Ti lu sang hră prŏng msĕ si Sang hră Mtô hi hriăm, Lý Thường Kiệt, Hai Bà Trưng... ti čar Dak Lak, hnơ̆ng phung tue leh anăn hđeh sang hră nao blei mnơ̆ng đĭ lu, boh nik hlăm mmông mmăt leh anăn knhal jih hruê kăm. Dŭm mta hdruôm hră akŏ gưl hriăm msĕ si adŭ 1, adŭ 6 leh anăn adŭ 10 dôk nanao hlăm êpul čhĭ lu hĭn. Sa cô amĭ ama hđeh sang hră ti ƀuôn hgŭm Tân Lợi brei thâo:

"Dŭm mta hdruôm hră tinei lu snăk, lu jơr hŏng lu hdruôm hră, mơ̆ng hdruôm hră mtô bi hriăm truh kơ hdruôm hră lŏ mbŏ thiăm. Ênoh ăt djŏ guôp. Kâo knŏng dưm hlăm anăn sang hră brei blei snăn phung mă bruă srăng mă jih leh anăn pral, găl ênưih."

Čiăng rơ̆ng mkăp kơ anôk ba čhĭ, Knơng bruă hdruôm hră leh anăn kdrăp mnơ̆ng sang hră Dak Lak blei leh êbeh 4 êklăk hdruôm hră (bi knar hŏng 45 êklai prăk), êbeh 1 êklăk prăk hdruôm mơar (giăm 4 êklai prăk) leh anăn hlăm brô 25 êklai prăk kơ adŭ čhĭ mnơ̆ng hriăm hră, kdrăp mnơ̆ng hriăm hră. Tưởng Văn Băng - Khua knơ̆ng bruă bi mklă:

“Knơ̆ng bruă duh djăp ênŭm kơ jig jang hđeh sang hră. Hmei rơ̆ng amâo kƀah ôh hdruôm hră, kdrăp mnơ̆ng hriăm hră leh anăn mnơ̆ng mtô bi hriam kơ hđeh sang hră hlăm thŭn hriăm mrâo."

Mbĭt hŏng anôk čhĭ hdruôm hră, kdrăp čŭt hơô hđeh sang hră ti ƀuôn hgŭm Ƀuôn Ma Thuôt leh anăn lu ƀuôn hgŭm,să mprăp leh mnơ̆ng dhơ̆ng mơ̆ng hnưm, lu jơr, djŏ guôp hŏng grăp čô. Amai Nguyễn Thị Mỹ Trang, sa čô amĭ ama hđeh sang hră ti ƀuôn hgŭm Thành Nhất brei thâo: Ênoh mnơ̆ng dhơ̆ng thŭn anei hơĭt, mơ̆ng 180 êbâo truh 350 êbâo prăk/ hlâo: kdrăp čut hơô mjuăt asei mlei hlăm brô 80 êbâo-200 êbâo prăk/hlâo. Ñu srăng blei čhum ao kčoh leh hrô kơ kčoh msĕ si êlâo, mkiêt mkriêm leh anăn lu jơr hĭn.

"Kâo atăt dua čô anak nao blei čhum ao, ti sang čhĭ mnơ̆ng mâo leh lu mta čhum ao sang hră kyua anăn găl ênưih. Lu jơr mơ̆ng ao, mơiêng truh kơ mnal, ênoh ênil djŏ guôp".

Năng mđing, thŭn anei dŭm mta mnơ̆ng dhơ̆ng duh kơ thŭn hriăm mrâo mâo phŭn agha hlăm ala čar mâo 70-80%. Dŭm anăn knăl Việt mâo lu klei bi mlib kơ hnơ̆ng, ênoh ênil, mâo amĭ ama đaŏ knang blei. Anei ăt jing klei bi mklă kơ boh tŭ tưn mơ̆ng klei mtrĭt jhar "Mnuih Việt Nam yua mnơ̆ng Việt Nam. Phạm Thị Kim Anh- Khua sang čhĭ čhum ao nao sang hră Bi Phạm, ƀuôn hgŭm Ƀuôn Ama Thuôt, čar Dak Lak brei thâo:

"Hlăm yan nao sang hră, sang čhĭ mnơ̆ng pŏk ƀăng mơ̆ng 6h aguah duh kơ phung amĭ ama blei. Mnơ̆ng dhơ̆ng mâo mkra mjing ti ala čar, rơ̆ng lu, jăk. Hmei mđing kơ êlan kčoh, mnal kơ hđeh sang hră hơô jăk hĭn."

Hŏng klei mprăp jăk mơ̆ng dŭm anôk bruă čhic hdruôm hră, čhĭ čhum ao leh anăn dŭm anôk čhĭ mkăn, phung amĭ ama leh anăn hđeh sang hră Dak Lak srăng hơĭt ai tiê ti anăp thŭn hriăm mrâo.