Ba klei kreh knhâo, mrâo mrang wĭt kơ ƀuôn sang ti Kon Tum

VOV4.Êđê - Thŭn 2022 mâo sa klei mlih mrâo năng mơak hlăm bruă mkra mjing ti dŭm alŭ, ƀuôn mnuih djuê ƀiă ti čar Kon Tum anăn jing bruă ba yua kreh knhâo, hdră mnêč hlăm bruă mkra mjing. Mơ̆ng hdra anei, phung mda asei mnuih djuê ƀiă hlăm čar păn kjăp, tŭ mă ba yua hlăm bruă mkra mjing mâo klei tŭ dưn.

 

Êpul hgŭm bruă Mnga, djam – bruă hiu čhưn ênguê leh anăn phung hđeh êdam êra ti wăl krah Măng Đen, kdriêk Kon Plông, čar Kon Tum, čar Kon Tum, mâo lu phung mda asei mnuih djuê ana Sơdang nao hgŭm mă bruă. Leh dŭm klei ka jăk thâo hlăm phŭn kčưm, A Quả, 18 thŭn, ti ƀuôn Tu Cần, să Hiếu, dưi kčưm ñu kma hŏng bruă mă. Mbĭt hŏng hnư prăk hrui wĭt rơ̆ng kơ klei hdĭp pô leh anăn đru kơ amĭ ama, A Quả brei thâo, pô lŏ dưi mâo lu klei hrăm hlăm bruă mkra mjing bruă lŏ hma doh leh anăn dưn yua kdrăp mrâo mrang hlăm klei mă bruă: “Sa hruê kâo mă bruă, tal êlâo srăng mă đĭng blŭ leh anăn pŏk app dlăng hruê mă bruă. Aguah ưm hlăm brô 7 mmông srăng hrăm mbĭt hŏng phung ayŏng amai kƀĭn 30 mnĭt bi trông hŏng grăp čô kčưm kơ bruă mă hruê anăn. Kâo ƀuh hdră čiăng dưi mkra mjing dŭm mta mnơ̆ng dhơ̆ng doh, mtah, siam”.

Mơ̆ng bruă nao hgŭm hlăm klei mă bruă mơ̆ng Êpul hgŭm bruă, anôk bruă mkra mjing mbĭt hŏng dŭm hdră bruă, hdră ba jao klei kreh knhâo, hdră mnêč mơ̆ng bruă sang čư êa, dhar bruă djŏ tuôm, lu phung mnuih mă bruă jing mnuih djuê ƀiă ti dŭ alŭ ƀuôn hlăm čar Kon Tum dưi rơ̆ng kjăp klei thâo dưn yua hlăm bruă mkra mjing, rông mnơ̆ng. Hlăm dŭm kdriêk msĕ si: Kon Plông, Tu Mơ Rông Đăk Glei…mnuih ƀuôn sang čŏng rah mjeh kphê krĭng êăt, thâo mđĭ lar mjeh sâm hruê̆, rah mjeh Sâm Ngọc Linh čiăng mđĭ kyar ênhă pla mjing gŏ sang. Hnêč dŭm hruê mdei knhal jih thŭn, ayŏng A sỹ, ti alŭ Wang Hra, să Đăk Ui, kdriêk Đăk Hà mdưm kdrăp krih êa dơr gŭ lăn leh anăn mkiêt kriêm êa ti đang pla mjing mơ̆ng gŏ sang, mprăp kơ yan bhang kƀah êa. A Sỹ brei thâo, kyua čŏng blei mnơ̆ng mkra mjing, čŏng mdưm mă, anăn yơh ênoh jing êlưih hĭn: “Kâo kreh nao mă bruă mưn, mdưm kdrăo čŏng krih êa leh anăn mkiêt mkriêm êa kơ sang ayŏng Hoà. Mă nanao hlŏng mưng hĕ. Mdưm kdrăp kriê êa anei, ana kyâo pô pla mjing amâo lŏ hŭi kơ yan mbhang ôh”.

Mbĭt hŏng klei nao hgŭm hlăm dŭm adŭ mtô bruă mă, dŭm gưl hriăm ba jao kdrăp kreh knhâo, hdră mñêč, bruă mă phŭn ti dŭm êpul hgŭm bruă, anôk bruă mkra mjing, mnia mblei jing êlan giăm hĭn čiăng kơ mnuih mă bruă mnuih djuê ƀiă ti čar Kon Tum dưi tui hriăm leh anăn ba klei kreh knhâo, hdră mnêč, klei mrâo mrang wĭt kơ ƀuôn sang. Êdah êdi msĕ si bruă mkra mjing bruă lŏ hma doh mơ̆ng phung mda asei mnuih djuê ana Sơdăng ti kdriêk Kon Plông, klei bi hmô rông ŭn doh hŏng 17 nao hgŭm jing mnuih Jrai leh anăn Thái ti să Ya Xier, kdriêk Sa Thầy, klei bi hmô mđĭ kyar ana êa drao ti să Tê Xăng, Măng Ri, kdriêk Tu Mơ Rông… Ayŏng A Tạo, mnuih djuê ana Sơdăng nao hgŭm hlăm adŭ kriê dlăng klei mpla mjing mơ̆ng Êpul hgŭm bruă ana êa drao Tu Mơ Rông, brei thâo: “Sa hruê kăm sa blư̆, phung hgŭm hlăm Êpul hgŭm bruă lŏ kƀĭn online. Phung hgŭm grăp čô grăp anôk, kƀĭn online jing ênưih hĭn, găl hĭn. Khua êpul ba mdah bruă knuă hlăm hruê kăm anei pô srăng mă bruă anăn. Mta kñăm jing rơ̆ng klei bi mguôp mơ̆ng phung hgŭm hlăm êpul čiăng mâo klei ngă bruă mbĭt.”

Thŭn 2022 ti čar Kon Tum mâo 48 êpul hgŭm bruă dưi mkŏ mjing, mđĭ ênoh êpul bi Hgŭm bruă hlăm alŭ wăl să jing 232. Năng mơak hĭn jing hlăm dŭm Êpul hgŭm bruă anei mâo ênoh gŏ sang mnuih djuê ƀiă hlăm brô 17%. Phung mă bruă anei hur har nao hgŭm hlăm bruă mkra mjing, mnia mblei mơ̆ng Êpul hgŭm bruă. Mơ̆ng bruă thâo klă boh sĭt, dưn yua klei kreh knhâo, mrâo mrang hlăm klei mkra mjing mâo leh klei mlih hlăm klei mĭn, bruă ngă mơ̆ng mmuih mă bruă jing mnuih djuê ƀiă. Bùi Duy Trung, k’iăng khua dhar bruă mặt trận čar Kon Tum brei thâo: “Mnuih ƀuôn sang mâo klei mlih, jing čiăng tlaih mơ̆ng klei knap mñai, čŏng pô gĭr ktưn kpưn đĭ amâo mâo knang kluôm ênŭm kơ knŭk kna. Bi kơ klei ngă bruă mâo klei mĭn mlih hdră ngă bruă, mkra mjing čŏng pô jing mkra mjing mnơ̆ng dhơ̆ng. Mnuih ƀuôn sang ƀrư̆ hruê ƀrư̆ nao hgŭm dŭm alŭ mtô bi hriăm ba jao kdrăp lŏ hma, mtrŭt mđĭ bruă hlăm dliê, hluê anăn dưn yua klei kreh knhâo hdră mnêč hlăm bruă mkra mjing, rông mnơ̆ng”.

Boh tŭ mơ̆ng bruă dưn yua klei kreh knhâo mrâo mrang hlăm klei ngă bruă đru kơ klei hdĭp ƀuôn sang jing mnuih djuê ƀiă ti lu alŭ ƀuôn ti čar Kon Tum dưi mâo klei hơĭt. Phung mdrŏng hŏng prăk êklai kyua bruă rông mnơ̆ng, pal ana êa drao, kphê krĭng ê’ăt… Ti dŭm kdriêk krĭng mnuih ƀuôn sang jing mnuih djuê ƀiă ktang lu. Thŭn 2022 hnơ̆ng hŏ sang ƀun ƀin ti dŭm kdriêk anei ăt hrŏ mơ̆ng 8% kơ dlông, jing lu hĭn mkă hong mta kñăm bi hrŏ klei ƀun čar Kon Tum bi êdah leh. Hŏng dŭm boh tŭ dưn dưi mâo hlăm thŭn 2022, mnuih ƀuôn sang dŭm djuê ana ti čar Kon Tum jhŏng mŭt hlăm thŭn 2023 hŏng klei hmăng hmưi gĭr ktưn, kpưn đĭ hlăm klei mă bruă hluê si hdră thâo klă boh sĭt, ba yua klei kreh knhâo mrâo mrang.

Viết bình luận