Aguah mbruê 23/9, ti Hà Nội mkŏ mjing gưl klă klơ̆ng Klei kƀĭn kluôm Phung bi ala bruă Đảng mặt trận čar kwar, dŭm êpul bruă gưl dlông gưl tal 1 wưng thŭn 2025 – 2030, hŏng klei nao hgŭm mơ̆ng 346 čô bi ala kơ êbeh 5000 čô đảng viên mơ̆ng Anôk bruă Đảng. Klei hưn mdah hlăm klei kƀĭn lač klă: Hlăm wưng păn bruă êgao, Kluôm Đảng dưi bi lar ai tiê bi mguôp, čŏng pô, mlih mrâo, kñăm kơ klei gĭt gai kluôm dhuôm kơ bruă hluê ngă bruă klam kđi čar leh anăn bruă mkŏ mjing Đảng, dưi mâo mă lu boh tŭ dưn yuôm bhăn. Êdah êdi msĕ si: Mtrŭt mđĭ bruă bi hơĭt klei hdĭp yang ƀuôn leh anăn lăm lui sang tĭ ƀrôč hŏng bruă mtrŭt mjhar bruă rŭ mdơ̆ng, mkra mđĭ êbeh 180.000 boh sang bi mguôp kơ gŏ sang ƀun ƀin.

Êngao kơnăn, lu klei bi hmô ktuê dlăng tŭ dưn dưi rơ̆ng leh anăn pŏk mlar msĕ si: mnuih ƀuôn sang ksiêm dlăng knuă druh, đảng viên… Nao hgŭm leh anăn blŭ gĭt gai hlăm klei kƀĭn, Khua gĭt gai Đảng Tô Lâm mñă ktang 3 klei mĭn gĭt gai hŏng kluôm anôk bruă Đảng hlăm klei kƀĭn kluôm bruă Đảng mặt trận čar kwar: Anăn jing mă mnuih ƀuôn sang jing mta kñăm, mta phŭn leh anăn boh kdrŭt mơ̆ng klei mlih mrâo. Grăp hdră mtrŭn, hdră êlan ngă bruă srăng wĭt lač: boh tŭ dưn klă klơ̆ng kơ mnuih ƀuôn sang, kơ grăp mta bruă mdê mdê. Pŏk mlar klei êngiê mơ̆ng nah gŭ, mtrŭt mđĭ klei blŭ hrăm hlăm yang ƀuôn, nao mbĭt hŏng hdră bhiăn ngă bruă, mpŭ kơ klei bhiăn lăn čar, mpŭ kơ klei mdê hjăn leh anăn mlih mơ̆ng hdră bruă khă bi mâo jing boh tŭ dưn klă klơ̆ng, mđing tal êlâo kơ dŭm klei bi hmô dưi mđĭ lar pral, ênoh bi liê djŏ guôp, hmăi truh kơ klei hdĭp, ba wĭt boh tŭ dưn klă klơ̆ng kơ mnuih ƀuôn sang. Khua gĭt gai Đảng Tô Lâm mñă brei lŏ dơ̆ng kriê dlăng klei hdĭp kơ mnuih ƀuôn sang hŏng 6 kmta kñăm klei hdĭp mnuih ƀuôn sang leh anăn jao bruă klam phŭn kơ grăp êpul bruă mặt trận.