Dua hlăm lu mta mrâo mơ̆ng hră čih tal anei dưi čang hmăng đru ba yua tŭ dưn klei găl lăn ala, mơ̆ng anăn mjing boh kdrŭt mđĭ ktang ktang kơ bruă lŏ hma ala čar drei.

Gŏ sang Thái Thị Hường, ti alŭ 8, să Ea Kpam, kdriêk Čŭ M’Gar mâo 8 sao tiêu pla pluă hŏng kphê. Hlăm yan hrui pĕ, ñu brei thâo hnơ̆ng tiu thŭn anei đĭ hlăm brô 40% mkă hŏng thŭn dih. Ênoh tiu ăt mâo hdră đĭ mơ̆ng akŏ yan, ară anei mâo hlăm brô 67.000 – 70.000 prăk/kg đru kơ gŏ sang dưi ƀiă rŭng răng kơ ênoh bi lie êlâo anăn mâo lu. Thái Thị Hường brei thâo:

  “Yan adiê thŭn dih ngă kơ tiu amâo boh, bi thŭn anei găl ênưih hĭn mâo boh lu ƀiădah ênoh knŏng čiăng mgi dih ênoh đĭ hĭn snăn dưi ƀiă ênoh bi liê, mâo ƀiă mnga”.

Hlue si Ngô Thị Mỹ Hạnh, alŭ 3, să Ea Bhôk, kdriêk Čư̆ Kuin, yan tiu thŭn anei mboh leh anăn ênoh đĭ anăn mnuih ƀuôn sang ăt mơak mơh. Ară anei mâo 6 sao tiu, hnơ̆ng đăo tĭng hlăm brô 3 ton, lu hĭn thŭn dih giăm 1 ton, gŏ sang dôk kƀĭn mnuih mă bruă hrui pĕ bi leh čiăng dưi čhĭ hŏng ênoh jăk hĭn čiăng tla prăk bi liê:

“Hlăk êjai tiu hrŏ ênoh, ênoh mưn mnuih mă bruă lŏ đĭ, ênoh hbâo pruê, êa săng đĭ sơăi. Tiu lŏ mâo mnơ̆ng ngă kyua yan adiê amâo găl ênưih anăn hmei tuôm hŏng lu klei dleh dlan, čiăng hlăm wưng kơ anăp ênoh tiu kjăp hĭn, đĭ hĭn mơak hĭn mơh. Anăn jing klei mơak mơ̆ng ƀĭng ngă lŏ hma hmei”.

Kluôm čar Dak Lak mâo giăm 32 êbâo ha tiu, hnơ̆ng mâo giăm 80 êbâo ton. Bruă ênoh tiu đĭ trŭn hlăm wưng êgao, hlăk êjai yan adiê mnơ̆ng ngă lu, ênoh kdrăp mnơ̆ng, mnuih mă bruă ti hnơ̆ng lu hmăi leh kơ prăk hrui wĭt leh anăn klei mĭn phung pla tiu. Ênoh tiu dôk đĭ mơ̆ng akŏ yan hrui pĕ thŭn 2023 jing klei bi knăl jăk kơ ƀĭng ngă lŏ hma hơĭt ai tiê bi liê mđĭ kyar kjăp ana tiu./.