Čiăng mđĭ hĭn boh tŭ mơ̆ng ktơr leh anăn hbei ƀlang, hlăm wưng êgao, êpul grŭp De Heus mơ̆ng Belanda nao ksiêm dlăng leh krĭng pla mjing ti 3 čar alŭ wăl krĭng Lăn Dăp Kngư jing: Dak Lak, Gia Lai leh anăn Kon Tum. Hlăm klei ksiêm dlăng brei ƀuh, ktơr leh anăn hbei ƀlang mâo lu klei găl čiăng dưi mđĭ ênoh êjai nao hlăm klei mkra mjing mnơ̆ng čiêm kơ mnơ̆ng rông, bi hrŏ klei ktrŏ mơ̆ng mnơ̆ng ƀơ̆ng blei mơ̆ng ala tač êngao.

Nguyễn Như Cường, Khua kiă kriê anôk bruă pla mjing brei thâo: Krĭng Lăn Dăp Kngư jing krĭng jăk găl čiăng pla mjing dŭm mta ana mkra mjing mnơ̆ng ƀơ̆ng kơ mnơ̆ng rông msĕ si ktơr, hbei ƀlang. Čiăng bi ktưn hŏng dŭm mta ana pla mjing mkăn ti alŭ wăl anei, si srăng ngă čiăng mđĭ boh tŭ bruă duh mkra. Čiăng mkŏ mjing krĭng pla mjing prŏng djăp ênŭm hnơ̆ng čoh čuăn srăng mkŏ mjing klei bi mguôp plah wah ƀĭng ngă lŏ hma, êpul hgŭm bruă leh anăn knơ̆ng bruă mkra mjing, ba čhĭ mnơ̆ng dhơ̆ng.