Hruê giăm Tết Nguyên đán 2023, ti krĭng hma prŏng êbeh 13 ha ti ƀuôn Ea Ƀrah, să Ea Sô, Ea Kar, Võ Quốc Dỵ hŏng 10 čô mnuih mă bruă dôk koh kbâo, dăp dưm hlăm êdeh mdiăng ba čhĭ kơ sang mkra mjing. Ñu brei thâo, dua plih thŭn ngă đang kbâo, ka mâo ôh yan rŭng răng ƀiădah leh anăn lŏ mơak msĕ si thŭn anei. Ênoh hbâo pruê, kdră mnơ̆ng lŏ hma, prăk mưn mnuih mă bruă đĭ snăk. Khădah snăn, thŭn anei yan adiê găl ênưih, kbâo djŏ yan đĭ mơ̆ng 154-20%, hlăk êjai ênoh hrui blei mâo hnơ̆ng đĭ msĕ snăn mơh, grăp ha leh bi lue ăt mâo mnga mơ̆ng 50 -60 êklăk păk. Hŏng 13 ha, gŏ sang mâo prăk mnga êbeh 700 êklăk prăk. Võ Quốc Dỵ hơ̆k mơak brei thâo: “Kâo hriê tinei ola kbâi mâo 20 thŭn leh, hnơ̆ng kbâo snăn mơ̆ng leh pla snăn thŭn anei jing lu hĭn, mơ̆ng 90 truh 100 ton kbâo/ha. Ênoh ăt yuôm, akŏ yan dưi čhĭ 10 êklăk 5 êtuh êbâo ptăk/ton kbâo mtah. Sang kâo pla 12-13 ha leh, djŏ yan snăn kâo pla thiăm 2-3 ha dŏng. Ênoh yuôm, hnŏng kbâo snei snăn arăng pla mơak mơh. Thŭn anei drông têt mơak leh.”

Kbâo mâo lu, ênoh yuôm ngă kơ lu phung pla kâo ti dŭm kdriêk Ea Kar, M’Drak, Ƀuôn Đon leh anăn Ea Sup ti čar Dak Lak mơak amâo djŏ knŏng hjăn gŏ sang Võ Quốc Dỵ.  Nguyễn Na ti alŭ Quyết Thắng 2, să Ea Tih, kdriêk Ea Kar ăt pla 10 ha kbâo mơ̆ng thŭn 1998, mơak brei thâo: “Ênoh hbâo pruê thŭn anei đĭ lu, jing 1 êklăk 4 êtuh êbâo prăk/thŭn mŏng thŭn dih snăn ară anei 1 êklăk 9 êtuh êbâo prăk. Sa ha thŭn dih bi liê hlăm brô 140 êklăk prăk mâo hbâo pruê, klei kriê dlăng, hrui pĕ, snăn thŭn anei mâo 200 êklăk prăk. Ƀiădah lŏ tla wĭt kơ hnơ̆ng boh mnga lu, ênoh yuôm. Krĭng Ea Kar anei grăp thŭn kbâo mâo 70-80ton/ha, ƀiădah thŭn anei brei mâo 100ton/ha, boh nik lu hma hĭn. Sang kâo mâo 10 ha snăn ăt mâo mnga mơ̆ng 550 -600 êklăk prăk, êngao kơ ênoh bi liê.”

Yan kbâo 2022 – 2023, čar Dak Lak mâo hlăm brô 11 êbâo ha, kƀĭn lu ti dŭm kdriêk Ea Kar, M’Drak, Ƀuôn Đôn leh anăn Ea Sup. Hlăm anăn lu hĭn ti dua kdriêk Ea Kar leh anăn Mdrak. Ênoh hnơ̆ng kbâo kluôm čar mâo 7 êtuh êbâo ton. Kluôm kdriêk dưi ba čhĭ kyua dŭm sang mkra mjing kbâo ti Dak lak leh anăn dŭm mta čar riêng gah Khánh Hòa - Phú Yên. Ênoh kbâo mâo dŭm sang mkra mjing hrui blei ti hnơ̆ng 10 êklăk 5 êtuh êbâo - 11 êklăk prăk/ton ti hma, hlue si hnơ̆ng ƀêñ hra.

Lê Tuân –  K’iăng Khua Knơ̆ng bruă kbâo ƀêñ hra 333 Dak Lak brei thâo, mĭn tĭng thŭn anei knơ̆ng bruă hrui blei hlăm brô 4 êtuh êbâo ton kbâo pioh mkra ƀêñ hra mơ̆ng mnuih ƀuôn sang. Knơ̆ng bruă srăng mđĭ lar hnơ̆ng hrui blei kbâo mơ̆ng 10 truh giăm 11 êklăk prăk/ton, leh anăn lŏ dơ̆ng mâo hdră êlan đru kơ phung pla ti krĭng pla mjing. “Hŏng 1 ha pla mrâo snăn srăng mâo knơ̆ng bruă bi liê 30 êklăk prăk, leh anăn 15 êklăk hŏng 1ha kbâo adôk phŭn. Êngao anăn, hmei đru amâo lŏ prăk kơ mnuih ƀuôn sang 3 êklăk/ha tơdah pla mrâo, 1,5 êklăk/ha hŏng kbâo dôk phŭn, blei hbâo pruê thơ̆ng mkăp kơ mnuih ƀuôn sang. Hdră êlan ênoh đru mơ̆ng anei truh 3 thŭn ti anăp jing 9 êbâo prăk/ton ti hma kơ kbâo mâo hnơ̆ng ƀêñ hra 10CS, leh anăn ênoh blei dưi tla lu hĭn 10%, bi knar hŏng hlăm brô 1 êklăk prăk/ton.

Anei jing thŭn jing thŭn tal 3 phung pla kbâo mkra ƀêñ hra ti Dak Lak mâo mnga. Prăk hrui wĭt mơ̆ng kbâo đru kơ lu gŏ êsei ƀĭng ngă lŏ hma jing mdrŏng/ Krĭng pla kbâo jing leh ana pla mjing phŭn ti dŭm krĭng lăn boh tâo bi lŭk hŏng čuah ti kdriêk Ea Kar, M’Drak, Ƀuôn Đôn leh anăn Ea Sup čar Dak Lak./.