Dŭm hruê knăm mơak mphŭn mkŏ mjing ala čar, Hdră mđung asăp blŭ Mơ̆ng Sang mđung asăp blŭ Việt Nam mơak mñai hŏng ênai ktưn hưn, hlai hlăm ai êwa 80 thŭn klei êngiê ala čar. Ti Lăn Dap Kngư, mbĭt hŏng dŭm hdră mđung ala čar, mnuih ƀuôn sang mơak tơdah hmư̆ ênai jăk mơak mơ̆ng ƀuôn sang pô, klei mmuñ, ênai čing čar hlai hlăm klei mơak drông knăm mơak leh anăn klei čang hmăng kơ êdei anăp. Nghệ sỹ nhân dân Y San Aliô, ti ƀuôn Niêng,să Ea Nuôl, čar Dak Lak brei thâo:

 “Hlăk đưm tơdah nao ti anôk amâodah mâo gưl nao mdah kbưi, kâo khăng ba radio điêt čiăng hmư̆ asăp mđung FM, khăp snăk, kâo khăng hmư̆ nanao. Ară anei snăn ƀrư̆ mrâo mrang, dưi hmư̆ hlăm internet, wifi, knư̆ găl ênưih hĭn lu. Amâo djŏ knŏng klei Êđê ôh ƀiădah klei  Mnông, Jarai, klei Ăngle, klei Prăng kâo ăt khăng hmư̆ mơh. Kyua kâo jing sa čô thơ̆ng kdŏ, tơdah hmư̆ hdră mđung boh nik kơ ênhiang mmuñ kâo mâo lu thiăm klei kdŏ mmuñ čiăng ba yua klei jăk siam , klei mrâo hlăm ênhiang mmuñ dŭm ala čar”.

Mơ̆ng thŭn 1993, Sang mđung asăp blŭ Việt Nam mkŏ mjing Anôk bruă dôk jưh ti Lăn Dap Kngư, mkra mjing leh anăn mđung hlăm hdră mđung mnuih djuê ƀiă. Ară anei, Sang mđung asăp blŭ mđung 6 klei blŭ djuê ƀiă mâo Êđê, M’nông, Jarai, Kơ Ho, Ba Na, Xơ Đăng.  Anei jing hdră mđung mưng leh, đru kơ mnuih ƀuôn sang mâo thiăm klei thâo mkra mjing, ba yua gru hmô mrâo, mbĭt anăn hmư̆ ênhiang mmuñ djuê ana, klei yăl dliê đưm, dhar kreh djuê ana hŏng asăp blŭ djuê ana pô. Amai H’Thêl, ti bon Sar Pa, să Thuận An, čar Lâm Đồng brei thâo:

 “Gŏ sang kâo mâo klei mưng hmư̆ hdră mđung asăp mơ̆ng sui leh, amĭ ama kâo khăng hmư̆ anăn kâo ăt hmư̆ mơh, ară anei kâo khăng dlăng hlăm đĭng blŭ thâo mĭn anăn găl ênưih snăk, djăp anôk nao kâo pŏk đĭng blŭ thâo mĭn, dlăng hlăm facebook, kâo khăp snăk hmư̆ klei yăl dliê đưm hŏng klei Mnông. Hmư̆ hdră mđung thâo lu klei mrâo, klei jăk, boh nik hmư̆ klei blŭ amĭ kkiêng, kâo čang hmăng klei blŭ Mnông hlăm Sang mđung asăp blŭ Việt Nam mâo lu kdrêč jăk hâo hưn kơ mnuih ƀuôn sang, čiăng kơ mnuih ƀuôn sang hmư̆ leh anăn hrăm mbĭt kriê pioh klei jăk siam dhar kreh pô.”

Jing anôk bruă klei mrâo gưl dlông ti krĭng wăl, êngao kơ klei hâo hưn, lač kơ djăp mta bruă hlăm klei duh mkra, kđi čar, ala ƀuôn hŏng klei mrâo lu mta, VOV Lăn dap Kngư lŏ gĭr mă asăp klei tông čing, ênhiang mmuñ djuê ana, kdrăp tông ayŭ, klei yăl dliê đưm, ksiêm hriăm klei kreh knhâo duh kơ hdră mblang leh anăn mđung asăp blŭ djuê ana. Kyua anăn, dŭm hdră mđung mơ̆ng Sang mđung asăp ƀrư̆ jĕ giăm, lač kơ ai êwa ƀuôn sang, kơrŭ wĭt klei thâo răng mgang leh anăn mđĭ lar ênoh yuôm djuê ana.

Nghệ sỹ ưu tú Y Phôn Ksơr, ti ƀuôn hgŭm Ƀuôn Ama Thuôt, čar Dak Lak brei thâo:

 “Tơdah hmư̆ Hdră mđung asăp blŭ Việt Nam ti Lăn Dap Kngư, kâo ƀuh brei lŏ hiu duah, mă asăp jih jang phung mbruă hlăm ƀuôn sang, anăn jing mngăt êwa klei mmuñ, dhar kreh, tơdah luč hĕ snăn ênguôt snăk”.

Leh 80 tŭn đĭ kyar, Sang mđung asăp blŭ Việt Nam klă sĭt jing anôk mkŏ, lar bra ênoh yuôm dhar kreh mơ̆ng ƀuôn sang truh kơ ala čar. Hjăn VOV Lăn dap Kngư, leh 32 thŭn ngă bruă, bi mklă leh bruă klam yuôm bhăn hlăm klei kriê pioh klei bŭ, knhuah djuê ana. K’iăng nai prŏng nai prĭn Buôn Krông Tuyết Nhung, Sang hră gưl prŏng Lăn Dap Kngư, brei thâo:

 “ Hlue si kâo thâo, mbĭt hŏng klei jing sa čô mnuih Êđê, êbeh 75% boh phŭn mơ̆ng VOV mđung mđĭ lar klei tŭ dưn, hmăi êlam kơ klei mnuih ƀuôn sang thâo săng, boh nik bruă djŏ tuôm kơ klei hdĭp mda dhar kreh aguah tlam, hlăm anăn mâo mđĭ lar dhar kreh mnuih tinei mtam. Mơ̆ng klei hâo hưn hŏng klei blŭ djuê ana, djŏ tuôm kơ dŭm akŏ mơ̆ng VOV, mnuih ƀuôn sang ƀrư̆ dưi mđĭ hnơ̆ng hdĭp pô hlăm klei tŭ mă hdră êlan, hdră mtrŭn.”

Hlue si Nguyễn Đình Trung, Khua dlăng bruă Đảng čar Dak Lak, 6 hdră mđung klei blŭ djuê biă dôk mđung jing sa klei ktang mơ̆ng VOV Lăn Dap Kngư. Dŭm hdră mđung lŏ dơ̆ng mlih mrâo, mđĭ hâo hưn mtô mblang kơ hdră êlan djuê ana, kơ dŭm hdră knăm ala čar dôk ngă leh anăn srăng mâo čar pŏk ngă. Mơ̆ng anăn đru kơ mnuih ƀuôn sang mđĭ klei bi hgŭm, kriê pioh leh anăn mđĭ lar knhuah gru dhar kreh, mkŏ mjing ƀuôn sang leh anăn čar ƀrư̆ mdrŏng sah.

 “Mbĭt hŏng kluôm ala, Dak Lak dôk mŭt hlăm wưng đĭ kyar mrâo. Kâo čang hmăng êpul ngă bruă klei mrâo sang mđung asăp blŭ Việt Nam ti Lăn Dap Kngư srăng lŏ dơ̆ng mđĭ klei thâo kđi čar, mđĭ lar klei thâo bruă klei mrâo hâo hưn yuôm bhăn, phŭn mơ̆ng Đảng, Knŭk kna, lŏ dơ̆ng mâo lu klei đru mguôp hlăm hdră mkŏ mjing, mđĭ kyar čar Dak Lak leh anăn krĭng wăl.”

80 thŭn êgao, asăp blŭ Việt Nam dưi mkŏ ƀuôn sang hŏng lăn čar, kriê pioh leh anăn bi lar knhuah gru dhar kreh dŭm djuê ana Lăn Dap Kngư. Mŭt hlăm wưng mrâo, anôk bruă lŏ dơ̆ng bi lar bruă klam nao êlâo, hâo hưn klei mrâo phŭn, hrăm mbĭt hŏng êpul êya dŭm djuê ana hlăm bruă kriê pioh dhar kreh leh anăn đĭ kyar hơĭt kjăp./.