Să Giao Phú jing sa hlăm dŭm boh să dleh dlan hĭn êdi hlăm kdriêk Bảo Thắng, čar Lào Cai. Msĕ hŏng dŭm gŏ sang mkăn hlăm să, êlâo dih hlăm lăn pla mjing mơ̆ng gŏ sang amai Phạm Thị Yên mnuih djuê ana Tày điêt đuič. Êngao kơ ngă lŏ knŏng djăp huă ƀơ̆ng đuič, bi dŭm mnơ̆ng pla mkăn hlăm war knŏng jing mnơ̆ng lŏ đru mă knŏng ƀiă čiăng mâo prăk nao sang mnia. Mâo hŏng anei 4 thŭn, ung mô̆ ñu mâo kdriêk tiŏ nao hriăm klei pla mjing hlue ênuk mrâo mrang. Lehanăn mâo knŭk kna brei čan truh 200 êklăk prăk, mbĭt hŏng prăk gŏ sang mkuôm pioh leh, ñu pŏk anôk pla mjing djham mtam hŏng sang ñuăl hŏng boh prŏng truh 1 ha 7. Truh ară anei boh tŭ dưn ñu mâo jing leh klei lu mnuih dôk hmăng hmưi. Ñu yăl dliê:

“Mơ̆ng hlăk mphŭn pla mjing hlue hŏng hdră ênuk mrâo snăn ai tiê ngă bruă amâo mâo lu ôh, knŏng truăn kơ bruă bi mdoh mnơ̆ng pô pla mjing, tơdah truh ba čhĭ mnia, dưi lŏ mđĭ hĭn ênoh mâo ba wĭt kơ pô”.

Boh sit ăt brei ƀuh, ară anei hlăm lu alŭ wăl mâo mnuih djuê ƀiă hdĭp mda hlăm kluôm ala thâo dơ̆ng tui hriăm leh hdră pla mjing ênuk mrâo, ba wĭt leh boh mnga jăk snăk kơ mnuih pla mjing, lehanăn ba klei êđăp ênang kơ mnuih yua mơh. Tơdah msĕ hŏng 3 thŭn êlâo, Ya thuyên, ti să Dă Quyn, kdriêk Đức Trọng, čar Lâm Đồng dôk ka thâo bĭt ôh bruă pla mjing djam mtam pioh čhĭ mnia, ƀiădah leh mâo nao hriăm hdră pla mjing mrâo, ñu jhŏng duh bi liê leh êbeh 100 êklăk prăk pla 3 sao mkrah trŏng msăm hlue hŏng hdră mrâo mrang. Mơ̆ng anăn, boh tŭ dưn ñu mâo ba wĭt đĭ hĭn leh. Ară anei, kah kơ jih ênoh bi liê, grăp thŭn ñu mâo ba wĭt êbeh 200 êklăk prăk mơ̆ng boh trŏng msăm:

“Ai tiê mă bruă amâo mâo luič liê lu ôh. Sitôhmô 1 hrue tơdah mnuih krih êa luič jih sa aguah mưh, ƀiădah ti nei mâo leh masin krih êa, snăn knŏng luič mă 30 mnĭt đuič.”

Boh mnga bruă pla mjing doh hlăk jing hdră êlan pla mjing dôk tui tiŏ ară anei, kñăm bi mâo mnơ̆ng ƀơ̆ng doh kơ mnuih yua. Kyuanăn, hlăm dŭm thŭn êgao, klei ba yua hdră êlan mă bruă mrâo mrang mâo leh lu alŭ wăl dôk ngă, phung duh mkra hlăm kluôm ala dôk ba yua. Hlăm phung pla mjing, mâo wăt mnuih djuê ƀiă, krĭng taih kbưi ăt dơ̆ng tui hriăm lehanăn hlue ngă, phŭn tal êlâo dôk bư̆ ban ngĭ ngư̆ mơh, kyua kƀah klei thâo ngă bruă. Siămdah, hŏng dŭm hdră êlan mâo ba yua ti dŭm alŭ wăl ngă leh klei hrŏng ruah dŭm čô mnuih ngă klei bi hmô, mâo bruă ngă djŏ guôp, ênưih ba yua hlăm bruă pô pla mjing. Boh nik, jih jang bruă mâo bi mguôp hlăm dŭm bruă mjuăt bi hriăm bruă knuă hlăm krĭng ƀuôn sang. Aduôn Giàng Thị Dung, k'iăng khua knơ̆ng bruă sang čư̆ êa čar Lao Cai lač:

“Klei mjuăt bi hriăm bruă knuă mâo leh klei tŭ dưn, êlâo hĭn jing kbiă hriê mơ̆ng phung ƀuôn sang pô. Bi dlăng ya jing bruă phung ƀuôn sang čiăng tui hriăm lehanăn ngă. Mơ̆ng anăn čar mâo hdră êlan ktrâo atăt, msĕ si ti Lào Cai mđĭ kyar bruă pla mjing hlue hdră mrâo mrang, lehanăn dưn yua jih klei găl mơ̆ng Lào Cai mâo hlăm bruă pla mjing djam mtam doh krĭng êđăp, lehanăn boh kroh, lehanăn čê”.

Ară anei mâo leh lu gŏ sang mnuih djuê ƀiă, mâo knuă druh kreh mđĭ ai mtrŭt mjhar, mơ̆ng anăn mâo leh lu mnuih jhŏng ngă bi mlih hdră duh ƀơ̆ng. Siămdah bruă ba yua klei kreh knhâo hlăm krĭng mnuih djuê ƀiă lehanăn krĭng čư̆ čhiăng ăt adôk mâo lu klei awăt kƀah, snăn čiăng snăk bi mâo klei tuh êyuh jih ai tiê mơ̆ng dŭm knơ̆ng dhar bruă djŏ tuôm čiăng mâo hdră êlan bi mlih bi djŏ, lehanăn mkŏ mjing hdră ngă bruă jăk. Dŭm alŭ wăl bi hriăm mbŏ klei thâo ngă bi tui hriăm klei kreh knhâo, lehanăn ba yua kdrăp mrâo mrang kơ phung knuă druh nah gŭ, mjuăt bi hriăm kơ phung pla mjing, tal êlâo mđing kơ phung amai adei mniê, mkŏ mjing klei bhiăn mđĭ ai phung duh mkra mâo klei bi mguôp hŏng phung ƀuôn sang hlue ngă dŭm mta bruă mrâo, hŏng kdrăp mrâo ti krĭng ƀuôn sang, krĭng mnuih djuê ƀiă lehanăn krĭng čư̆ čhiăng./.