VOV4.Êđê- Tlam hruê 5/9, ti Hà Nội, Phŭn bruă Lŏ hma mđĭ kyar krĭng ƀuôn sang bi kƀĭn phung čih klei mrâo 3 mlan gưl 3 hưn kơ hdră duh mkra pla mjing, ba čhĭ mnơ̆ng lŏ hma kơ ala tač êngao lehanăn pŏk ngă bruă hlăm dŭm mlan knhal jih thŭn. 8 mlan êgao, ênoh prăk ba čhĭ mnơ̆ng lŏ hma, dliê kmrơ̆ng, mnơ̆ng hlăm êa kơ ala tač êngao mâo 36,3 êklai đolar Mi, đĭ 13,1% mkă hŏng wưng êlâo.  Kluôm anôk bruă lŏ dơ̆ng krơ̆ng kjăp hdră đĭ kyar, rơ̆ng mâo djăp mnơ̆ng ƀơ̆ng huă, đru rơ̆ng kjăp klei bi knar hlăm hdră duh mkra.

Mbĭt hŏng klei bi knăl jăk hlăm bruă ba čhĭ mnơ̆ng lŏ hma kơ tač êngao mâo giăm 15 êklai đolar Mi hlăm 8 mlan, đĭ 7,4%, anôk bruă lŏ hma ăt mâo 7 mta mnơ̆ng mâo ênoh čhĭ êbeh 2 êklai đolar Mi, mâo:Kphê, ksu, braih, djam mtam boh kroh, kñŭl, hdang, mnơ̆ng mơ̆ng kyâo. Ăt ti anôk bi kƀĭn, dŭm êpul hlăm Phŭn bruă Lŏ hma mđĭ kyar krĭng ƀuôn sang ăt bi mklă dŭm hdră msir kñăm mđĭ hĭn boh tŭ mnơ̆ng lŏ hma, ênoh čhĭ êa săng, êa pui đĭ hmăi truh kơ bruă pla mjing lehanăn rông mnơ̆ng hlăm wwa; dŭm hdră msir ruh mtlaih hră kñĭ mơ̆ng Dhar bruă Ơrôp EC hŏng mnơ̆ng hlăm êa Việt Nam, gĭr mâo mta kñăm ba čhĭ kơ ala tač êngao truh 50 êklai đô la.

                                                    Pô mblang: H’Nêč Êñuôl