VOV4.Êđê- Hruê mbruê 23/9, ti ƀuôn prŏng Đà Lạt, Anôk bruă mtrŭt mđĭ bruă lŏ hma ala čar bi mguôp hŏng knơ̆ng bruă lŏ hma leh anăn mđĭ kyar krĭng ƀuôn sang čar Lâm Đồng mkŏ mjing klei kƀĭng mtrŭt mđĭ bruă lŏ hma hŏng akŏ “Dưn yua klei kreh knhâo mrâo mrang hlăm bruă mkra mjing bruă lŏ hma thâo mĭn bi djŏ guôp hŏng klei mlih yan adiê”. Êbeh 150 čô bi ala jing phung knuă druh kriê dlăng, phung thơ̆ng kơ bruă lŏ hma, phung bi ala dŭm êpul bi mguôp, knơ̆ng bruă leh anăn ƀĭng ngă lŏ hma ti 7 čar, ƀuôn ƀuôn prŏng jing Lâm Đồng, Phú Yên, Khánh Hòa, Thừa Thiên Huế, Đà Nẵng, Đồng Nai leh anăn ƀuôn prŏng Hồ Chí Minh nao hgŭm.

Phung bi ala knăm bi trông kơ dŭm mta phŭn kơ klei mđĭ kyar bruă lŏ hma dưn yua kdrăp mrâo mrang hŏng êlan thâo mĭn, đru čŏng pô hlăm bruă mkra mjing, mgaih msir klei ngă bruă hluê yan, bi hrŏ klei knang kơ yan adiê, đru bi djăp ênŭm hnơ̆ng čoh čuăn anôk mnia mblei kơ hnơ̆ng tŭ jăk mnơ̆ng dhơ̆ng. Hlăm anăn bŏk bâo lu hĭn jing dŭm hdră ngă bruă, hdră êlan mđĭ kyar bruă lŏ hma thâo mĭn, boh klei čuăl mkă, duh bi liê bruă mkŏ mkra nha gŭ, dŭm hdră êlan kơ klei kreh knhâo mrâo mrang, ngăn prăk mđĭ kyar mnuih mă bruă, klei thâo dưn yua leh anăn ngă pô kdrăp mrâo mrang hlăm bruă lŏ hma.

Pô mblang: Y-Ƀel Êban