Hlăm alŭ wăl čư̆ čhiăng Khánh Sơn, Khánh Vĩnh hing ang kơ đang boh durian, mjing leh anăn knăl jăk kơ bruă čhĭ mnia, mâo klei hing ang jing đang boh durian, sabočê boh kneh Thailand, boh ƀơr, mtei. Boh nik, boh durian Khánh Sơn mâo mkŏ mjing leh anăn knăl jăk kơ anôk čhĭ mnia, mjing leh ana boh ba wĭt klei tŭ dưn prŏng kơ mnuih pla mjing. Dŭm đang boh kroh mtah mda, mboh tui si yan mdê mdê, amâo mâo djŏ knŏng jing boh mnga tŭ dưn kơ mnuih pla mjing, ƀiădah lŏ jing mnơ̆ng pioh kơ bruă hiu čhưn ênguê yuôm bhăn êdi.

Êngao kơ đang boh kroh, krĭng čư̆ čhiăng Khánh Hòa lŏ mâo hnoh krông êa hnoh jăk siam snăk, mbĭt anăn mâo dŭm bĭt drai, lehanăn kmrơ̆ng kpal, jing jăk êdi pioh kơ bruă hiu čhưn ênguê, lăn mnga êa mơak lehanăn hiu čhưn hlăm yang ƀuôn. Bi mguôp hŏng klei hdĭp dhar kreh mnuih djuê ana Raglai, Êđê, Tày, Nùng, alŭ wăl lŏ mkŏ mjing lu mta mnơ̆ng pioh kơ bruă hiu čhưn ênguê jăk êdi msĕ si dŭm knăm mơak djuê ana, hmư̆ klei tông čing čhar, lông ƀơ̆ng huă mnơ̆ng ƀơ̆ng mnuih djuê ƀiă, dôk hlăm dŭm boh sang homestay msĕ si sang krum. Amai Nguyễn Thị Thu ti ƀuôn prŏng Nha Trang yăl dliê leh truh hlăm krĭng čư̆ čhiăng Khánh Sơn hiu čhưn:

“Gŏ sang kâo thŭn anei nao čhưn kơ Khánh Sơn jing gưl tal dua leh. Lăn ala tinei siam, adiê êđăp. Boh kroh thŭn anei msĕ si djŏ êa hlĭm hjan, mâo boh mnga lu, boh sabočê, boh durian hlăk hlăm yan hrui pĕ. Êngao kơ mâo ƀơ̆ng dŭm mta boh kroh, gŏ sang hmei lŏ nao čhưn hlăm drai Tà Gụ, drai êa anăn siam snăk, êa êngăp êngeh. Mâo ana kyâo prŏng siam, dliê hrông. Mnuih ƀuôn sang jĕ giăm, mă bruă jăk snăk”.

Nguyễn Trí Dũng, K’iăng khua knơ̆ng bruă sang čư̆ êa ƀuôn hgŭm Tây Khánh Sơn brei thâo, hlăm alŭ wăl mâo leh dŭm gŏ sang bi mlih hdră duh mkra mnia mblei, duh bi liê kơ bruă mkra čhĭ mnơ̆ng ƀơ̆ng huă hiu čhưn đang hma pioh kơ phung hiu čhưn ênguê.

 “Hlăm ƀuôn hgŭm Tây Khánh Sơn mâo klei găl jing đang hma prŏng, hlăm anăn mâo anôk ala jăk siam, yan adiê êđăp, mjing klei jăk êdi kơ tue hiu čhưn ênguê, lông ƀơ̆ng mnơ̆ng ƀơ̆ng djuê ana ti Khánh Sơn lehanăn mnơ̆ng ƀơ̆ng huă krĭng kwar, lehanăn nao bi blei boh mnga mơ̆ng mnuih ƀuôn sang.”

Čiăng dưi dưn yua jih klei jăk găl, čar Khánh Hòa lŏ čuăl mkă krĭng hiu čhưn ênguê yang ƀuôn, mguôp mbĭt hŏng bruă lŏ hma pla mjing, ruah dŭm mta ana mnơ̆ng pla phŭn jing boh durian Khánh Sơn, boh xoài Cam Lâm, boh kruĕ dŭng Diên Khánh. Mnuih ƀuôn sang mâo klei mđĭ ai mŭt hlăm êpul hgŭm bruă, čiăng mđĭ hnơ̆ng tŭ hlăm klei hrui blei boh mnga. Čar ăt duh bi liê kơ bruă nah gŭ, đru hlăm bruă rŭ mdơ̆ng sang homestay, mjing alŭ wăl lông ngă bruă, lehanăn mjuăt bi hriăm klei thâo mă bruă, hlak mblang, ktrâo tăt, lehanăn bi hriăm klei tue kơ mnuih ƀuôn sang. Yuôm bhăn hĭn jing mkŏ tuôr hiu čhưn ênguê, mkŏ mjing êlan kơ klei hiu čhưn ênguê “Plao ksĭ Nha Trang – đang boh Khánh Sơn – dhar kreh Khánh Vĩnh”, mguôp hưn mdah hlăm kdrăp mrô, lehanăn ngă bruă hiu atăt klei hiu čhưn. Nguyễn Duy Quang, Khua knơ̆ng bruă lŏ hma lehanăn wăl hdĭp mda čar Khánh Hòa lač:

“Tơdah dŭm krĭng čư̆ čhiăng ară anei mâo pla mjing dŭm mta boh kroh, bi mguôp hŏng bruă hiu čhưn ênguê lăn mnga êa siam, mbĭt hŏng đang hma mâo dŭm boh mnga djăp ênoh čuăn OCOP srăng mđĭ klei hdĭp mnuih ƀuôn sang. Tơdah bruă hiu čhưn ênguê mâo bi mguôp mơ̆ng krĭng êa ksĭ đĭ nao truh kơ krĭng čư̆ čhiăng srăng mâo dŭm mta mnơ̆ng djăp ênoh čuăn OCOP, ƀuôn bruă, đang hma, srăng mjing ai êwa mrâo kơ bruă mđĭ kyar hiu čhưn ênguê kơ mgi dih.

Hŏng klei găl mâo anôk ala, yan adiê jăk, đang hma boh kroh djŏ boh mnga, lehanăn jiă knhuah gru dhar kreh djuê ana tinăn. Khánh Hòa hlăk mâo klei găl prŏng kơ bruă hiu čhưn ênguê, amâo mâo djŏ knŏng kơ̆ng jơ̆ng phung hiu čhưn ênguê ti plao ksĭ đuč ôh, ƀiădah lŏ atăt tue lông hiu hlăm čư̆ čhiăng lăn mnga êa mơak, anôk mtah mda mơ̆ng đang boh kroh, jăk êdi. Tinăn mâo klei hiu čhưn hlăm yang ƀuôn anôk jiă knhuah gru dhar kreh, tơdah jih jang klei anăn mâo čuăl mkă kjăp, mđĭ kyar siam, sĭt nik ƀăng bhă kơ bruă hiu čhưn ênguê srăng kjăp hĭn dưn yua jih boh êlam kơ dhar kreh, lehanăn klei jăk mơ̆ng lăn adiê čư̆ čhiăng Khánh Hòa, mjing ai êwa mrâo kơ bruă mđĭ kyar klei duh mkra alŭ wăl./.