Hlăm klei bi tuôm, dua čô khua gĭt gai bu êdah klei hơ̆k mơak ti anăp klei đĭ kyar jăk siam mơ̆ng klei bi mguôp Việt Nam - Lào hlăm wưng êgao hlăm lu mta bruă, mơ̆ng bruă kđi čar, bruă hŏng tač êngao, klei êđăp ênang, bruă lĭng kahan truh kơ bruă duh mkra, dhar kreh, sang hră mơar leh anăn bi mguôp alŭ wăl. Hlăm wưng kơ anăp, dua tĭng bi tŭ ư mđĭ hĭn klei đăo knang kđi čar, rơ̆ng kơ dŭm gưl nao čhưn, bi tuôm gưl dlông leh anăn dŭm gưl hlăm dŭm mbah Đảng, Knŭk kna, Bruă Kbĭn ala, Êpul gơ̆ng bruă ƀuôn sang leh anăn mjĕ mjuk mnuih ƀuôn sang, mtrŭt mđĭ klei bi mguôp thơ̆ng kơ bruă, kah mbha klei hriăm plah wah Êpul gơ̆ng djuê ana, dŭm dhar bruă leh anăn Êpul khua êmua bi hgŭm plah wah dua ala čar hlăm bruă mkŏ mjing hdră êlan, ksiêm dlăng leh anăn bi klă dŭm boh klei yuôm bhăn mơ̆ng lăn čar, lŏ dơ̆ng bi sa ai hŏng hdơ̆ng pô ti dŭm anôk bi kƀĭn Bruă Kƀĭn ala hlăm alŭ wăl leh anăn lu ala čar msĕ si AIPA, IPU, APF čiăng răng mgang boh tŭ dưn mbĭt mơ̆ng dua ala čar leh anăn alŭ wăl.

Dua tĭng tŭ ư mđĭ hĭn klei bi mguôp mkŏ mjing jăk bruă bi hdơr 65 thŭn mkŏ mjing klei mjĕ giăm leh anăn 50 thŭn siñê klei kuôl kă bi hgŭm leh anăn bi mguôp Việt Nam - Lào hlăm thŭn 2027, bi lar knhuah gru bi hgŭm, bi mguôp jăk siam Việt Nam - Lào truh kơ dŭm gưl mnuih ƀuôn sang dua ala čar, boh nik jing phung mda asei. Dua ala čar lŏ dơ̆ng hluê ngă jăk dŭm klei kuôl kă gưl dlông leh anăn boh tŭ dưn klei kƀĭn tal 48 Dhar bruă mlir Knŭk kna Việt Nam - Lào, ba wĭt boh tŭ dưn klă klơ̆ng kơ mnuih ƀuôn sang dua ala čar, đru ksul mbŭ klei mjĕ giăm Lào - Việt Nam mtah mda, hơĭt kjăp lă lar./.