Hlăk dôk hrui êmiêt 1,5 ha mkai ti hma anôk gŏ sang mưn lăn pla mjing ti wăl krah Phú Túc, kdriêk krông Pa, Nguyễn Văn Kính (hriê mơ̆ng čar Phú Yên) bŏ hong klei ênguôt kyua mkai thŭn anei amâo mâo boh mnga jăk ôh. Ñu brei thâo, ăt ti lăn anei mơh, yan êlâo jăk êa hlĭm hjan ñu mâo da đa boh mkai ktrŏ truh kơ 8kg, ƀiădah thŭn anei boh mkai điêt amâo mâo djăp ênoh čuăn ôh:

 “Kâo pla mkai mâo dŭm pluh thŭn hŏng anei leh, mâothŭn djŏboh mnga, mâo thŭn hơăi. Phung ƀuôn sang pla mkai lu jing mưn lăn sơăi, lehanăn čan prăk knơ̆ng prăk duh bi liê, gĭr yơh čiăng kơ thŭn êdei lŏ hnô wit, tơdah jăk êa hlĭm hjan čhĭ mâo ênoh mơh, ăt srăng pralmơh mâo tla nư klei”.

Mơ̆ng wăl krah An Nhơn, čar Bình Định hriê mưn mâo 3 ha lăn ti să Ia Mlăh, kdriêk Krông Pa, čar Gia Lai) pioh pla mkai, Nguyễn Nhật Tân hŏng klei ênguôt lač duh bi liê 1ha mkai mơ̆ng phŭn pla truh kơ mâo hrui êmiêt hlăm brô 150 êklăk prăk. Yan anei hjan lu, mkâo đjiung amâo mâo đei jăk ôh mboh mă mơ̆ng 30 - 34 tôn/1ha, hŏng ênoh čhĭ mơ̆ng 3 - 3,5 êbâo prăk/1kg.  Tng mă snăn, yan mkai thŭn anei Tân luič liê hlăm brô 60 êklăk prăk.

 “Thŭn anei yan adiê amâo mâo jăk ôh, snăn boh mnga mkai kăn jăk mâo rei, amâo mâo djŏ msĕ hŏng thŭn dih ôh, 1 ha mâo hlăm brô 40 tôn mkai, thŭn anei yan adiê amâo jăk mâo lu mđiă ôh, snăn mkai amâo mâo jing, phung pla mjing mkai luič liê lu, 1 ha hlăm brô gŭ dlông 20êklăk prăk”.

Ară anei kluôm kdriêk Krông Pa mâo êbeh 1000 ha mkai mâo giăm 40.000 tôn. Võ Ngọc Châu – Khua adŭ bruă lŏ hma kdriêk Krông Pa brei thâo, giăm jih jang ênhă pla mkai mơ̆ng phung ƀuôn sang jing mnuih mơ̆ng mkăn hriê mưn lăn, klei pla mjing anei amâo mâo dôk hlăm hdră čuăl mkă mơ̆ng kdriêk ôh, mbĭt hŏng anăn ôh, phung ghan mnia hriê mnia mblei êngiê mơh, amâo mâo klei bi kuôl kă hŏng bruă sang čư̆ êa, hŏng dŭm dhar bruă djŏ tuôm čiăng dưi mâo dŭm hdră êlan mă bruă đru kơ phung pla mjing ôh:

 “Êlâo anăn hjan amâo mâo mdei snăn hruĕ mkai tŭl hĕ, boh mnga amâo đei jăk mâo ôh. Lu mnuih pla mkai jing mnuih hriê mơ̆ng Bình Định lehanăn Phú Yên hriê mưnh lăn ti kdriêk Kông Pa, amâo mnuih ƀuôn sang hlăm alŭ wăl ôh pla mjing, snăn jing dleh mơh mtrŭt phung ƀuôn sang, kyua anei jing mnuih hriê mưn lăn pioh pla mkai snăn dleh kiă kriê mơh”./.