VOV4.Êđê- Ti Hà Nội, Phŭn bruă lŏ hma leh anăn mđĭ kyar krĭng ƀuôn sang mkŏ mjing leh klei kƀĭn êlan online kluôm ala hyuă kjăp hdră mtrŭn mrô 19 mơ̆ng Êpul khua bruă Dảng gưl dlông gưl 13 kơ bruă lŏ hma, ƀĭng ngă lŏ hma, krĭng ƀuôn sang wưng thŭn 2030, hdră tă truh ti thŭn 2045. Blŭ hlăm klei kƀĭn, Khua phŭn bruă lŏ hma lehanăn mđĭ kyar krĭng ƀuôn sang Lê Minh Hoan lač klă, “Ƀĭng ngă lŏ hma srăng jing phŭn hlăm klei đĭ kyar bruă lŏ hma – ƀĭng ngă lŏ hma – krĭng ƀuôn sang”.

Hlue ngă hdră mtrŭn kơ bruă lŏ hma, phung ngă lŏ hma, krĭng ƀuôn sang lehanăn hdră êna mđĭ kyar kĭng ƀuôn sang hŏng klei kjăp, wưng leh êgao, phŭn bruă luŏ hma hgŭm leh hŏng Anôk bruă kiă kriê klei hâo hưn gưl dlông, dhar bruă duh mkra gưl dlông, mkŏ mjing mjuăt bi hriăm, bi lar bi mklă hdră mtrŭn. Jih jang klei blŭ anôk bi kƀĭn mâo leh klei bi đru kơ klei mưng klei thâo mơ̆ng pô, mâo dŭm hdră bi hmô jăk, mâo klei tŭ dưn hlăm bruă mđĭ kyar bruă lŏ hma, phung ngă lŏ hma, krĭng ƀuôn sang, kñăm bi leh mta kñăm bruă mkŏ kra “Lŏ hma doh, krĭng ƀuôn sang ênuk mrâo, phung ngă lŏ hma kreh dhar”. Nguyễn Hồng Sơn, Khua anôk bruă kreh knhâo bruă lŏ hma Việt Nam lač:

        “Bruă lŏ hma, phung ngă lŏ hma lehanăn krĭng ƀuôn sang mâo klei bi mguôp mbĭt tliêr kjăp. Mđĭ kyar bruă lŏ hma ăt jing bruă mjing klei găl pioh mđĭ kyar kơ phung ngă lŏ hma, lehanăn krĭng ƀuôn sang, lehanăn mklăk hŏng anăn. Hlăm hdră mtrŭn lehanăn hdră êlan mâo tă leh klă, klei kreh knhâo, lehanăn kdrăp mrâo mrang amâo mâo djŏ knŏng jing bruă čuăn mjing dŭm boh mnga djăp ênoh čuăn jăk, mâo ênoh, mjing klei đĭ kyar, hŏng bruă čuăn yuôm bhăn anăn jing mjuăt bi hriăm mnuih ngă bruă hŏng klei kjăp. Kơ kdrêč anôk bruă ksiêm duah srăng hgŭm hŏng djăp êpul êya, lehanăn phung duh mkra mkŏ mjing hlue ngă klei ba yua kdrăp mrâo mrang, lehanăn mjuăt bi hriăm mnuih ngă lŏ hma, hlue hŏng hdră êlan mtrŭn agha êlam hĭn čiăng mđĭ hĭn klei thâo dưn yua jih jang kdrăp mrâo mrang hlăm bruă lŏ hma, mơ̆ng anăn mđĭ hĭn boh tŭ dưn mâo hŏng đĭ kyar hĭn mơ̆ng bruă lŏ hma”.

Dak Lak iêô jak duh bi liê mđĭ kyar bruă duh mkra hơĭt kjăp

Leh anei, hlăm klei mkŏ mjing “knăm mơak boh durian Krông Pač tal 1 thŭn 2022” knơ̆ng bruă sang čư̆ êa kdriêk Krông Pač, čar Daklak mkŏ mjing leh klei “Bi mtuôm lehanăn iêo mthưr klei duh bi liê, lehanăn mđĭ kyar boh mơ̆ng bruă pla mjing, bruă pla mjing hŏng klei kjăp thŭn 2022”. Blŭ hrăm ti anôk bi kƀĭn, Trần Hồng Tiến, Khua bruă Đảng kdriêk Krông Pač brei thâo, kdriêk mâo leh êbeh 52 êbâo ha lăn pla mjing, 6 êbâo 100 ha lăn mâo êlah êa, pioh dưn yua anei jing klei găl prŏng êdi mơ̆ng kdriêk pioh iêo jak klei duh bi liê kơ bruă lŏ hma pla mjing. Klei găl hlăm bruă lŏ hma mơ̆ng kdriêk jing adôk prŏng. Kyuanăn, kdriêk čang hmăng lŏ dơ̆ng mâo klei duh bi liê, đru mđĭ kyar bruă duh mkra ala ƀuôn hlăm kdriêk:

        “Hmei srăng đru phung duh mkra kơ klei ngă hră mơar, čiăng kơ phung duh mkra ngă hră mơar pral hĭn, jăk hĭn. Tal dua, hmei ăt kiă kriê djăp alŭ wăl, êjao phung duh bi liê hriê hmei srăng đru jih hnơ̆ng kơ bruă ruh mgaih anôk ala, tơdah mâo phung duh mkra čoh čuăn kơ alŭ wăl hmei pioh kơ bruă duh bi liê. Hŏng phung khua kiă kriê alŭ wăl hmei srăng hrăm mbĭt hŏng duh bi liê êjai tui duah hdră êlan čiăng duh bi liê hlăm kdriêk”.

Boh sĭt brei ƀuh hlăm kdriêk, Cao Văn Cường, Khua knơ̆ng bruă lŏ hma čar Thanh Hoá brei thâo:

                “Dŭm phŭn dhar bruă gưl dlông hmao mtrŭn leh hră mơar, phŭn bruă pral ba mdah hŏng khua knŭk kna mtrŭn mtam hdră mă bruă, êjai mâo leh hdră ngă bruă snăn dŭm alŭ wăl srăng pai mă hlue ngă mtam hlăm kluôm ala, djŏ guôp hŏng klei găl mơ̆ng dŭm čar. Pral mâo hdră mtrŭn mrô 57 kơ klei mtrŭt mjhar phung duh mkra duh bi liê hlăm bruă lŏ hma hlăm anăn, Sơn La srăng mâo hdră mtrŭn djŏ guôp hŏng klei jing pô, mtrŭt phung duh mkra duh bi liê kơ bruă lŏ hma, phung ngă lŏ hma, krĭng ƀuôn sang”.

Khua phŭn bruă lŏ hma leh anăn mđĭ kyar krĭng ƀuôn sang Lê Minh Hoan blŭ hrăm hlăm klei bi kƀĭn

Blŭ hrăm ti anôk bi kƀĭn onlines hlăm kluôm ala tui si “Hdră mtrŭn mrô 19 mơ̆ng êpul gĭt gai bruă Đảng gưl dlông 13 kơ bruă lŏ hma, phung ngă lŏ hma, krĭng ƀuôn sang hlăm wưng truh kơ thŭn 2030, Khua phŭn bruă lŏ hma Lê Minh Hoan lač: Hlăm klei jing plah wah bruă lŏ hma, phung ngă lŏ hma, krĭng ƀuôn sang bi čoh čuăn klă mngač, bruă klam klei jing pô phŭn hlăm bruă čiăng mghaih msir tŭ jing klei mđĭ kyar bruă lŏ hma, krĭng ƀuôn sang. Dŭm êpul êya bruă dôk hlăm phŭn bruă lŏ hma, dŭm alŭ wăl brei păn kjăp, hlue ngă bi djŏ bruă čuăn, hdră êlan mđĭ kyar bruă lŏ hma hŏng klei kjăp, hlăm djăp mta bruă ngă hŏng klei klă mngač jih jang hdră mtrŭn kơ bruă lŏ hma, phung ngă lŏ hma, krĭng ƀuôn sang:

“Hră mă bruă kñăm bi mklă bruă čuăn mơ̆ng knŭk kna pioh hlue ngă hdră mtrŭn. Hdră mtrŭn thâodah hdră êlan amâo mâo djŏ jing mta čuăn ƀiădah lŏ jing ti klei ngă bruă. Čiăng dưi ngă klei anei, dŭm êpul êya bruă hlăm phŭn bruă lŏ hma bi pai ngă hŏng klei kjăp, lehanăn bi mlih hdră êlan ngă bruă”.

Bruă lŏ hma hlăm lu thŭn mtam mâo bơ̆k bâo yap msĕ si kmeh gơ̆ng kơ klei duh mkra. Boh tŭ dưn mâo mơ̆ng bruă lŏ hma, phung ngă lŏ hma, krĭng ƀuôn sang mâo đru mguôp leh kơ dŭm klei tŭ dưn prŏng, jing yuôm bhăn snăk kơ hƀuê ênuk mlih mrâo dưi mâo leh hlăm wưng êgao. Hdră êlan kơ anăp čiắng mâo mkŏ mjing sa bruă lŏ hma doh, bruă lŏ hma ênuk mrâo, phung ngă lŏ hma kreh dhar mâo leh klei bi kƀĭn prŏng Đảng 13 mtrŭn leh, čiăng lŏ dưi hyuă kjăp hĭn mbĭt hŏng lu hdră êlan, klei ngă bruă ktang hĭn snăn kơh dưi mđĭ kyar bruă lŏ hma, phung ngă lŏ hma, lehanăn krĭng ƀuôn sang./.

 Pô mblang: Y-Khem Niê