Ti anôk ngă bruă XL02, hdră kdrêč tal 3, kdrêč găn ƀuôn prŏng Tân Tiến leh anăn Bụ Bổn čar Dak Lak, dŭm pluh boh êdeh slu, êbeh ben, mai lang gŭ drŏng mbĭt hŏng êbeh 30 čô mă bruă, kỹ sư mơ̆ng Knơ̆ng bruă rŭ mjing Tân Nam dôk lang gŭ drŏn gưl tal 2 ƀô̆ êlan. Cao Văn Hoành, sa čô mă bruă lang lŭ drŏng mơ̆ng knơ̆ng bruă brei thâo, mkrah thŭn êgao, ñu knŏng wĭt kơ sang sa blư̆, bi adôk ñu mâo ƀô̆ mta mkra êlan êlan. Cao Văn Hoành, brei thâo:

 “Kâo mă bruă tinei mâo 6 mlan leh, ayŏng adei hlăm êpul lang gŭ drŏng dôk lang gưl tal 1 leh anăn tal 2. Hmei knŏng mdei êjai mâo hjan hlĭm, bi dôk hmei mă jih.”

Phan Xuân Phú, Khua êpul ngă bruă rŭ mjing mrô 02 ( hdră kdrêč tal 3, knơ̆ng bruă rŭ mjing Tân Nam brei thâo, ênoh kdrêč bruă hlăm brô 1.200 êklai prăk, mâo boh taih 15km, găn dŭm ƀuôn hgŭm Tân Tiến, Vụ Bổn leh anăn Ea Knếc, čar Dak Lak. Ară anei klei ngă bruă êmưt hŏng hdră kčah, kyuanăn knơ̆ng bruă tiŏ nao 120 êdeh êdâo, mbĭt hŏng 200 čô mă bruă. Kỹ sư ngă bruă 24/24h bi mbha jing lu mmông mă bruă, mă wăt dŭm hruê mdei leh anăn bi pral klei ngă bruă. Dŭm mta bruă rŭ mdơ̆ng mâo lang gŭ drŏng gưl 1, gưl 2, rŭ mjing êlan mnuih ƀuôn sang găn, êlan ti djiêo, mbĭt anăn knơ̆ng bruă ăt mâo hdră mđĭ ai, đru kơ mnuih mă bruă.

 “Ayŏng adei knơ̆ng bruă mă wăt hruê mdei 3 gưl 4 mmông, leh anăn klei mđĭ ai, prăk mlan mâo knơ̆ng bruă tla djŏ hluê si klei čuăn.

Ti hdră kdrêč tal 2 mơ̆ng Phŭn bruă mkŏ mkra jing pô duh bi liê găn dŭm ƀuôn hgŭm Krông Ă, Yang Mao leh anăn čư̆ Pui, ai êwa mă bruă ăt hơ̆k mơak. Nguyễn Đình Cường, kỹ sư mơ̆ng Êpul grŭp Đạt Phương, anôk bruă klam ngă hdră XL03 hŏng 3 bĭt kban leh anăn sa ƀăng mur taih 2km găn ƀuôn hgŭm Čư̆ Pui, čar Dak Lak brei thâo, anei jing hdră bruă găn alŭ wăl dleh leh anăn dleh dlan hĭn. Grăp hruê knơ̆ng bruă dôk dăp dŭm êtuh čô mă bruă mbĭt hŏng lu êdeh êdâo, masin mă bruă rŭ mdơ̆ng kban leh anăn ƀăng mur.

 “Ară anei 100 čô dôk tuh ƀêtông ƀô̆ kban ti Km64 kdrêč găn ƀuôn hgŭm Čư̆ Pui, hlăm brô 200 čô mkăn dôk mbha jing 2 êpul ngă bruă tuh kmeh kban. Hmei gĭr mă wăt hruê mdei čiăng truh kơ hruê 30/6/2026 srăng bi leh dŭm kban leh anăn ƀăng mur.”

Phạm Văn Hoà – K’iăng khua kiă kriê êpul kdriê dlăng hdră mkŏ mjing hdră mkŏ mkra bruă lŏ hma leh anăn êlan klông čar Khánh Hoà hưn, ară anei klei kpăk kơ bruă ruh mgaih anôk ala ti hdră kdrêč gưl 1 găn čar Khánh Hoà jing pô duh bi liê dưi ruh mgaih. Anôk bruă dôk gĭt gai phung ngă bruă dăp jih ai dưi, êdeh êdâo, masin mbĭt hŏng phung mă bruă čiăng bi mbŏ kyua klei êmưt wăt hlăm yan adiê amâo mâo jăk.

 “Dleh dlan hĭn jing ruh mgaih anôk ala, ƀiădah mkra hlăm yan hjan srăng dleh dlan leh anăn bi găl guôp. Phung mă bruă yua dŭm hdră êlan brei mđoh mđuĕ êa khăt čiăng thu êa lŏ dơ̆ng mă bruă. Ai tiê găn mđiă, dưi hŏng hjan mâo phung ayŏng adei gĭr čiăng ngă bruă djŏ hdră kčah.”

Trương Công Thái, K’iăng khua bruă sang čư̆ êa čar Dak lak mñă klă wăt kơ klei ngă bruă kdrêč 3 knŏng mrâo mâo mă 80%, jing êmưt hlăm brô 20%, ƀiădah hŏng ai tiê mă bruă mjêč, amâo mâo hruê mdei, mta kñăm mkra leh hlăm thŭn 2025 srăng dưi ngă. Trương Công Thái brei thâo:

 “Dak Lak dôk mŭt hlăm yan hjan, hmei gĭt gai phung mă bruă mkŏ mjing hdră êlan lang gŭ drŏng êjai adiê không, tơdah hjan srăng tuh gơ̆ng gang, bêtông mbha grông êlan leh anăn êlan nah djiêo. Hŏng klei gĭr, hmei ƀuăn srăng bi leh hlăm knhal jih thŭn 2025”

Hŏng klei gĭr mơ̆ng phung duh bi liê leh anăn phung ngă bruă, êlan dơ̆ng pral tal êlâo mkŏ dliê hŏng êa ksĭ ti Dhŭng kwar krah srăng bi leh hlăm thŭn 2027, pŏk klei găl mđĭ kyar bruă duh mkra ala ƀuôn, nao mbĭt hŏng bruă lĭng kahan, klei êđăp ênang hlăm wưng mrâo bi mŭt mbĭt.