Anôk pla mnga Hoa Chi An ti ƀuôn hgŭm 12, ƀuôn prŏng Đà Lạt, čar Lâm Đồng ară anei jing leh anôk nao čhưn dlăng, ksiêm hriăm mơ̆ng lu êpul bruă, phung pla mnga ti alŭ wăl. Jih jang hdră mkra mjing mjeh leh anăn mnga mtah tinei dưi gĭt gai hŏng ênoh mrô, kriê dlăng hŏng kdrăp mrâo. Mơ̆ng anăn, rơ̆ng boh tŭ mkra mjing êjai mđĭ ênoh yuôm mnơ̆ng dhơ̆ng, mkăp kơ anôk ba čhĭ hlăm ala čar leh anăn ala tač êngao. Hồ Vũ Quốc Hùng, khua anôk pla mnga Hoa Chi An brei thâo: 

 “Kdrăp mrâo jing kliăng amâo djŏ knŏng mđĭ klei čhưn dlăng kơ mnga Đà Lạt ôh ƀiădah lŏ pŏk klei găl mrâo, mnga mrâo… Mơ̆ng anăn drei hưn mthâo leh anăn mkăp kơ anôk ba čhĭ”.

          Hŏng ênhă pla mnga êbeh 10 êbâo ha, hnơ̆ng hlăm thŭn 2024 mâo 4,4 êklai adhan, Đà Lạt - Lâm Đồng dôk mrô sa kluôm ala kơ bruă mkra mjing mnga. Ară anei ƀuôn prŏng mâo 400 mta hŏng dŭm êbâo mjeh mnga leh anăn lŏ dơ̆ng dưi mbŏ mjeh mrâo hŏng êlan blei mơ̆ng ala tač êngao mâo hră bi mklă klei dưi.

 Hlue si Phan Thanh Sang, Khua Êpul hgŭm mnga Đà Lạt, mbĭt hŏng klei găl yan adiê, lăn ala djŏ guôp kơ bruă pla mjing lu jơr dŭm mta mnga jih thŭn, bruă blei kdrăp mrâo mrang, msĕ si mjeh, kdrăp mnơ̆ng leh anăn kdrăp mrâo, thâo mĭn hlăm bruă mkra mjing ba leh bruă pla mnga mơ̆ng Đà Lạt – Lâm Đồng đĭ kyar bi knar hŏng dŭm ala čar hlăm krĭng wăl. Khădah snăn, hnơ̆ng ba čhĭ mnga Đà Lạt kơ ala tač êngao mrâo mâo hlăm brô 11% hnơ̆ng, leh anăn bruă mnga mơ̆ng  Đà Lạt - Lâm Đồng dôk hmăi klei bi ktưn ktang snăk tơdah hnơ̆ng mnga lu ala čar ti hnơ̆ng lu, hlăk êjai ai ba čhĭ mnga hlăm kluôm rŏng lăn hrŏ lu. Phan Thanh Sang bi mklă, êngao kơ ba yua klei kreh knhâo kdrăp mrâo hlăm bruă pla mjing - hrui êmiêt, mta mjeh jing kliăng čiăng mđĭ ai bi ktưn kơ mnga Đà Lạt:

 “Bi hgŭm hŏng dŭm anôk bruă mkra mjing dŭm mta mjeh mrô sa dlông rŏng lăn čiăng bi hgŭm mkra mjing ana mjeh ti anôk ba čhĭ Việt Nam. Êngao anăn, dŭm mta mnga, mnơ̆ng dhơ̆ng mơ̆ng mnga khăt adhan mâo klei găl hjăn mơ̆ng Đà Lạt – Lâm Đồng snăn ăt srăng lŏ dơ̆ng mđĭ bruă mkra mjing”.

 Hlue si nai prĭn Phạm S, K’iăng Khua Knơ̆ng bruă sang čư̆ êa čar Lâm Đồng, ti anăp klei lông dlăng dôk găn brei ƀuh, čar srăng kčah hdră klôm đĭ kyar bruă mnga Đà Lạt - Lâm Đồng hơĭt kjăp, tŭ dưn, jih anôk ba čhĭ hlăm ala čar leh anăn ba čhĭ kơ ala tač êngao. Hdră kñăm kčah jing truh thŭn 2030, mđĭ hnơ̆ng mnga kluôm čar mâo 5,4 êklai adhan leh anăn 0,5 êklai hbŭ mnga dŭm mta; ênoh yuôm mkra mjing mnga mâo êbeh 15 êbâo êklai prăk, ênoh hrui wĭt kah knar mâo êbeh 3,7 êklai prăk/ha, leh anăn ênoh prăk hrui wĭt mơ̆ng ba čhĭ mnga kơ ala tač êngao mâo êbeh 217 êklăk USD. Truh thŭn 2050, klă klơ̆ng jih jang hnơ̆ng mnga Đà Lạt dưi ba čhĭ hlăm dŭm anôk bruă logistics mrâo mrang, hŏng êbeh 50% hnơ̆ng mnga dưi ba čhĭ kơ ala tač êngao.

 Hlue ngă hdră anei, Êpul hgŭm mnga Đà Lạt jing anôk bruă tal êlâo mâo čar gĭt gai hlue ngă Hdră mtrŭn mrô 57, hruê 22/12/2024 mơ̆ng Phŭn bruă kđi čar kơ klei êdah êdi mđĭ kyar klei kreh knhâo, kdrăp mrâo, mlih mrâo mbruă leh anăn mlih mrô ala čar. Hlăm anăn, hdră msir kreh knhâo - kdrăp mrâo jing phŭn, êdah kdlưn prŏng hĭn čiăng mđĭ kyar bruă mnga leh anăn mđĭ ênoh ba čhĭ kơ ala tač êngao. Phạm S lač:

 “Lŏ mkŏ mjing bruă mkra mjing, bi liê hlăm hdră msir kreh knhâo leh anăn kdrăp mrâo, lehh anăn ksiêm hriăm ruah mjeh. Boh nik, brei drei ba yua mjeh, gen kơ klei lu jơr mnơ̆ng dhơ̆ng hdĭp mơ̆ng čar Lâm Đồng čiăng ruah mjeh mdê hjăn mơ̆ng Đà Lạt – Lâm Đồng mâo ênoh yuôm. Čiăng kơ drei mâo djăp klei găl hưn mdah rup hgŭm hlăm ênoh yuôm kluôm rŏng lăn”.

Bruă mnga Đà Lạt – Lâm Đồng dôk tlă anăp hŏng klei lông dlăng prŏng snăk hlăm klei ñŭ kma leh anăn bi ktưn hŏng ala tač êngao knư̆ lu. Khădah snăn, hŏng klei tă hdră klă mngač, ba yua ktang klei kreh knhâo kdrăp mrâo hŏng klei mkra mđĭ hlăm bruă mkra mjing mjeh mnga, Đà Lạt amâo djŏ knŏng dưi mđĭ lar ai bi ktưn ôh, ƀiădah lŏ mđĭ kyar kjăp, mđĭ kơhưm pôti dlông rŏng lăn./.