Hlăm wăl sang ti wăl krah Đăk Tô, kdriêk Đăk Tô, čar Kon Tum, pô mbruă A Huyền dôk tông klei mmuñ “Tiếng chày trên sŏk Bom Bo” hŏng brô̆ T’rưng mâo ayŏng mrâo mkra. Kiê kngan thâo mbruă tông jăk êdi hmư̆, Pô mbruă A Huyền hưn mthâo kơ klei khăp mơai kơ kdrăp tông ayŭ djuê ana pô, hlăm anăn brô̆ T’rưng dưi dlăng jing sa kdrăp tông ayŭ mơ̆ng krĭng čư̆ dliê Lăn dap kngư.

 ‘Brô̆ T’rưng anei ngă hluê knhuah mrâo, dưi tông dŭm klei mmuñ djuê ana, klei mmuñ mơ̆ng đưm lehanăn klei mmuñ ênuk ară anei. Čiăng dưi mkra brô̆ T’rưng anei gơ̆ suaĭ mơh, alê, đrao nao hlăm dliê adih mă ba wĭt, lehanăn khăt kdrêč đŭt, hơr ti pui čiăng kơ thu krô lehanăn hrĭ hluê si pô čiăng. Čiăng kơ dŭm đĭng đrao leh tông srăng mâo ênhiang djŏ guôp, brei drei hrĭ djŏ, hmư̆ lehanăn bi mklă ênai mnê mơ̆ng dŭm đĭng anei hŏng knga pô.

Amâo djŏ knŏng mkra brô̆ T’rưng, pô mbruă A Huyền lŏ tui ksiêm lehanăn mkra brô̆ boh tâo – sa mta kdrăp tông đưm êdi ti krĭng Lăn dap kngư. Dŭm klŏ boh tâo dưi mă mơ̆ng hnoh êa, leh mâo pô mbruă a Huyền mkra jing brô̆ boh tâo, gơ̆ mâo ênai mñê mdê mdô, jăk êdi hmư̆, msĕ si ênai bi mhač mơ̆ng čư̆ dliê. Pô mbruă A Huyên brei thâo, mơ̆ng điêt, ñu dưi “Rông ba” hŏng dŭm ênhiang êdu êun mơ̆ng kdrăp tông ayŭ djuê ana msĕ si brô T’rưng, Klông Put, brô boh tâo, čing čhar mơ̆ng djuê ana Sedang. Kyua anăn leh ruê̆ hriăm Sang hră gưl prŏng bruă Dhar kreh Kdŏ mmuñ Lĭng kahan ti Hà Nội, wĭt ti krĭng ƀuôn sang Đăk Tô, čar Kon Tum, pô mbruă A Huyên msĕ si dưi hrăm mbĭt hlăm wăl anôk knăm mơak, jih ai tiê pô ksiêm mkra dŭm kdrăp tông ayŭ djuê ana. Êngao kơ bruă mkra, pô mbruă A Huyên lŏ nao mdah ti dŭm hdră p’prŏng ti dŭm alŭ wăl hlăm krĭng lăn dap kngư, nao mdah ti Ƀuôn Dhar kreh – Hiu čhưn ênguê dŭm djuê ana Việt Nam (Đồng Mô, Sơn Tây, Hà Nội).

 ‘’Kâo nao hgŭm hlăm lu hdră p’prŏng msĕ si knăm mơak čhĭ sâm Ngọc Linh. Kâo ăt nao mdah hdră tông kdrăp djuê ana ti lu anôk msĕ si Hà Nội, Sài Gòn lehanăn Đà Nẵng. Nao hgŭm hlăm dŭm hdră anăn, kâo dưi mkăp leh hră pah mni jing “Pô kriê kjăp ƀuôn bruă djuê ana đưm mơ̆ng djuê ana pô”, mâo mă Medai êa Mah lehanăn hră pah mni hlăk kâo nao mdah ti Sài Gòn”.

 Amâo djŏ knŏng mkra kdrăp tông ayŭ djuê ana pô ƀiădah pô mbruă A Huyên ăt gĭr jih ai tiê pô hŏng bruă mtô hdră tông ayŭ kơ phung hđeh hriăm hră lehanăn ênuk gưl hđeh. Mrâo êgao, Adŭ bruă Dhar kreh – Hâo hưn kdriêk Đăk Tô (Kon Tum) bi hgŭm hŏng Anôk bruă sang čư̆ êa wăl krah Đăk Tô pŏk adŭ mtô tông čing, kdŏ čhuang lehanăn kdrăp tông ayŭ mơ̆ng djuê ana. Pô mbruă A Huyền dưi mtô bi hriăm kơ 30 čô leh.

 ‘Čiăng dưi tông brô̆ T’rưng brei drei hriăm nanao jih hruê mlam, phung hđeh hriê tinei hriăm, snăn digơ̆ hriăm mơ̆ng 3 truh kơ 4 mlan kơh dưi tông riah brô̆ T’rưng leh. Phung hđeh hriê hriăm digơ̆ khăp mơh, hriê tinei hriăm, hmư̆ ênai brô̆ T’rưng jăk êdi, tông lu gơ̆ kma hlăm ai tiê, hlăm kđeh êrah pô. Ară anei, phung hriê hriăm hŏng A Huyên jing phung hđeh mơ̆ng adŭ 4, adŭ 7, adŭ 9 lehanăn adŭ 10”.

Hŏng klei khăp mơai kơ ênhiang djuê ana, kyua anăn pô mbruă A Huyên lŏ mđing uêñ êdi kơ klei huĭ srăng luič ram knhuah jăk siam mơ̆ng dhar kreh djuê ana pô. Klei hdĭp ênuk ară anei mâo lu kdrăp mrâo, êlan hla pŏk web yang ƀuôn lehanăn dŭm mta mrâo mkăn ngă kơ phung hđeh kbưi hŏng dhar kreh êpul êya msĕ si tông čing čhar lehanăn dŭm tông ayŭ mkăn. Kyua anăn, pô mbruă A Huyên gĭr lŏ brei jih jang lŏ wĭt hŏng êpul êya, đru kơ phung hđeh thâo săng lehanăn lŏ mâo klei khăp hĭn kơ dhar kreh djuê ana pô.

 ‘’Kâo ƀuh ară anei phung mduôn thâo tông ayŭ kdrăp djuê ana pô amâo lŏ dôk lu ôh, kâo bi mĭn si srăng ngă čiăng lŏ čuê lehanăn mtô kơ ênuk gưl hđeh, brei diñu thâo anei jing kdrăp tông ayŭ mơ̆ng djuê ana pô, brei thâo kriê pioh, mđĭ kyar čiăng kơ ƀĭng găp hlăm lehanăn êngao ala čar thâo săng hĭn kơ knhuah dhar kreh đưm djuê ana, kơ kdrăp tông ayŭ djuê ana pô’.

Dưi lač, A Huyền jing sa čô mbruă êdah êdi hlăm hdră mkra lehanăn mtô kdrăp tông ayŭ mơ̆ng djuê ana Sedang ti kdriêk Đăk Tô, čar Kon Tum. Dŭm klei đru mguôp mơ̆ng pô mbruă A Huyên amâo djŏ knŏng bi lu jơr kơ hjiê dhar kreh djuê ana Sedang ƀiădah lŏ đru kơ ênhiang mmuñ krĭng lăn dap kngư ƀrư̆ hruê ƀrư̆ mâo lu mnuih thâo, khăp čiăng lehanăn mpŭ mni./.