VOV4.Êđê- Mơ̆ng thŭn 2017 truh kơ thŭn 2021, hŏng klei gĭr mơ̆ng jih anôk bruă kđi čar lehanăn mnuih ƀuôn sang, čar Gia Lai pla leh 31 êbâo ha dliê, lu ênhă anei mâo mnuih ƀuôn sang čŏng ksĭng mmiă lăn dliê bi nao hưn mdah. Khă snăn, hluê boh tŭ ksiêm dlăng mơ̆ng Êpul gơ̆ng bruă ƀuôn sang čar Gia Lai ti dŭm kdriêk, boh tŭ bruă pla dliê wưng anei ƀiă snăk, kyua ênoh ana kyâo djiê lu, mâo anôk ana kyâo djiê truh 90%.

Thŭn 2020, gŏ sang ayŏng Jiao Klong lehanăn 300 gŏ sang mkăn ti Ia Rsai, kdriêk Krông Pa mâo mtrŭt mjhar pla truh 417ha dliê ana akasi hlăm lăn hmsa jing anôk lăn dliê hđăp. Êjai dôk guôn ana Akasi prŏng, dŭm gŏ sang buh mdiê, lehanăn pla hbei ƀlang čiăng mâo ƀơ̆ng êjai. Leh dua thŭn, hlăm êbeh 150ha dliê Akasi djiê hĕ jih, dŭm pluh ha knŏng hdĭp mă kgŭ 50%. Msĕ si dliê gŏ sang Jiao Klong pla, hnơ̆ng ênoh dưi hdĭp ka bŏ mơh 10%, snăn bruă dlăng kriê dliê amâo mâo tŭ yap ôh, brei lŏ wĭt pla kyâo mrâo:

   “Hmei mâo leh klei mĭn lŏ pla kyâo, ƀiădah lăn tinei dleh pla snăk, kơ anei jing lăn sah kba amâo mâo dưi pla sa mta mnơ̆ng ôh, lehanăn adiê hlăm krĭng anei mđiă hjan amâo mâo thâo tĭng knăl ôh, yan không jing sui, lăn kƀah êa snăn amâo mâo sa mta mnơ̆ng dưi hdĭp ôh”.

Dliê gŏ sang Jiao Klong ti să Ia Rsai, kdriêk Krông Pa djiê  9/10

Msĕ snăn mơh, bruă pla dliê hlăm dŭm anôk răng mgang dliê wưng anei ti Krông Pa ăt kăn jăk mâo klei tŭ jing rei. Vũ Đức Dân Khua anôk kiă kriê dliê răng mgang akŏ êa Ia Rsai, kdriêk Krông Pa lač, hlăm 2 thŭn 2019 – 2020, anôk bruă răng mgang dliê anei pla truh 60ha kyâo djuê akasi, ƀiădah truh kơ ară anei knŏng adôk mă giăm 7ha đuič mâo kyâo hdĭp čiăng ênŭm. Tui si Dân, mâo lu mta klei ngă truh kơ dliê pla hlăm lăn dôk hlăm klei bi ksĭng mmiă amâo mâo klei tŭ dưn. Hlăm anăn, kơ êdah êdi jing dŭm lăn dliê anei jing hlăm anôk kbưi, lăn ala dleh dlan troh trôk čư̆ čhiăng, kreh pla djŏ hlăm wưng adiê không. Mbĭt hŏng anăn, kyua ênoh bi liê kơ bruă pla dliê ară anei amâo mâo yuôm ôh, amâo mâo djŏ guôp ôh hŏng klei hdĭp mda phung ƀuôn sang ti alŭ wăl:

 “Kơ hdră êlan đru hlăm bruă duh bi liê, knŭk kna ka mâo ôh klei ƀuăn rơ̆ng brei kơ phung ƀuôn sang. Hlăm sa gưl pla kyâo, dlăng kriê wiê ênăk kreh luič truh 4 thŭn kơh. Hlăm wưng dôk dlăng kriê msĕ snăn hŏng 1ha, kơ jih sa gưl luič liê jing 35 êklăk prăk. Ƀiădah êjai anăn knŭk kna knŏng đru mă 2 êklăk 500 êbâo prăk đuič. Phung ƀuôn sang kơ anei jing mnuih djuê ƀiă sơăi, klei hdĭp dôk hlăm klei dleh dlan. Phung ƀuôn sang amâo mâo prăk duh bi liê ôh kơ klei dlăng kriê. Mơ̆ng anăn yơh ngă truh kơ kyâo pla djiê jih amâo mâo hdĭp ôh”.

Ênoh dliê pla wưng 2017-2021 ti lu anôk ti Gia Lai đĭ kyar amâo jăk

Tui si Êpul Gơ̆ng bruă ƀuôn sang čar Gialai, mbĭt hŏng kdriêk Krông Pa, boh tŭ klei ksiêm ti dŭm boh kdriêk Phú Thiện, Čư̆ Pưh... ăt msĕ snăn mơh, Êpul Gơ̆ng bruă ƀuôn sang akâo leh kơ Gưl dlông ksiêm dlăng ruh mgaih ya mta bruă adôk ka djŏ hŏng ênoh duh bi liê, čiăng kơ phung ƀuôn sang lehanăn dŭm êpul êya bruă pla dliê dưi ngă bruă pla kyâo hŏng klei tŭ jing, ba wĭt klei mtah mda, luôm jih kyâo hlăm lăn huông duôr čư̆ kla hŏng klei klă sĭt./.

         Pô mblang: Y-Khem Niê