Thŭn anei, khădah êgao 70 thŭn leh, khua mduôn K’Keo ăt ba anăp hlăm djăp hdră bruă, “Lač nao mbĭt hŏng ngă bruă”. Kơ hdră mđĭ kyar bruă duh mkra gŏ sang, gŏ sang ñu mâo 2 ha lăn kphê, grăp thŭn hrui mâo êbeh 8 ton kphê asăr, 8 sao mdiê lŏ 2 yan, grăp thŭn mâo hlăm brô 8 ton braih. Êngao anăn, gŏ sang ñu lŏ pla pluă dŭm mta mnơ̆ng hlăm đang kphê msĕ si durian, makka, ƀơr, boh kneh… Kyua anăn, gŏ sang K’Keo amâo djŏ “knŏng mâo mnơ̆ng ƀơ̆ng mnơ̆ng pioh” ƀiădah lŏ đru kơ lu mnuih hlăm alŭ. Ñu brei thâo:

“Êlâo adih mnuih ƀuôn sang hlăm alŭ ka thâo ba yua kdrăp kreh knhâo, mrâo mrang hlăm bruă pla mjing, ngă mdiê lŏ, pla kphê ka thâo hdră dlăng kriê, pruê hbâo. Gŏ sang ñu jing pô tal êlâo hluê ngă, leh gŏ sang ñu ngă tŭ dưn snăn mâo lu mnuih nao tui ksiêm lehanăn hluê ngă, mơ̆ng hdră ksiêm hriăm, klei thâo kơ bruă, ñu lŏ kah mbha kơ mnuih ƀuôn sang, čang hmăng jih jang dưi ngă msĕ si gŏ sang ñu”.

Thôn Hàng Làng mâo 384 gŏ sang, lu jing mnuih K’ho, ară anei dôk 4 gŏ sang ƀun. Klei hdĭp mnơ̆ng dhơ̆ng ƀrư̆ hruê ƀrư̆ đĭ kyar, dhar kreh ai tiê klei mĭn mơ̆ng mnuih ƀuôn sang ƀrư̆ hruê ƀrư̆ lu jơr. Aduôn Ka’Lèm, ti să Di Linh brei thâo, kyua dŭm klei đru mguôp mơ̆ng khua mduôn K’Kèo, alŭ Hàng Làng mâo leh dŭm klei bi mlih jăk siam.

 “Khua mduôn K’Keo jing mnuih mâo kơhưm ti alŭ wăl hlăm hdră mđĭ kyar bruă duh mkra – ala ƀuôn, krơ̆ng kjăp dhar kreh djuê ana. Ñu jih ai tiê kơ bruă mtô mblang hdră êlan mtrŭn mơ̆ng Đảng, Knŭk kna truh hŏng mnuih ƀuôn sang, ktrâo lač kơ hdră mă bruă tŭ dưn, mtrŭt mjhar mnuih ƀuôn sang bi mguôp rơ̆ng kjăp klei êđăp ênang ala ƀuôn ti alŭ wăl”.

Hluê si klei mtrŭt mjhar mơ̆ng khua mduôn K’ Keo, lu gŏ sang lui leh klei bhiăn amâo djŏ mơ̆ng đưm, hrăm mbĭt mkŏ mkra klei hdĭp kreh dhar, đĭ kyar. Ñu brei thâo:

 “Mbĭt hŏng êpul phung khua mduôn mâo kơhưm hlăm ƀuôn, ñu mtă mtăn, mtô lač kơ gŏ sang, anak čô dŭm klei mrâo, klei jăk čiăng mđĭ kyar, amâo dưi ngă bruă soh. Dôk uaih pral gĭr mă bruă, đru mguôp hŏng Đảng, Knŭk kna, alŭ wăl mtô lač kơ čô anak kơ hdră mđĭ kyar bruă duh mkra gŏ sang, kriê kjăp knhuah dhar kreh djuê ana, alŭ ƀuôn kñăm rơ̆ng klei hơĭt ênang ti ƀuôn sang, sa ai tiê sĭt suôr hluê Đảng, Knŭk kna.

Khua mduôn K’ Keo lŏ jing pô thâo kơ dhar kreh djuê ana K’ho, hlăm hdră dhar kreh ti krĭng mnuih djuê ƀiă ti Lâm Đồng, Ñu atăt ba nanao êpul phung mbruă nao mdah lehanăn dưi mâo lu klei pah mni. K’Keo pô mtam mtô 5 adŭ bi hriăm tông čing kơ phung hđeh êdam êra ti alŭ wăl.

 Phạm Văn Linh, Khua kiă kriê să Gung Rĕ hđăp, ară anei jing să Di Linh, čar Lâm Đồng brei thâo, khua mduôn K’Keo đru mguôp yuôm bhăn hlăm hdră mkŏ mkra klei hdĭp mrâo ti krĭng mnuih djuê ƀiă hlăm alŭ wăl.

 “Ñu jing pô mâo lu klei thâo, blŭ hrăm jăk ênang, mtrŭt mjhar mnuih ƀuôn sang hluê Đảng, Knŭk kna, lăm lui klei bhiăn amâo djŏ mơ̆ng đưm amâo lŏ djŏ guôp hŏng klei hdĭp mrâo ênuk ară anei lehanăn mđĭ lar dŭm knhuah gru dhar kreh mnuih K’ho… Khua mduôn K’Keo ngă jăk êdi bruă anei./.