Êlâo dih, Nem ŭn mán Bến En ti kdriêk Như Thanh, čar Thanh Hoá lu knŏng mâo mă ti dŭm sang huă mnăm ti kdriêk čhĭ kơ phung huă mnăm. Mơ̆ng hruê mâo dưi bi klă mâo anăn knăl, hnơ̆ng tŭ jăk Nem ŭn Bến En mâo anôk mnia mblei đăo knăl blei ba yua lu hĭn. Čiăng dưi mkra mnơ̆ng ƀơ̆ng Nem anei, mnuih ƀuôn sang ti nei kreh mă kđeh čĭm ŭn mán (ŭn jŭ, ŭn ƀlak, ŭn đă  hiu ƀơ̆ng rơ̆k tơ̆k) jing mjeh ŭn mâo kđeh čĭm bâo mngưi, bơ̆ng jăk leh anăn jing mnơ̆ng jăk yâo ti krĭng čư̆ čhiăng. Kđeh čĭm ŭn mkra Nem dưi mă mơ̆ng kđeh mra, kđeh bha khăt êpih. Klei anei dưi đru kơ mnuih ƀuôn sang jing mnuih djuê ƀiă rông ŭn mán dưi mkra mjing lu hĭn leh anăn ƀrư̆ đĭ kyar hĭn. Hŏng hlăm brô 100 drei ŭn mán, gŏ sang aduôn Nguyễn Thị Quy, să Phượng Nghi mơ̆ng sa gŏ sang ƀun ƀin, ară anei mâo leh hnư hrui wĭt hơĭt hŏng giăm 200 êklăk prăk hlăm sa thŭn. Aduôn Nguyễn Thị Quy brei thâo:  “Grăp thŭn ăt mâo anôk ba čhĭ, kyuanăn kâo ăt rông nanao”

Ti krah lu mta mnơ̆ng dhơ̆ng dưi bi klă mtŭ OCOP ti anôk mnia mblei, pô mkra mjing, dŭm knơ̆ng bruă amâo lŏ mâo hdră mkăn ôh êngao kơ klei gĭr ngă bi jăk, mđĭ hnơ̆ng tŭ jăk kơ mnơ̆ng dhơ̆ng. Knŏng ngă sơnăn kơh mnơ̆ng dhơ̆ng jăk yâo krĭng mnuih ƀuôn sang jing mnuih djuê biă dưi rơ̆ng leh anăn dưi mđĭ ai bi ktưn hlăm anôk mnia mblei. Bruă kñăm bi msiam klei dlăng, hnơ̆ng tŭ jăk mnơ̆ng dhơ̆ng dưi đru leh kơ dŭm knơ̆ng bruă mkra mjing dŭm mta mnơ̆ng dhơ̆ng jăk yâo krĭng čư̆ čhiăng ƀrư̆ hruê ƀrư̆ dưi pŏk phai ti anôk mnia mblei, mđĭ hnư hrui wĭt grăp thŭn. Aduôn Phạm Hồng hà, Êpul hgŭm bruă lŏ hma Nậm Lửu, kdriêk Trạm Tấu, čar Yên Bái brei thâo: “Mphŭn dô hmiê pla knŏng ƀiă, hliê leh anăn điêt, ară anei hŏng dŭm mta mnơ̆ng dhơ̆ng OCOP, hmei mâo hnư hrui wĭt 200%. Ară anei hmei dôk čhĭ kơ dŭm knơ̆ng bruă amâodah dŭm sang čhĭ mnơ̆ng ƀơ̆ng doh ti Hà Nội, diñu khăp êdi kơ dŭm mta mnơ̆ng dhơ̆ng čư̆ čhiăng pô. Kyuadah mnơ̆ng dhơ̆ng mơ̆ng hmei jing mnơ̆ng doh, amâo mâo êa drao gŭn ôh.”

Ti čar Lâm Đồng, mnuih ƀuôn sang jing mnuih djuê ƀiă ăt dôk đĭ kyar lu mta mnơ̆ng dhơ̆ng jăk yâo, mâo klei hmăi prŏng hlăm alŭ wăl. Đơn Dương jing sa hlăm 2 kdriêk mâo ênhă pla mjing djam doh prŏng hĭn ti čar Lâm Đồng. Kyua dưn yua kdrăp mrâo mrang, lu mta boh mnga bruă lŏ hma dưi mâo ênŭm hnơ̆ng čoh čuăn bruă lŏ hma doh, mâo ênŭm hnơ̆ng čuăn Vietgap leh anăn dưi mblir anăn knăl “Đà Lạt boh tŭ dưn mơ̆ng lăn jăk”. Khădah srăng bi djăp ênŭm dŭm hnơ̆ng čoh čuăn dleh leh anăn lu hĭn mơ̆ng phung blei ba yua, ƀiădah anei jing hră bi klă kơ klei đăo knang leh anăn hnơ̆ng tŭ jăk mơ̆ng mnơ̆ng dhơ̆ng. Anei ăt jing hdră tă čiăng kơ phung pla mjing lŏ dơ̆ng mđĭ kyar mnơ̆ng dhơ̆ng prŏng leh anăn sui hĭn. Nguyễn Đình Tịnh, k’iăng khua bruă sang čư êa kdriêk Đơn Dương, čar Lâm Đồng brei thâo: “Mơ̆ng thŭn 2019 truh kơ ară anei, kluôm ênoh prăk knŭk kna duh bi liê hlăm brô 17 êklai prăk, mnuih ƀuôn sang bi mkrum mguôp êbeh 20 êklai prăk, hluê ngă lu klei bi hmô thâo mĭn msĕ si: krih êa thâo mĭn, kriê dlăng hŏng hbâo pruê thâo mĭn leh anăn dưn yua dŭm kdrăp 4.0. Bi hŏng kdriêk Đơn Dương, ară anei dưi yua mbĭt anăn knăl mơ̆ng čar Lâm Đồng jing mkŏ mjing Đà Lạt boh tŭ mơ̆ng lăn jăk, kyuanăn ăt mâo klei găl hlăm hưn mdah anăn knăl ăt msĕ hŏng bruă ba dŭm mta mnơ̆ng dhơ̆ng mơ̆ng kdriêk Đơn Dương truh kơ dŭm čar jĕ giăm.

Amâo mâo mdei đĭ kyar mnơ̆ng dhơ̆ng, dưn yua klei kreh knhâo mrâo mrang hlăm klei mkra mjing, dŭm mta mnơ̆ng dhơ̆ng jăk yâo krĭng mnuih djuê ƀiă dưi mâo klei tŭ dưn hlăm ala čar. Hluê si phung thơ̆ng kơ bruă, čiăng mđĭ hnơ̆ng tŭ jăk mrâo, dŭm mta mnơ̆ng dhơ̆ng mơ̆ng krĭng mnuih djuê ƀiă srăng mâo ênŭm dŭm hnơ̆ng čoh čuăn ba yua mtah, êđăp ênang, hnơ̆ng tŭ jăk, dưi mâo ênŭm hnơ̆ng čoh čuăn ba yua mrâo. Anei jing dŭm klei kpĭ mơ̆ng anôk mnia mblei. Kyuanăn, mkŏ mjing anăn knăl srăng kčưm mơ̆ng klei yăl dliê dhar kreh, amâo djŏ knŏng bruă hâo hưn ôh, ƀiădah kčưm mơ̆ng pô răng mgang, mơ̆ng mnuih ƀuôn sang jing mnuih djuê ƀiă nao hgŭm hlăm klei ngă bruă mkra mjing, mơ̆ng phung khua gĭt gai… srăng bi êdah dŭm klei đĭ kyar kluôm. Mbĭt anăn, čiăng ba mnơ̆ng dhơ̆ng krĭng čư̆ čhiăng truh kơ phung blei ba yua čiăng jhŏng dưn yua klei mrâo mrang mrô, mnia mblei điện tử hluh knông lăn.