Blŭ pŏk klei bi kƀĭn, Khua bruă kƀĭn ala Trần Thanh Mẫn mñă klă, anei jing klei kƀĭn yuôm bhăn, mơ̆ng Êpul khua bruă Đảng Bruă Kƀĭn Ala leh anăn knŭk kna gĭt gai čiăng ksiêm dlăng dŭm mta bruă djŏ tuôm mprăp kơ klei kƀĭn êngao hdră gưl tal 9, Bruă Kƀĭn Ala gưl 15 (mkŏ mjing mơ̆ng hruê 12 -18/2/2025).

Khua Bruă Kƀĭn Ala mñă ktang, klei kƀĭn mkŏ mjing hlăm wưng gưl dlông leh anăn alŭ wăl dôk ksiêm wĭt Hdră mtrŭn mrô 18 mkŏ dăp mnuih mă bruă mơ̆ng gưl dlông truh kơ alŭ wăl, hlăm wưng mơak Đảng, mơak yan mnga Ất Tỵ 2025, Bi hdơr 95 thŭn hruê mkŏ mjing Đảng cộng sản Việt Nam. Hluê anăn, lu anôk bruă mơ̆ng knŭk kna, Bruă Kƀĭn Ala gĭr wăt hruê mlam, wăt knăm 6 leh anăn knăm 7 hŏng ai tiê bruă klam, bi mguôp kjăp čiăng ngă bruă klam kčah jao.

Khua Bruă Kƀĭn Ala brei thâo, Dhar Bruă Kƀĭn Ala ăt bi kƀĭn brei blŭ mguôp kơ hdră bhiăn Mkŏ mjing knŭk kna (mkra mlih), hdră bhiăn mkŏ mjing bruă sang čư̆ êa alŭ wăl (mkra mlih) leh anăn mprăp ba mdah dŭm hdră mtrŭn hlăm klei kƀĭn êngao hdră gưl tal 9. Dŭm mta phŭn anei mâo dhar Bruă Kƀĭn Ala bi tŭ ư. Khua bruă kƀĭn ala Trần Thanh Mẫn mñă klă:

“Ai tiê drei srăng lŏ mlih mrâo klei mĭn, hdră ngă, knăm kơ klei đĭ kyar lăn čar, mbĭt anăn bi lar klei hriăm, bruă klam, hdră ngă mơ̆ng dŭm klei kƀĭn giăm anei, boh nik jing gưl kƀĭn tal 7, 8 mơ̆ng Bruă Kƀĭn Ala gưl 15. Hlăm wưng êgao, dua tĭng bi mguôp jăk leh, ară anei drei srăng bi mguôp jăk hĭn, siă suôr hĭn, mâo bruă klam hĭn kyua klei đĭ kyar mơ̆ng lăn čar. Ti gŭ klei gĭt gai mơ̆ng Êpul khua bruă Đảng gưl dlông, phŭn bruă Kđi čar, Êpul khua bruă Đảng leh anăn Khua gĭt gai Đảng Tô Lâm mâo lu blư̆ lač, bruă bi mguôp plah wah knŭk kna leh anăn Bruă Kƀĭn Ala srăng mkŏ mjing klei sa ai čiăng ruh mgaih klei kpăk, klei dleh dlan êjai mđĭ kyar bruă duh mkra ala ƀuôn, răng mgang klei êđăp ênang leh anăn mkŏ mjing bruă kđi čar.”

Khua Bruă Kƀĭn Ala hưn, dŭm mta phŭn klei kƀĭn êngao hdră gưl tal 9, yap truh kơ ară anei, dua tĭng dưi bi tŭ ư dŭm mta phŭn mâo: ksiêm dlăng, bi klă 4 hdră bhiăn, 5 hdră mtrŭn đru kơ bruă mkŏ dăp, bi ênŭm klei kiă kriê, hdră ngă bruă mơ̆ng dŭm anôk bruă, êpul bruă kđi čar, ksiêm dlăng bi klă 4 mta phŭn mkăn hlăm klei dưi, hlăm anăn mâo mta phŭn kơ mnuih mă bruă, mbĭt anăn mâo klei hưn mdah Bruă Kƀĭn Ala hluê si klei čuăn.

Blŭ hlăm klei kƀĭn, Khua knŭk kna Phạm Minh Chính bi myuôm leh anăn lač jăk kyua klei bi mguôp plah wah Bruă Kƀĭn Ala, dhar bruă Bruă Kƀĭn Ala, phung khua hlăm Bruă Kƀĭn Ala, khua kiă kriê dŭm dhar bruă Bruă Kƀĭn Ala hŏng knŭk kna, ƀrư̆ hruê ƀrư̆ đăo knang, bi mguôp kjăp, tŭ dưn čiăng ngă lu mta bruă, boh nik jing ngă jăk leh anăn tŭ dưn dŭm klei čuăn mơ̆ng Đảng leh anăn knŭk kna hlăm bruă knuă mơ̆ng Bruă Kƀĭn Ala ăt msĕ mơh knŭk kna.

Khua knŭk kna Phạm Minh Chính mñă klă, mta kñăm mâo mơ̆ng Êpul khua bruă Đảng gưl dlông, Phŭn bruă kđi čar, Êpul khua bruă Đảng, klei gĭt gai mơ̆ng Khua gĭt gai Đảng Tô Lâm dua nah bi mguôp kjăp, mă bruă hlăm wưng bhiâo, tŭ dưn ƀiădah ăt kjăp djŏ hdră bhiăn.

Drei bi kƀĭn hlăm klei kƀĭn êngao hdră gưl tal 9, bi êdah ai tiê mâo bruă mă, mâo boh klei mgaih msir. Drei srăng ngă, srăng mgaih msir truh knhal tuč, mâo boh tŭ dưn. Lŏ dlăng kơ dŭm klei kƀĭn êngao hdră găl guôp hŏng boh sĭt, mgaih msir boh klei mơ̆ng mnuih ƀuôn sang. Mta kñăm anei mơ̆ng Đảng mdưm, drei bi khuăt mnuih mă bruă hluê hdră mtrŭn mrô 18, anei jing hdră bruă prŏng. Phung ngă bruă khuăt hĭn, hnơ̆ng tŭ jăk hĭn. Êjai drei ba mdah dŭm klei anei, hluê ngă hdră mtrŭn mơ̆ng gưl dlông, mơ̆ng Phŭn bruă kđi čar, dŭm klei bi klă mơ̆ng Đảng, srăng kpăk hŏng dŭm klei čuăn mơ̆ng hdră bhiăn lăn čar, ƀiădah dŭm klei čuăl hluê klei hđăp. Ai tiê mơ̆ng gưl dlông, Phŭn bruă kđi čar ti anôk kpăk mkra tinăn, ti gưl kpăk, gưl anăn srăng mkra mlih”.

Mñă ktang klei bi kƀĭn êngao hdră gưl tal 9 mâo mta phŭn yuôm bhăn, dleh, ƀiădah kyua klei đĭ kyar lăn čar, Khua bruă kƀĭn ala Trần Thanh Mẫn mñă kơ dŭm tĭng djŏ tuôm čiăng kñăm jih ai dưi, bi mguôp kjăp, mjêč bi leh dŭm mta bruă mprăp kơ mta phŭn hưn mdah hŏng Bruă Kƀĭn Ala ăt msĕ mơh rơ̆ng kơ klei êđăp ênang, đru hlăm klei tŭ jing mơ̆ng gưl kƀĭn.