Blŭ hrăm hlăm klei bi tuôm, Khua dhar bruă mặt trận čar kwar Việt Nam Đỗ Văn Chiến mâo klei bi hdơr kơ phung mah jiăng tar rŏng lăn mâo leh klei sa ai, đru mguôp kơ klei krŭ kdơ̆ng mtlaih êngiê djuê ana, hluh hlir lăn čar, mkŏ mjing leh anăn răng mgang lăn čar Việt Nam.

Việt Nam dôk gĭr truh thŭn 2030 jing ala čar đĭ kyar, mâo bruă tuh tia mrâo mrang, hnư hrui wĭt kah knar lu, truh thŭn 2045 jing ala čar đĭ kyar, mâo hnư hrui wĭt lu. Čiăng dưi mâo dŭm klei anăn, Đỗ Văn Chiến mñă ktang, Đảng, knŭk kna leh anăn mnuih ƀuôn sang Việt Nam hmăng hmưi lŏ dơ̆ng mâo lu hĭn klei uêñ mĭn, klei sa ai, klei đru mơ̆ng phung mah jiăng tar rŏng lăn hlăm dŭm mta bruă. Ƀri wưng anei, Đỗ Văn Chiến mđup brei mêđai bi hgŭm leh anăn hră pah mni mơ̆ng Khua knŭk kna kơ dŭm êpul bruă leh anăn grăp čô čiăng čih yap klei sa ai leh anăn klei đru mơ̆ng mah jiăng tar rŏng lăn hŏng Việt Nam.