Hruê 13/1, hưn mdah hlăm klei kƀĭn trông kluôm ala kơ klei kdlưn hĭn mđĭ kyar klei kreh knhâo, mrâo mrang, mlih mrâo hŏng klei mbruă leh anăn mlih mrô ala čar. Khua hlăm Phŭn bruă kđi čar, Khua bruă kƀĭn ala Trần Thanh Mẫn mnă klă lơ̆ng dơ̆ng bi mguôp mkŏ mjing klei ksiêm dlăng, ksiêm wĭt, bi klă bruă hluê dŭm hdră êlan, klei bhiăn lăn čar, bi klă klei mĭn kơ bruă klam ba hdră êlan jing ai dưi bi ktưn”.

Hluê anăn, Bruă Kƀĭn Ala srăng kñăm kơ dŭm bruă klam, hdră êlan yuôm bhiăn msĕ si mđĭ klei thâo săng, klei kdlưn hĭn kơ mlih mrâo bruă klam mơ̆ng klei kreh knhâo mrâo mrang, klei mlih mrô. Hruê 10/1/2025, Bruă Đảng Bruă Kƀĭn Ala ba mdah leh hdră êngă bruă mrô 3260 čiăng hluê ngă hdră mtrŭn, hlăm anăn bi klă mta kñăm, bruă klam , hnơ̆ng čuăn bi klă bruă klam klă mngač, djŏ hdră kčah leh anăn mkŏ mjing hŏng ai tiê mjêč, mâo klei gĭr, bi klă bruă klam pô ba anăp, knuă druh, phung mă bruă knŭk kna, mnuih mă bruă, bi klă boh tŭ dưn klei mlih mrô, dưn yua klei kreh knhâo mrâo mrang hlăm bruă klam, bi lar ai tiê mlih mrâo, mbruă, nao êlâo, jhŏng mĭn, jhŏng ngă, jhŏng đua klam.

 “Boh nik hlăm klei kƀĭn trông ksiêm wĭt mơ̆ng knŭk kna thŭn 2024 mrâo êgao, Khua gĭt gai Đảng Tô Lâm lŏ dơ̆ng mñă ktang, hdră bhiăn lăn čar čiăng dưi bi kluôm dhuôm, čiăng kơ grăp mta phŭn knŏng bi klă sa hdră bhiăn. Kriê dlăng hluê si boh tŭ, čiăng lăm lui hdră dŭm akâo brei, mlih mrâo hdră mkăp brei ngăn prăk hluê si boh tŭ phŭn kčưm, mlih mơ̆ng ksiêm dlăng êlâo jing ksiêm dlăng êdei. Hdră kriê dlăng kreh knhâo srăng mkŏ mjing boh kdrŭt mlih mrâo, mbruă msĕ hŏng “mta 10” hlăm bruă lŏ hma”.

Hlue si tur knơ̆ng knŭk kna hưn mdah leh anăn hluê ngă hdră čih mkra hdră bhiăn, asăp mtrŭn, Bruă Kƀĭn Ala brei klei blŭ mguôp, ksiêm dlăng bi klă dŭm hdră hlăm 06 mta bruă kñăm: Kơ klei kreh knhâo, mrâo mrang, mlih mrâo hŏng klei mbruă, mlih mrô, bi kluôm 8 hdră bhiăn. Bi kơ klei duh bi liê leh anăn ngăn prăk, ksiêm dlăng, bi kluôm 12 hdră bhiăn. Bi kơ bruă knuă druh, mnuih mă bruă, sang hră mơar, mđĭ kyar ai dưi: ksiêm dlăng, mkra mlih, bi kluôm 11 hdră bhiăn. Bi kơ knơ̆ng bruă, mnia mblei: ksiêm dlăng, bi kluôm 3 hdră bhiăn. Bi kơ bruă răng mgang klei êđăp ênang hlăm wăl mạng, wăl mrô, ksiêm dlăng bi kluôm 3 hdră bhiăn. Bi kơ klei mlih mrâo, dưn yua klei kreh knhâo mrâo mrang, mlih mrâo hŏng klei mbruă, bi kluôm tur knơ̆ng hdră bhiăn čiăng mtrŭt mđĭ bruă mkŏ mjing, bi êran Bruă Kƀĭn Ala mrô, knŭk kna mrô, bruă sang čư̆ êa mrô. Êngao kơnăn, lŏ dơ̆ng ksiêm dlăng, rŭ mdơ̆ng mrâo dŭm hră mơar hdră bhiăn djŏ tuôm. Hŏng ai tiê anăn, hluê si Khua bruă kƀĭn ala Trần Thanh Mẫn:

 “Ti anăp jing mjêč bi mguôp mprăp hluê ngă hdră êlan čih mkra hdră bhiăn, hdră mtrŭn thŭn 2025. Mñă kơ Êpul khua bruă Đảng knŭk kna, knŭk kna, dŭm phŭn, dhar bruă kñăm kơ bruă bi klă, ksiêm wĭt ngă bruă, ksiêm dlăng, bi mguôp mkra mlih, bi mbŏ, mkŏ mjing mrâo hdră bhiăn hlăm klei kreh knhâo, mrâo mrang, mlih mrâo hŏng klei mbruă, mlih mrô čiăng rơ̆ng kơ hnơ̆ng tŭ jăk, djŏ hdră kčah”.

Hŏng Êpul gơ̆ng bruă ƀuôn sang dŭm gưl, khua Bruă Kƀĭn Ala mñă, dlăng kơ boh sĭt bi mguôp ba mdah dŭm hdră êlan hluê si klei dưi čiăng mtrŭt mjhar, mtrŭt mđĭ mđĭ kyar ksiêm duah klei kreh knhâo, mrâo mrang, mlih mrâo hŏng klei mbruă, mlih mrô, mđĭ hĭn boh tŭ dưn klei ngă bruă mơ̆ng dŭm anôk bruă knŭk kna, knơ̆ng bruă, êpul êya, grăp čô hlăm alŭ wăl.

Khua bruă kƀĭn ala Trần Thanh Mẫn lač, boh sĭt mơ̆ng lăn čar dôk mâo dŭm boh klei mjêč čiăng mgaih msir, mnuih ƀuôn sang dôk čang guôn leh anăn hmăng hmưi kơ dŭm hdră kčah mtrŭn mơ̆ng Đảng, knŭk kna. Hŏng ai tiê ană, Bruă Kƀĭn Ala srăng lŏ dơ̆ng mlih mrâo ktang phĭt, mđĭ hnơ̆ng tŭ jăk, boh tŭ dưn klei ngă bruă, msĕ hŏng klei bi êdah mơ̆ng Khua gĭt gai Đảng Tô Lâm hlăm klei kƀĭn trông ksiêm wĭt bruă knuă thŭn 2024, hluê ngă bruă klam thŭn 2025 mơ̆ng knŭk kna leh anăn bruă sang čư̆ êa alŭ wăl jing: wưng ară anei lăn čar mâo leh ai dưi, klei mĭn leh anăn klei gĭr čiăng mŭt hlăm ênun kpưn đĭ mơ̆ng djuê ana, grăp klei găl dôk truh hŏng drei, drei srăng kpăt mă, tơdah drei lui hĕ, drei srăng mâo klei soh hŏng hƀuê ênuk leh anăn hŏng mnuih ƀuôn sang./.