Siă suôr hŏng bruă pla mnga Tết dŭm pluh thyŭn hŏng anei leh, Ôn Văn Khi, ti alŭ mrô 7A, să Ea Bar, kdriêk Buôn Đon brei thâo: Hlăm yan tết anei ñu pla truh 100 abŭ mnga cúc pha lê mta man dưn lehanăn 70 abŭ mnga cúc prŏng. Bruă pla mnga tết đru kơ gŏ sang ñu mâo prăk ba wĭt êjai, lehanăn lŏ jing klei mơak mơ̆ng sa čô mnuih ngă bruă pla mjing. Lăn anei aguah tlam ñu pla êtak êbai, truh mlan 8 dơ̆ng mprăp pla mnga kơ tết. Thŭn anei klei ruă tưp Covid 19 êgao leh, snăn klei čiăng kơ mnga tết năng ai srăng đĭ hĭn, hŏng klei čang hmăng lŏ mâo lu klei mơak hĭn:“Mprăp mơ̆ng lu mta bruă dơ̆ng mơ̆ng klei ruah lăn bi lŭk lăn hŏng djăp mta hbâo brŭ vi sinh, tal 2, ruah mjeh mnga bi jăk, čiăng kơ pô dlăng kriê wiê ênăk bi djăp ênŭm lehanăn mnga jăk siam hĭn. Bruă dlăng kriê mnga jing krih êa bi djăp ênŭm. Mnuih čhĭ ăt mơak mơh lehanăn mnuih blei mnga ăt mơak mơh, thŭn mrâo mâo klei jăk jĭn”.

Yan mnga Tết thŭn anei, gŏ sang Nguyễn Thị Hiệu, ti alŭ mrô 3, să Hoà Xuân, ƀuôn prŏng Ƀuôn Ama Thuôt, pla 1500m2 mnga cúc đại đoá pioh khăt adhan čhĭ.  Giăm 4 mlan dlăng kriê bi jăk hlăm dŭm hrue anei ñu lehanăn mnuih hlăm sang amâo mâo mdei bruă hlăm war mnga, khăt mkra mnga čiăng bi mâo mnga jăk čuh blang siam djŏ trip ti wưng tết:“Ară anei hlăk hlê dôk bi khăt adhan čiăng bi mkra knuh mnga blang bi djŏ truh ti hrue 22 mâo leh đa đa dưi ba čhĭ, dŭm adôk truh kơ hrue 28 čhĭ ênŭm yơh”.

Bi hŏng Nguyễn Ngọc Sung, ti ƀuôn hgŭm Tân Lợi, ƀuôn prŏng Ƀuôn Ama Thuôt, grăp wưng Tết truh yan mnga hriê ăt jing wưng ñu tŭ mă boh tŭ dưn bruă kngan ñu mơ̆ng klei pla mjing ana sŭnggơr. Thŭn anei, ñu mjut mjing mâo truh giăm

400 phŭn ana sŭng gơr mơ̆ng  5 truh 70 thŭn ba kơ anôk čhĭ mnia. Ñu brei thâo, čiăng dưi mâo sa phŭn ana sŭng gơr siam kơ wưng Tết, êngao kơ bruă thâo khăt mkra, dlăng kriê wiê ênăk bi jăk snăn mđing snăk kơ yan adiê, čiăng bi tĭng mkă kơ klei bi mnga kñăm bi djŏ.“Hlăm thŭn pô prue hbâo bi djŏ, krih êa mkra adhan bi jăk, knhal jih thŭn mơ̆ng mlan 10 hlŏng truh kơ mlan knhal tuič hlăm thŭn jing yuôm bhăn snăk, mka tĭng wưng pleh hla čiăng kơ mnga čuh blang bi djŏ”.

Bi ti dŭm war mnga pla ti čar Quảng Nam, hlăm wưng anei phung ghan mnia, lehanăn phung hlăp mnga dơ̆ng nao bi êmuh blei mnga. Thŭn anei adiê jing jăk găl hĭn snăn mnga Tết ti čar jăk siam čhĭ yuôm mơh. Gŏ sang Trần Thị Thu, ti să Duy Trung, kdriêk Duy Xuyên pla mâo giăm 200 êbâo abŭ mnga djăp mta msĕ si: Dạ yến thảo, Mai địa thảo, cúc Mâm xôi, Sao băng…mâo leh phung ghan mnia nao kuan ênŭm leh êbeh 70%. Trần Thị Thu brei thâo, mnga thŭn anei čhĭ yuôm, phung ghan mnia hriê blei mơ̆ng hnưm leh čiăng kơ phung ƀuôn sang mâo prăk mprăp Tết: “Thŭn anei, mnga siam hĭn kơ thŭn dih, thŭn anei mâo prăk mnga lu hĭn mơh, kyudah phung ghan mniê hriê blei leh čoh čuăn kuan êlâo jih leh. Diñu ba prăk êlâo leh sơăi. Mkă hŏng thŭn dih, thŭn anei dlăng jing mâo mnga lu hĭn, mâo ba wĭt jih jang truh 1 êklai 400 êklăk prăk, hŏng prăk mnga truh mkrah. Dưi đru msir brei bruă mă kơ 12 čô mnuih, mjing kơ digơ̆ mâo nanao bruă mă mơh”.

Kdriêk Duy Xuyên, čar Quảng Nam mâo hlăm brô 7 ha đất pioh pla mnga čhĭ kơ wưng tết hŏng dŭm êtuh gŏ sang pla mjing lu jing mnga yang hrue, mnga cúc, djăp mta mnga yuôl, lu hĭn êdi ti dŭm să Duy Thành, Duy Trung, Duy Nghĩa, Duy Hải, wăl krah Nam Phước. Kah knar hlăm 1 ha lăn pla mnga mâo ba wĭt kơ mnuih pla mjing prăk mnga êbeh 200 êklăk prăk, jing kdlưn hĭn lu blư̆ mkă hŏng mnơ̆ng pla mjing mkăn. Phan Xuân Cảnh, khua knơ̆ng bruă sang čư̆ êa kdriêk Duy Xuyên, čar Quảng Nam brei thâo, mkă hŏng thŭn êlâo, thŭn anei ênha pla mnga đĭ hĭn, kyua anôk čhĭ mnia jăk mơh: “Kdriêk đru kơ lăn pioh pŏk mlar anôk pla mjing. Snăn, snăn hŏng djăp mta klei găl dôk mâo lehanăn klei čiăng kơ mnga hlăm thŭn anei jing lu, snăn thŭn anei mâo lu klei bi mlih hĭn, kñăm dưi mghaih msir bruă knuă mă mđĭ ênoh ba wĭt ngăn prăk kơ mnuih ngă bruă, êjai dôk găn klei dleh dlan kyua ruă tưp”.

Čar Quảng Nam mâo giăm 2000 gŏ sang pla mnga Tết. Bruă lŏ hma čar Quảng Nam, Êpul hgŭm bruă lŏ hma čar đru leh kơ mnuih pla mnga dưi čan prăk hŏng mnga hdjul, mkăp brei mjeh mnga, đru kơ digơ̆ hơĭt ai tiê mă bruă. Thŭn anei, yan adiê jăk, ênoh čhĭ hơĭt, lehanăn lu mnuih čiăng blei mnga, kyuanăn mnuih pla mjing mnga Tết ti čar Quảng Nam bŏ hŏng klei mơak./.