Ti anôk bi kƀĭn tal 4, Êpul Gơ̆ng Bruă ƀuôn sang Kontum gưl 12 (2021 – 2026), ksiêm wĭt boh tŭ dưn hlue ngă bruă thŭn 2022 brei thâo, lu ênoh čuăn kčah amâo mâo dưi bi leh ôh. Msĕ si, thŭn 2022 klei đĭ kyar kơ jih jang mnơ̆ng dhơ̆ng mâo čar Kontum knŏng djăp 9,5% mkă hŏng thŭn 2021. Kah knar kơ grăp čô mnuih đĭ giăm 47 êklăk prăk truh 52 êklăk prăk. Ba wĭt ngăn prăk kơ knŭk kna hlăm brô 4 êbâo êklai prăk, jing djăp leh hŏng ênoh kčah jao. Hlăm thŭn čar Kontum mâo truh 19 hdră ngă bruă mâo prăk duh bi liê jih jang hlăm brô 1 êbâo 600 êklai prăk.

Mbĭt hŏng boh tŭ dưn leh mâo, mâo 4 ênoh čuăn yuôm bhăn čar Kontum amâo mâo dưi bi leh ôh hŏng hdră kčah jing: Klei đĭ kyar mnơ̆ng dhơ̆ng mâo amâo mâo djăp ôh hŏng hdră kčah brei đĭ mơ̆ng 10% kơ dlông, bi liê ngăn prăk kơ alŭ wăl, prăk duh bi liê bruă knŭk kna, lehanăn bruă mkŏ mkra krĭng ƀuôn sang mrâo ăt kăn dưi djăp rei. Mbĭt hŏng anăn bruă mđĭ mlih hdră ngă bruă, bi mlih kơ klei duh bi liê, mđĭ ai dưi bi ktưn mơ̆ng čar ka ƀuh klei bi mlih klă mngač ôh, bruă čiu hnô ruh mgaih anôk ala mơ̆ng dŭm bruă rŭ mkra prŏng adôk êmưt, klei iêo jak phung duh bi liê adôk kƀah... Blŭ ti anôk bi kƀĭn, Dương Văn Trang, Khua bruă Đảng čar Kontum mtă kơ phung bi ala ngă bi mngač hĭn djăp mta bruă adôk awăt, lehanăn mâo hdră ruh mgaih bi pral:“Phung bi ala mđing trông čhai, hlak mblang, dưi ƀuh klă mngač dŭm klei dleh dlan, klei gun kpăk, klei awăt êdu, lehanăn phŭn agha mơ̆ng jih klei anăn, kñăm čiăng mâo hdră êlan mghaih msir bi djŏ jih jang mta kñăm, bruă čuăn kơ klei mđĭ kyar bruă duh mkra ala ƀuôn, bruă ngăn prăk, klei duh bi liê kơ thŭn 2023”.

Ti anôk bi kƀĭn anei, Êpul Gơ̆ng bruă ƀuôn sang čar Kontum tal 5, gưl 10, wưng thŭn 2021 – 2026, mâo lu snăk klei awăt kƀah, hmăi amâo mâo jăk prŏng êdi hŏng klei duh mkra ala ƀuôn lehanăn klei hdĭp mda phung ƀuôn sang čar Kontum.

Ăt hlăm hrue kăm êgao, ti anôk bi kƀĭn tal 5, Êpul Gơ̆ng bruă ƀuôn sang čar Daklak gưl 10, wưng păn bruă 2021 – 2026, mâo lu snăk bruă ktrŏ klei kơ ngăn prăk duh bi liê, bruă mkŏ mkra krĭng pla mjing mâo mrô krĭng pioh kơ bruă čhĭ mnia boh mnga kơ ala tač êngao, mjing bruă knuă mă kơ hlăk ai... mâo bi êdah leh.

Ksiêm wĭt klei hlue ngă bruă čuăn thŭn 2022, phung bi ala lač, klei duh mkra ala ƀuôn ti čar Daklak thŭn anei mâo leh lu klei mngač tač hĭn. Khă snăn, prăk mâo duh bi liê kơ bruă knŭk kna adôk kƀah knŏng mil 29,5%, mbĭt anăn klei bi mlih, thiăm mbŏ kơ lu mta bruă, hnơ̆ng kjăp bruă knuă ka hơĭt ôh, hmăi leh amâo mâo jăk ôh hŏng klei mnuih ƀuôn sang đăo knang, lehanăn hŏng bruă čiăng kơrŭ wĭt bruă duh mkra leh klei ruă tưp Covid 19. Kyuanăn, pô bi ala Tô Thị Tâm, kdriêk Êa Kar, čang hmăng: Klei duh mkra kơ dŭm mta bruă prŏng brei bi mâo hnơ̆ng kjăp. Mâo lu bruă ngă dơ̆ng mơ̆ng akŏ thŭn truh kơ ară anei ka leh mơh. Lehanăn hnơ̆ng kjăp tuôm hŏng klei mnuih ƀuôn sang mđing kyua mâo dưn yua mơ̆ng jih bruă anăn, digơ̆ mơak kyua mâo leh hdră êlan duh bi liê djŏ guôp”.

Hŏng bruă lŏ hma, phung bi ala Êpul Gơ̆ng bruă ƀuôn sang čar Daklak akâo bi mâo lu klei bhiăn, hdră êlan mă bruă bi klă mngač, kñăm čiăng dưi đru kơ mnuih ngă lŏ hma dưi mđĭ kyar bruă lŏ hma hŏng kdrăp mrâo mrang, năng bi mâo nanao klei bi mguôp hŏng phung duh mkra lehanăn mnuih ƀuôn sang. Mbĭt hŏng anăn, bi mâo hdră êlan čuăl mkă klă mngač, mkŏ mjing mrô knăl krĭng pla mjing boh kroh, boh nik hŏng boh durian, kñăm čiăng kơ jih jang mnuih amâo mâo bi kluh pla mjing boh anei ôh, huĭdah lŏ lĕ hlăm klei pla lehanăn rŭ, rŭ lehanăn pla tơdah tuôm hŏng klei čhĭ boh mnga amâo lŏ yuôm, boh mnga mâo lu hĭn kơ ênoh čiăng blei. Pô bi ala Lại Thị Loan Khua êpul hgŭm bruă lŏ hma čar Daklak lač:“Hŏng hdră kñăm amâo lŏ pŏk phai ôh ênhă pla mjing đang boh durian, ƀiădah mđing kơ hnơ̆ng kjăp lehanăn jăk đang boh durian, snăn drei tui duah hdră êlan mă bruă kjăp, si srăng čuă mkă klă mngač, dah phưi tha huĭdah phung ƀuôn sang duah pla mjing tui si čiăng, bi rŭ ana kphê lehanăn pla ana boh durian. Tui si mâo klei bi tĭng knăl phung truăn kơ bruă lač, knŏng adôk 5 thŭn đuič mâo China kăp blei snăn bruă pla mjing lehanăn čhĭ mnia srăng prŏng”.

Lehanăn phung bi ala bi êdah mơh lu bruă hlăk ktro hlăm čar daklak, msĕ si mghaih msir bruă knuă mă wĭt mơ̆ng dŭm boh čar nah dhŭng kyua hmăi mơ̆ng klei prăk luič ênoh, luič bruă knuă mă, klei lŏ bi dăp wĭt mnuih ngă bruă hlăm dŭm anôk bruă knŭk kna ti gưl kdriêk, mkŏ mjing hdră êlan, klei đru mdul kơ knuă druh mnuih ngă bruă hlăm nah gŭ, mđĭ ênoh hrui wĭt, klei hdĭp kơ phung nai mtô čiăng bi hơĭt ai tiê mtô bi hriăm.

Ăt hlăm hrue kăm êgao, klei bi kƀĭn tal 23, Êpul khua kiă kriê Êpul gơ̆ng bruă ƀuôn sang čar Daknông gưl 4, mâo trông čhai leh, ksiêm dlăng, bi mklă dŭm hră mtrŭn, klei čih mkra hdră mtrŭn ba mdah ti anôk bi kƀĭn tal 5, Êpul Gơ̆ng bruă ƀuôn sang čar gưl 4, wưng thŭn 2021 – 2026. Hlăm anăn, mâo leh lu hră mơar, klei čih mkra mâo phung bi ala mđing êdi, đru mguôp leh klei blŭ năng brei mâo klei mđing hlue ngă bi jăk./.