
Ƀuôn hiu čhưn ênguê yang ƀuôn Ta Lang, ƀuôn hgŭm A Vương, ƀuôn prŏng Đà Nẵng dôk ti ktuê êlan dơ̆ng Hồ Chí Minh. Phung tuê hriê tinei dưi mbĭt hŏng mnuih ƀuôn sang nao hlăm dliê pĕ djam, đăk êbŭng, mă kan êa hnoh, leh anăn čŏng pô mkra mjing dŭm mta mnơ̆ng ƀơ̆ng knhuah gru, dlăng klei pĕ tông, kdŏ mmuñ mnuih Kơtu ti gŭ sang Gươl.
Ayŏng A Lăng Mít, ti să A Vương brei thâo: mnuih Kơtu dŭm thŭn êlâo knŏng knang kơ bruă lŏ hma, klei hưn êpa ƀun ƀin dôk nanao. Mơ̆ng hruê ƀuôn hiu čhưn ênguê yang ƀuôn Ta Lang mkŏ mjing, gŏ sang ñu leh anăn mnuih ƀuôn sang hlăm ƀuôn bi nao hgŭm. Thŭn 2018, ayŏng Mít mâo knŭk kna đru 40 êklăk prăk, gŏ sang lŏ lĭng čan čiăng lŏ mkra mđĭ sang pô jing bruă hiu čhưn ênguê hométay. Phung tuê nao čuă dlăng, gŏ sang ñu ăt ngă bruă tŭk knă, phung mdei mlam ti homstay mâo ênoh blei hră 100.000 prăk hlăm sa čô.

“Mmông phung tuê hriê mnuih ƀuôn sang hơ̆k mơak êdi, sang kâo mâo anôk mdei msăn leh. Ƀrư̆ hruê ƀrư̆ đĭ kyar bruă hiu čhưn ênguê yang ƀuôn mnuih ƀuôn sang ăt đĭ kyar. Phung tuê hruê tŭk knă kơ tuê, mnuih ƀuôn sang hlăm ƀuôn mâo klei đĭ ƀiă. Êlâo dih ngă hma amâo mâo boh mnga kăn mâo êsei huă djam ƀơ̆ng, ară anei ngă bruă hiu čhưn ênguê yang ƀuôn klei hdĭp hơĭt hĭn”.
Ƀuôn hiu čhưn ênguê yang ƀuôn Ta Lang, ƀuôn hgŭm A Vương, mâo anôk bruă mđiŭ kyar Asi, hdră bruă Trường Sơn Xanh mơ̆ng anôk bruă mđĭ kyar Mi duh bi liê leh anăn Êpul bruă hiu čhưn ênguê Việt Nam đru klă klơ̆ng dưi ba jao kơ êpul êya ngă bruă leh anăn đru kơ phung tuê thŭn 2019. Mơ̆ng mphŭn ngă bruă hiu čhưn ênguê, mnuih Kơtu tinei thâo săng hĭn kơ bruă răng mgang wăl hdĭp mda čiăng bi mâo klei jăk hŏng phung tuê. Alŭ wăl rŭ mdơ̆ng leh dua boh sang Gươl, mtô bi hriăm kơ klei doh êbăt mnơ̆ng ƀơ̆ng huă, mkŏ mjing dŭm êpul bruă tŭk knă dŭm mta mnơ̆ng ƀơ̆ng knhuah gru mnuih Kơtu, lŏ krŭ wĭt bruă hrĭ mñam, pơ̆k mñam…Dŭm klei kdŏ msĕ si tân tung, da dá, blŭ lý, mmuñ lý, pĕ tông kdăp djuê ana ăt mâo mnuih ƀuôn sang ba yua čiăng kơ phung tuê ktuê dlăng. Phung tuê dưi nao dlăng kơ dliê Pơ Mu, dliê lim, dliê đỗ quyên hrông mơ̆ng čư̆ dliê. Mạc Như Phương, Khua bruă sang čư̆ êa să A Vương brei thâo:
“Bruă hiu čhưn ênguê ti alŭ wăl mphŭn mrâo mkŏ mjing, hlăm klei ngă bruă dưi mđĭ hĭn klei thâo săng mnuih ƀuôn sang. Hluê anăn, klei hdĭp mnuih ƀuôn sang ngă bruă hiu čhưn ênguê dưi mđĭ hĭn, đru hlăm klei mđĭ kyar bruă duh mkra, msir lăm klei ư̆ êpa ƀun ƀin ti alŭ wăl”.

Ƀuôn hiu čhưn ênguê yang ƀuôn ĐhRồng ti să Đông Giang mâo 35 gŏ sang hgŭm hŏng 82 čô mă bruă jêñ jêñ. Amai Briu Thị Hạnh, sa čô hlăm êpul pơ̆k mñam hlăm ƀuôn brei thâo, êlâo dih, bruă pơ̆k mñam knŏng yua hlăm gŏ sang, ară anei pơ̆k mñam leh anăn čhĭ kơ phung tuê, kyuanăn klei hdĭp ăt đĭ hĭn. Hluê si Amai Hạnh, sa blah mnal pơ̆k mñam ba čhĭ mơ̆ng 800 - 1 êklăk prăk, mơiêng đŭt 500.000 êbâo prăk, ao čhuang 1 êklăk 200 êbâo prăk. Êngao kơ bruă pơ̆k mñam, amai Hạnh lŏ jing sa čô hgŭm hlăm êpul tŭk kna leh anăn êpul kdŏ mmuñ.
“Tuê hriê ti dŏ diñu êmuh pô čhĭ, hlei čiăng ao diñu hriê diñu blei. Êpul mâo 35 čô amai adei. Sitôhmô čhiăm băk kuê pô čhĭ 250.000 sa blah, mta mnơ̆ng anei dưi tŭ jing jing mnơ̆ng dhơ̆ng OCOP, pô ăt mñam lu mta mnơ̆ng mkăn ngă mnơ̆ng djă pioh msĕ si kdô čiêng, kdô dưm đĭng blŭ, dưm giê čih, lu mta mnơ̆ng sơnăk”.

Mâo leh dŭm pluh ƀuôn ti krĭng čư̆ čhiăng mơ̆ng ƀuôn prŏng Đà Nẵng mđĭ kyar klei bi hmô bruă hiu čhưn ênguê yang ƀuôn, bruă hiu čhưn wăl mnơ̆ng hdĭp, ƀuôn bruă đưm. Ƀuôn prŏng Đà Nẵng mâo lu hdră êlan đru kơ dŭm ƀuôn hiu čhưn ênguê yang ƀuôn msĕ si: Mđĭ hĭn klei mkŏ hŏng dŭm knơ̆ng bruă, anôk bruă čhưn dhing, phung atăt tuê, mtrŭt mđĭ klei hưn mdah dŭm dŭm mbah hâo hưn, internet yang ƀuôn čiăng iêo jak phung tuê nao čuă dlăng, bruă hiu čhưn ênguê lŏ mkŏ mjing bruă mă kơ mnuih ƀuôn sang, mđĭ hnư hrui wĭt bi hơĭt klei hdĭp, bi hrŏ ƀun hơ̆t kjăp.
Viết bình luận