Tlam mbrue 8/9, Knơ̆ng bruă sang čư̆ êa čar Gia Lai mkŏ mjing leh klei bi kƀĭn ksiêm wĭt bruă duh mkra ala ƀuôn mlan 8. VOV.Êđê- Bi knăl klei duh mkra čar Gia Lai mâo lu klei bi mlih, ƀiădah mđrĭng anăn čiăng bi mâo ênoh bi liê năng  kơ klei anăn, snăn kơh čiăng dưi bi leh mta kñăm klei đĭ kyar 8% kluôm thŭn.

Tui si klei hâo mdah, knŏng ênoh tuh tia mlan 8 hlăm čar Gia Lai đĭ 6,8% mkă hŏng wưng anei thŭn dih, bruă hiu čhưn ênguê lŏ bluh đĭ hŏng 9,8 êklăk gưl čô tue, đĭ leh  16% ; bruă čhĭ mnia hŏng ala tač êngao êbeh  2,18 tỷ USD, knar 3/4 hdră kčah hlăm thŭn. Mâo ba wĭt ngăn prăk kơ knŭk kna mlan 8 êbeh 18.395 êklai prăk. Khăsnăn, hnơ̆ng ênoh prăk duh bi liê ti Gia Lai mrâo êbeh 60% hdră kčah. Tơdah dŭm bruă phŭn dôk mâo lu klei gun kpăk anôk ala. Mơ̆ng klei anăn, Phạm Anh Tuấn, Khua knơ̆ng bruă sang čư̆ êa čar Gia Lai bi êdah brei mđing dŭm bruă phŭn. Phung khua kiă kriê dŭm knơ̆ng bruă, alŭ wăl, lŏ bi gĭt gai, ksiêm wĭt grăp mta bruă, mkŏ mjing hdră bi liê ngăn prăk, djŏ tui si grăp wưng, kñăm ruh mgaih klei dleh dlan./.