Aguah mbruê, Dhar bruă dhar kreh – yang ƀuôn mơ̆ng Bruă Kƀĭn Ala bi mguôp hŏng dŭm dhar bruă leh anăn anôk bruă djŏ tuôm mkŏ mjing klei hlăk mblang kơ bruă hluê ngă dŭm hdră êlan, hdră bhiăn lăn čar hlăm bruă gang mkhư̆ êa drao mgưt, mnơ̆ng ƀơ̆ng mgưt. Klei hưn brei ƀuh, boh klei êa drao mgưt, êa drao amâo mâo jăk leh anăn mnơ̆ng ƀơ̆ng mgưt ăt dleh dưi ksiêm dlăng, arưp truh kơ klei suaih pral, asei mlei mnuih ƀuôn sang leh anăn kơhưm bruă mdrao mgŭn. Mơ̆ng akŏ thŭn 2024 truh kơ ară anei, êpul bruă kiă kriê anôk mnia mblei mgaih msir leh êbeh 11.600 klei ngă soh, đŭ prăk êbeh 76 êklai prăk, knŏng êa drao, mnơ̆ng ƀơ̆ng mgưt mâo 345 klei, đŭ êbeh 29 êklai prăk, mnơ̆ng ngă soh êbeh 14 êklai prăk.

Khua phŭn bruă mdrao mgŭn Đào Hồng Lan mñă klă, êa drao mgưt leh anăn mnơ̆ng ƀơ̆ng mgưt jing boh klei kjham, čiăng mâo klei nao hgŭm hrăm mbĭt, ktang phĭt mơ̆ng bruă kđi čar.

Hlăm wưng êgao, knŭk kna, dŭm phŭn, dhar bruă leh anăn alŭ wăl ngă leh lu hdră êlan, ƀiădah ăt adôk mâo dŭm klei êdu kƀah kơ hdră bhiăn leh anăn mkŏ mjing klei ngă bruă.