Lŏ dơ̆ng hdră Klei bi kƀĭn mjêč tal 9, Bruă kƀĭn ala gưl 15, hruê anei (15/2)  phung bi ala bi trông ti anôk bi kƀĭn kơ hră čih Hdră bhiăn mkŏ mjing bruă sang čư̆ êa alŭ wăl (mlih mrâo);  Hdră mbŏ kơ klei mđĭ kyar bruă duh mkra- ala ƀuôn thŭn 2025 hŏng hdră kñăm đĭ kyar mâo 8% kơ dlông; Hdră êlan bi liê hdră bruă rŭ mkra êlan êdeh treng Lào Cai - Hà Nội - Hải Phòng; Hră čih Hdră mtrŭn mơ̆ng Bruă kƀĭn ala lông ngă dŭm klei bhiăn, hdră êlan mdê hjăn čiăng mđĭ  kyar êlan êdeh treng ƀuôn prŏng ti ƀuôn prŏng Hà Nội, Hồ Chí Minh.

 Hdră bruă anei mâo Phŭn bruă kđi čar bi mklă leh, čiăng mđĭ kyar êlan êdeh treng hlăm ƀuôn prŏng truh thŭn 2045, đăo tĭng ênoh čiăng prăk bi liê jih jang mơ̆ng Hà Nội jing hlăm brô 62 êklai đôlar Mi leh anăn ƀuôn prŏng Hồ Chí Minh hlăm brô 67 êklai đôlar Mi. Hdră kñăm êlâo hĭn mâo Hà Nội leh anăn ƀuôn prŏng Hồ Chí Minh kčah jing, truh thŭn 2035 ba yua 17 êlan, kdrêč êlan hŏng boh dlông hlăm brô 752 km, rơ̆ng 35-50% bruă dŭ mdiăng tue hlăm êpul êya. Truh thŭn 2045 ba yua thiăm 7 ktuê êlan, 4 kdrêč êlan hŏng boh dlông hlăm brô 355 km, rơ̆ng 50-60% bruă dŭ mdiăng tue hlăm êpul êya. Mơ̆ng boh sĭt pŏk ngă dŭm hdră bruă êlan êdeh treng ƀuôn prŏng hlăm wưng êgao, phung bi ala bruă kƀĭn ala lač, bruă mtrŭn klei bhiăn mâo klei mdê hjăn jing mjêč. Hà Nội leh anăn ƀuôn prŏng Hồ Chí Minh jing dŭm anôk đĭ kyar, phŭn bruă duh mkra, mâo ai lar bra ktang. Bruă mâo hdră mtrŭn mdê hjăn čiăng mđĭ kyar êlan êdeh treng hlăm ƀuôn prŏng ti Hà Nội, ƀuôn prŏng Hồ Chí Minh đru iêô mkrum jih hnơ̆ng klei găl, mjing klei găl kơ dua ƀuôn prŏng ngă tŭ jing hdră kñăm mđĭ kyar êlan êdeh treng ƀuôn prŏng rơ̆ng mrâo mrang, hơĭt kjăp.