êlan bi mlih hdră pla mjing, ênoh tŭ dưn hlăm grăp ênhă lăn pla mjing, đĭ hĭn, mđĭ ênoh kơ phung ƀuôn sang dưi ba wĭt”.

Phú Hội ară anei mâo 6.700ha ênha pla mjing mâo 3.680ha pla mjing hlue hŏng ênuk mrâo. Anei jing klei găl yuôm bhăn čiăng kơ să lŏ dơ̆ng pŏk mlar lu hdră êlan duh ƀơ̆ng, plah wah phung ƀuôn sang hŏng phung duh mkra, bi hơĭt anôk kăp čhĭ mnia, kñăm mđĭ klei hdĭp mda, mnơ̆ng dhơ̆ng lehanăn ai tiê phung ƀuôn sang./.

 

Viết bình luận