Êbat dlông êlan bêtông prŏng leh anăn doh, Y Lisa Niê, khua dlăng bruă ƀuôn Tung Krăk, ƀuôn hgŭm Ea Drông, čar Dak Lak brei thâo, anei jing boh tŭ dưn mơ̆ng klei sa ai leh anăn klei hrăm mbĭt mơ̆ng knuă druh, đảng viên leh anăn mnuih ƀuôn sang. Êlan bê tông 130m, knŭk kna đru brei boh tâo, simăng, mnuih ƀuôn sang blei čuah, kai hli leh anăn đru mguôp êbeh 100 hruê ai čiăng mkra êlan, găl ênưih kơ klei êrô êbat, dŭ mdiăng boh mnga leh anăn đru bi mlih ƀô̆ mta krĭng ƀuôn sang hlăm ƀuôn.

 “Hŏng bruă klam jing khua dlăng bruă, kâo bi trông hŏng mnuih ƀuôn sang čiăng mkra êlan, anei ăt jing boh tŭ čiăng kơ mnuih ƀuôn sang dưi dưn, đru kơ klei êrô êbat jăk hĭn. Kâo bi kƀĭn mnuih ƀuôn sang, hâo hưn mtrŭt mjhar leh anăn mâo mnuih ƀuôn sang sa ai, bi mguôp grăp gŏ sang 600.000 prăk, hŏng 80 gŏ sang bi mguôp. Kyua mâo thiăm ênoh prăk knŭk kna đru, êlan anei dưi bi leh.”

Êlan bêtông ti ƀuôn Tung Krăk jing sa hlăm dŭm gru hmô hlăm bruă hluê ngw gru mngač Awa ti ƀuôn hgŭm Ea Drông, čar Dak Lak, bi êdah bruă klam nao êlâo, bi hmô mơ̆ng knuă druh, đảng viên hlăm bruă mkŏ mkra krĭng ƀuôn sang mrâo ti alŭ wăl. Hŏng bruă myơr lăn mkra êlan leh anăn mtrŭt mjhar mnuih ƀuôn sang bi mrum mguôp, diñu dưi mkŏ mjing klei đăo knang leh anăn klei sa ai mơ̆ng mnuih ƀuôn sang, đru bi mkŏ êlan klông.

Amâo djŏ knŏng mkŏ mkra krĭng ƀuôn sang mrâo, bruă hluê ngă gru mngač Awa ti ƀuôn hgŭm Ea Drông lŏ dưi bi êdah hŏng bruă kriê dlăng kơ mnuih ƀun ƀin. Hluê ngă dŭm hdră ala čar kñăm kơ bruă bi hrŏ ƀun, ƀuôn hgŭm Ea Drông mâo leh dŭm hdră đru kơ ana mjeh, rŭ mdơ̆ng sang dôk, brei čan prăk mơ̆ng knơ̆ng prăk đru ba ala ƀuôn. Dŭm hdră êlan anei mkŏ mjing klei găl kơ mnuih ƀuôn sang mđĭ kyar klei hdĭp mda, bi hơĭt hnư hrui wĭt. Kyuanăn, ênoh gŏ sang ƀun hlăm ƀuôn hgŭm hrŏ mơ̆ng 280 gŏ sang hlăk thŭn 2024 adôk 214 gŏ sang hlăm thŭn anei. Y San Niê Kdăm, khua ƀuôn Ea Kjoh A, ƀuôn hgŭm Ea Drông, čar Dak Lak brei thâo:

 “Dŭm gŏ sang ƀun mâo klei uêñ mĭn, klei đru mơ̆ng Bruă sang čư̆ êa alŭ wăl čiăng mđĭ kyar bruă rông mnơ̆ng, pla mjing. Mơ̆ng thŭn 2023 hlăm ƀuôn Ea Kjoh A mâo 16 gŏ sang dưi đru bê mjeh, grăp gŏ sang 8 drei. Diñu ngă bruă rông mnơ̆ng. Êjai bê prŏng leh anăn mâo ênoh diñu čhĭ, mă prăk anăn yua hlăm aguah tlam, mkiêt mkuôm mkra sang, rông ba anak čô nao sang hră. Klei hdĭp hơĭt, diñu hơĭt ai tiê mă bruă knuă, ngă djŏ dŭm hdră kčah mtrŭn mơ̆ng Đảng, knŭk kna.”

 Ƀuôn hgŭm Ea Drông ară anei dưi mkŏ mjing hluê tur knơ̆ng bi mŭt dua xă Ea Drông hđâwp leh anăn Ea Siên, mâo 21 alŭ ƀuôn, giăm 24.000 čô mnuih ƀuôn sang, hlăm anăn êbeh 70% jing mnuih djuê ƀiă. Bruă Đảng ƀuôn hgŭm mao giăm 900 čô đảng viên ngă bruă ti 52 êpul bruă hlăm anôk bruă.

Hŏng ai tiê, bruă klam mrâo, bruă hluê ngă gru mngač Hồ Chí Minh jing klei ktrâo êlan hlăm klei gĭt gai, ktrâo lač, bi êdah bruă klam klă klơ̆ng mơ̆ng grăp čô knuă druh, đảng viên. Ayŏng Hoàng Văn Dụng, mnuih Nùng, knuă druh adŭ bruă Êpul gơ̆ng bruă ƀuôn sang, Bruă sang čư̆ êa ƀuôn hgŭm Ea Drông, čar Dak Lak brei thâo:

 “Hluê ngă gru mngač Hồ Chí Minh amâo djŏ knŏng jing klei pia, ƀiădah bi êdah hŏng dŭm bruă grăp hruê pô ngă. Jing sa čô đảng viên mda asei, hlăm klei ngă bruă, kâo ăt hur har dưn yua klei kreh knhâo mrâo mrang hlăm bruă knuă, bi mrâo klei hriăm, mlih hlăm grăp hruê čiăng dưi ngă jăk bruă klam jao kơ pô”.

H Thúy Mlô, k’iăng khua dlăng bruă Đảng ƀuôn hgŭm Ea Drông brei thâo, bruă hluê ngă gru mngač Awa ti alŭ wăl jing leh hdră bhiăn, mkŏ mjing klei mlih jăk hlăm bruă mkŏ mjing Đảng.

 “Bruă hluê ngă asăp Awa dưi đru mđĭ ai tiê bruă klam, cŏng ksiêm wĭt pô, mkra mlih hlăm gưl bruă nah gŭ. Lu anôk bruă ăt bi lar jăk ai tiê ksiêm wĭt pô, bi êdah knhuah bi ktưn hlăm êpul bruă Đảng, hluê anăn đru mkŏ mjing anôk bruă Đảng ênuah ênô, kjăp hĭn. Hŏng bruă Đảng ƀuôn hgŭm hlăm bruă mâo dŭm klei bi hmô êdah êdu hlăm klei hluê ngă gru mngač Hồ Chí Minh ăt mâo lu sơnăk. Dŭm gru hmô anăn đru mkŏ mjing klei bi mlih jăk hlăm anôk bruă.”

Hŏng dŭm bruă ngă klă klơ̆ng, klei mbruă, bruă hluê ngă gru mngač Hồ Chí Minh ti ƀuôn hgŭm Ea Drông dưi đru mkŏ mjing êpul bruă Đảng kpă ênô, bi êdah ai tiê Bruă sang čư̆ êa jĕ giăm hŏng mnuih ƀuôn sang, kyua mnuih ƀuôn sang. Mbĭt anăn bi râo klei hmăng hmưi kpưn đĭ, ai tiê bi mguôp leh anăn mkŏ mjing ƀuôn sang đĭ kyar, mrâo mrang.