5 thŭn êgao, hdră bi lông ktưn khăp kơ ala čar ti Gia Lai mâo leh lu klei tŭ dưn jăk, đĭ kyar bruă duh mkra kah knar giăm 7%/thŭn; Bruă lĭng kahan - klei êđăp ênang dưi krơ̆ng kjăp, wăl hdĭp mda bi liê, mnia blei lŏ dơ̆ng mđĭ. Phung êdah êdi kah mbha klei thâo, hdră msir mbruă, hlăm anăn êdah êdi msĕ si: Lĭng kahan răng mgang knông lăn čar hŏng hdră “Đru kơ adei nao sang hră, đru kơ gŏ êsei ƀun ti krĭng knông lăn”, klei mĭn mbruă ba yua hdră mnêč mrâo hlăm klei ksiêm mkă mdrao mgŭn ti Sang êa drao mdrao Ală Gia Lai; klei yăl dliê amai H’Uyên Niê (ƀuôn hgŭm Ia Ly) hŏng gru hmô hiu čhưn ênguê mguôp hŏng bruă pơ̆k mñam kdrăp djuê ana, mjing bruă duh ƀơ̆ng kơ mnuih djuê ƀiă…

Hlăm wưng 2025–2030, hdră bi lông ktưn khăp kơ ala čar mơ̆ng čar Gia Lai srăng kƀĭn hlăm 4 êpul bruă phŭn. Anăn jing: lŏ dơ̆ng mkŏ mjing Đảng leh anăn bruă kđi čar khuăt, ngă bruă tŭ dưn; mđĭ kyar bruă duh mkra mtah, bruă lŏ hma yua kdrăp mrâo, tuh tia mkra mjing leh anăn êa pui êwa čuh mkra mjing; mđĭ kyar dhar kreh ala ƀuôn, mbĭt anăn krơ̆ng kjăp klei êđăp ênang leh anăn pŏk mlar klei bi hgŭm hŏng tač êngao, boh nik hŏng dŭm čar Dhŭng Lao leh anăn Ngŏ Dưr Campuchia.