Hluê si klei tĭng dlăng mơ̆ng Êpul ksiêm dlăng mrô 26, Anôk kriê dlăng bruă Đảng čar Dak Lak mđing pŏk ngă kjăp dŭm hdră êlan mtrŭn mơ̆ng Gưl dlông. Čar pral bi leh anôk bruă, mtrŭt mđĭ hdră kah mbha gưl, mkra mlih klei ngă hră mơar lehanăn bi mlih mrô. Hŏng bruă klam mđĭ kyar hdră duh mkra, Dak Lak čih mkra leh hdră kčah đĭ kyar hluê grăp thŭn, grăp bruă; mkŏ mjing Anôk gĭt gai hluê ngă mta kñăm đĭ kyar dua mrô, mbĭt anăn ba mdah lu hdră msir kñăm mtrŭt mđĭ kyar bruă duh mkra – ala ƀuôn. Hlăm bruă pŏk ngă Hdră mtrŭn 57, čar ăt bi sĭt dŭm bruă klam, hdră msir ba yua kdrăp kreh knhâo, mrâo mrang, bi mlih mrô lehanăn mlih mrâo.

Hŏng mta kñăm đĭ kyar bruă duh mkra dua mrô, Êpul ksiêm dlăng bi mklă bruă jao hnơ̆ng čuăn đĭ kyar kơ 102 să, ƀuôn hgŭm dôk kƀah klei kreh knhâo. Boh tŭ hluê ngă dŭm bruă klam tlâo mlan gưl 1 ăt msĕ mơh hnơ̆ng đĭ kyar ară anei ka năng djŏ hŏng hdră kvvah mtrŭn. Hlăk ệjai anăn, dŭm bruă mâo lu klei găl mâo msĕ si bruă hiu čhưn ênguê, bruă lŏ hma ăt ka mđĭ lar jih bruă klam, hnơ̆ng đru mguôp hlăm klei đĭ kyar mơ̆ng čar adôk ƀiă.

Hlăm bruă pŏk ngă Hdră mtrŭn mrô 57, dŭm alŭ wăl adôk dleh dlan hlăm bruă bi leh mta kñăm. Ară anei adôk 56 mta hră mơar djŏ tuôm kơ klei bhiăn hlăm bruă kreh knhâo kdrăp mrâo, bi mlih mrâo lehanăn mlih mrô ka dưi msir mghaih. Anôk bruă nah gŭ kdrăp mrâo, kdrăp mrô lehanăn dŭm klei găl mkăp kơ hdră bi mlih mrô, boh nik ti krĭng taih kbưi ăt dôk êdu kƀah, hmăi truh kơ boh tŭ klei pŏk ngă bruă klam.

Ti anôk mă bruă, čar Dak Lak akâo kơ Gưl dlông ksiêm dlăng rauh mtlaih dŭm klei gun kpăk djŏ tuôm kơ lăn lŏ hma, lăn dliê kmrơ̆ng; ksiêm dlăng bruă mkŏ dăp dŭm să điêt, bi leh hdră mtrŭn hŏng phung knuă druh gưl nah gŭ lehanăn lŏ dơ̆ng mđing dlăng duh bi liê kơ anôk bruă êlan klông. Mbĭt anăn, alŭ wăl ăt ba mdah dŭm klei bhiăn mdê hjăn kñăm mjing boh kdrŭt đĭ kyar mrâo hlăm wưng ti anăp. Khua bruă Đảng čar Dak Lak Lương Nguyễn Minh Triết lač snei:

“Mtă kơ êpul brei mâo klei hưn mthâo čiăng kơ čar ba yua Hdră mtrŭn mrô 72 mơ̆ng Anôk bruă kƀĭn ala kơ klei ba yua dŭm klei bhiăn mdê hjăn kơ Ƀuôn Ama Thuôt, gĭr mkŏ mkra Ƀuôn Ama Thuôt jing krĭng phŭn ti Lăn dap kngư čiăng mđing mđĭ kyar kơ krĭng anei; Tal dua jing ti nah Ngŏ mâo wăl duh mkr Dhŭng Phú Yên, dưi lač boh kdrŭt đĭ kyar dua mrô mâo amâo dah hơaĭ ăt mđing mơh kơ wăl duh mkra prŏng anei. Hmei ba mdah klei ba yua Hdră mtrŭn 127 thŭn 2012 mơ̆ng Knŭk kna msĕ si wăl duh mkra Bắc Vân Phong čiăng mâo klei bhiăn jak iêo hdră duh bi liê hlăm krĭng anei”

Tĭng dlăng kơ boh tŭ hluê ngă dŭm bruă klam mđĭ kyar hdră duh mkra – ala ƀuôn mơ̆ng Dak Lak, Nguyễn Thanh Nghị lač, hnơ̆ng đĭ kyar ară anei mơ̆ng čar dôk êmưt mkă hŏng hnơ̆ng đĭ kyar dua mrô mâo kčah leh. Hnơ̆ng tŭ jăk hdră mđĭ kyar ka năng djŏ hŏng klei găl mâo mơ̆ng alŭ wăl. Bruă kreh knhâo mrâo mrang, mlih mrâo lehanăn mlih mrâo ka klă sĭt jing boh kdrŭt mtrŭt mđĭ kyar bruă duh mkra.

Khua Êpul ksiêm dlăng mrô 26 mtă kơ čar lŏ dơ̆ng ksiêm dlăng djăp klei găl mâo ti alŭ wăl, mđing ruh mtlaih jih klei gun kpăk hlăm klei ngaư hră mơar, wăl anôk duh bi liê mnia mblei, mđĭ boh tŭ kriê dlăng mtrŭt mđĭ bruă bi mlih mrô lehanăn hluê ngă mđrăm mbĭt dŭm bruă phŭn, boh nik jing mđĭ kyar djăp klei găl mâo kơ hdră đĭ kyar pral lehanăn hơĭt kjăp.

“Mtă kơ jih jang ksiêm dlăng kluôm klei găl mâo ti alŭ wăl čar čiăng mđĭ kyar bruă duh mkra, ksiêm dlăng jih klei ngă hră mơar, wăl anôk duh bi liê mnia mblei mơ̆ng čar, mkra mlih klei ngă hră mơar; kriê dlăng hdră bi mlih mrô si srăng ngă čiăng kơ jih jang lŏ mđing ksiêm dlăng ruh mtlaih klei gun kpăk čiăng mđing ba yua jih klei găl mâo lehanăn hkuê ngă tŭ dưn dŭm hdră êlan phŭn, boh nik jing djăp klei găl mâo”.