Sang Roong mơ̆ng mnuih ƀuôn sang dŭm djuê ana krĭng Lăn dap kngư hlăm anăn mâo mnuih Sedang, dưi dlăng jing sa klei bi êdah dhar kreh jăk siam mơ̆ng krĭng lăn anei. Hŏng mnuih ƀuôn sang dŭm djuê ana Lăn dap kngư, Sang Roong mâo bruă klam yuôm bhăn hlăm ai tiê klei miưn, dhar kreh jing ƀô̆ mta mơ̆ng ƀuôn sang. Sang Roong mơ̆ng mnuih Sedang jing sa boh sang prŏng, čuôr sang dlông, dlăng mơ̆ng kbưi msĕ si sa ƀĕ jông mdơ̆ng phă dlông, ti krah krĭng ƀuôn sang. Ayŏng A Pháo, Khua kiă kriê să Đak Ang, kdriêk Ngọc Hồi, čar Kon Tum brei thâo:

 “Sang Roong jing anôk mjĕ mjuk êpul êya mơ̆ng jih ƀuôn sang, mơ̆ng hruê mơak, knăm điêt prŏng, mnuih ƀuôn sang bi kƀĭn ti Sang Roong čiăng mkŏ mjing. Sang Roong mâo mnuih ƀuôn sang hlăm ƀuôn bi rŭ mdơ̆ng, kah mbha grăp čô, grăp êpul mă bruă mdê mdê. Sang Roong êlâo adih dưi tiap hŏng hla kyâo, hlang, mtih kram, alê… ară anei dưi pơ̆ng tôl nah dlông.

Anôk mdơ̆ng sang Roong mâo khua mduôn ruah jing krĭng lăn kngư, mngač tač, Sang Roong dưi mdơ̆ng ti krĭng lăn dưi dlăng ƀuh mơ̆ng kbưi, amâo mdơ̆ng ôh ti anôk hgăm, ti akŏ amâo dah tluôn ƀuôn. Hdră mdơ̆ng sang Roong hluê nga kjăp klei bhiăn mơ̆ng êpul êya ƀuôn sang lehanăn jiă knhuah ai tiê klei mĭn. Hluê si klei bhiăn, Khua mduôn srăng hưn mthâo klei bi mklă mdơ̆ng sang Roong kơ jih jang mnuih ƀuôn sang êlâo 1 thŭn čiăng mprăp mnơ̆ng, leh kơnăn ngă yang akâo kơ lăn adiê dưi brei mnuih ƀuôn sang mdơ̆ng. Khua mduôn jing pô kăm ksiêm dlăng, ktrâo lač kơ ƀuôn sang čiăng rơ̆ng boh tŭ knhuah rŭ mdơ̆ng djŏ klei bhiăn djuê ana, kah mbha klei đua klam kơ mnuih ƀuôn sang, klei đru mguôp hruê ai, mnơ̆ng dhơ̆ng lehanăn ngăn drăp.

Sang Roong mnuih Sedang mâo mơ̆ng 8 truh kơ 10 kmeh phŭn, tui hluê sang mdơ̆ng. Sang anei dưi mkŏ hŏng dŭm ƀĕ êyông da mgăn čiăng bi kjăp sang. A Phâng, să Đăk Ang, kdriêk Ngọc Hồi, čar Kon Tum brei thâo: Hŏng mnjuih djuê ana Sedang, sang Roong brei mdơ̆ng dlông snăn kơh mnuih đĭ dôk hlăm sang dưi hrip ai êwa jăk mơ̆ng laưn adiê. Mnuih ƀuôn sang Sedâng mâo klei mĭn, Sang Roong jing mta mnơ̆ng bi hgŭm mguôp anak mnuih hŏng êngĭt adiê, jing anôk bi mjĕ mjuk lehanăn ba mơĭt klei đăo knang plah wah anak mnuih hŏng phung Yang.

 “Mdơ̆ng sang Roong hmei srăng nao duah dŭm ƀĕ ana kyâo prŏng. Jih jang amâo yua msei đĭn ôh čiăng pơ̆ng sang ƀiădah hmei yua klei hwiê kă krañ bi kjăp. Knŏng khua mduôn hŏng mnuih khua thŭn thâo kơ hdră, hdră kă krañ lehanăn mtô kơ phung sang čô. Mdơ̆ng sang Roong knŏng phung êkei mkra kyua diñu thâo đĭ kơ dlông. Leh mdơ̆ng snăn kơh truh bruă phung mniê nao hiu duah klei hwiê, mñam mtih Sang Roong. Êlâo adih, mkra hlăm brô 1 mlan leh yơh sa boh sang Roong.

Sang Roong mơ̆ng mnuih Sedang kreh mkra hŏng kram, alê. Dŭm ƀĕ ana kram, alê, đrao dưi ƀuôn sang ruah lehanăn nao koh bi knar hŏng boh dlông mơ̆ng sang, lehanăn biêng mčah, koh êpih čiăng mñam mtih sang. Ƀăng bhă Sang Roong mkra phă anăp, anôk mâo tač prŏng. Êñan đĭ trŭn dưi mkra hŏng sa ƀĕ kyâo prŏng. Sang Roong mnuih Sedang mâo dua boh čuôr nah dlông, dưi tiap hŏng hlang amâo dah hwiê čăp mbĭt dăp tring. A Phâng, să Đak Ang, kdriêk Ngọc Hồi, čar Kon Tum brei thâo:

 “Tơdah ƀuôn sang mâo lu mnuih srăng mkra sang prŏng, bi ƀiă srăng mkra điêt. Mdơ̆ng sang Roong brei đing kơ boh dlông lehanăn boh prŏng, dua dŏ anei brei bi knar mbĭt. Anôk yuôm bhăn hĭn jing anôk ngă yang. Ară anei mkra anôk ngă yang leh, êlâo adih arăn kreh mñam ê’I điêt, kă ti sang Roong, ƀơ̆ng ya mta mnơ̆ng arăng kreh dưm tinăn ƀiă, msĕ si ngă yang kơ aê aduôn atâo atiêt.

Hlăm sang Roong kreh mâo rup lehanăn yuôl dŭm pŏk mdhă krah mkra rup mnga, rup čĭm, rup mdiê… Mnuih ƀuôn sang djuê ana Sedang knŏng yua êa mil jŭ, kô̆ lehanăn hrah čiăng bi msiam sang Roong. Klei mĭn mơ̆ng mnuih ƀuôn sang jing êa mil jŭ srăng suôt đuê̆ jih ksơ̆k mtâo, êa mil kô̆ bi êdah klei sĭt suôr lehanăn êa mil hrah bi êdah kơ klei tŭ dưi. Hlăm grăp boh sang Roong lŏ mâo sa anôk yuôm bhăn čiăng dưm dŭm mta mnơ̆ng, đa đa knŏng sa ƀĕ dhŏng, klŏ boh tâo, ki kbao…. Hlăm sang Roong, lu ƀuôn sang lŏ yuôl rup, rup Khua gĭt gai Hồ Chí Minh, hla čhiăm gru ala čar. Amâo djŏ knŏng jing anôk bi kƀĭn, mjĕ mjuk, Sang Roong lŏ jing anôk mnuih ƀuôn sang Sedang krơ̆ng kjăp, mđĭ lar dŭm boh tŭ yuôm dhar kreh djuê ana, klei bhiăn đăo mơ̆ng djuê ana pô./.