Ti hma prŏng 7 sào ti alŭ Đồng Giao, ƀuôn hgŭm Ea Mdroh, čar Dak Lak, ung mô̆ ayŏng Lý Thanh Tiền (mnuih Dao) dôk kčoh rơ̆k, lŭk amlơ̆k kơ êmô giăm 10 drei. Ñu yăl dliê, êmô anei mâo mơ̆ng čar đru hlăk thŭn 2021. Kyua rông mnơ̆ng bi mguôp hŏng pla mjing, gŏ sang ñu dưi tlaih ƀun, dưi mdơ̆ng sang dôk kjăp, brei kơ anak nao sang hră.

“Êlâo dih gŏ sang kâo jing gŏ sang ƀun, mâo knŭk kna đru 2 drei êmô leh anăn 2 drei bê, êngao kơnăn lŏ đru hdră mnêč rông mnơ̆ng, pla mjing čiăng kơ gŏ sang kâo mđĭ kyar klei hdĭp mda. Ară anei gŏ sang kâo tlaih ƀun. Hmei hmăn hmưi bruă Đảng čar Dak Lak wưng kơ anăp lŏ dơ̆ng đru kơ dŭm hdră bi hrŏ ƀun čiăng kơ mnuih ƀuôn sang mâo klei găl tlaih ƀun, bi hơĭt klei hdĭp.

Ti ƀuôn Čuôr, ƀuôn hgŭm Ea Mdroh, lu mnuih ƀuôn sang jing mnuih Êđê, Y Săk Kbuôr, khua ƀuôn brei thâo, kyua mâo klei uêñ mĭn mơ̆ng Đảng leh anăn knŭk kna, kdrăp pui kmlă, êa doh, êlan klông, sang hră leh anăn anôk mdrao mgŭn duh bi liê hrăm mbĭt. Mơ̆ng dŭm hdră bi hrŏ ƀun, êbeh 120 gŏ sang dưi đru sang dôk, ana mjeh, mjeh mnơ̆ng rông mđĭ kyar klei hdĭp mda. Ară anei hlăm ƀuôn adôk 40 gŏ sang ƀun, hlăm brô 12%. Y Săk brei thâo:

“Hmei hmăng hmưi čar lŏ dơ̆ng uêñ mĭn duh bi liê ko dŭm gŏ sang ana mjeh, mjeh mnơ̆ng rông čiăng kơ mnuih ƀuôn sang mâo klei găl tlaih ƀun.”

Leh bi mŭt hŏng Phú Yên, čar Dak Lak ară anei mâo 3,34 êklăk čô, hlăm anan mâo êbeh 1/4 jing mnuih djuê ƀiă. Mduôn ƀuôn Y Jiê Niê, ti ƀuôn hgŭm Ea Mdroh brei thâo, hdră êlan djuê ana hlăm wưng păn bruă êgao mâo čar Dak Lak ngă tŭ dưn. Ƀuôn sang ƀrư̆ mlih mrâo. Ktuê dlăng klei kƀĭn kluôm bruă Đảng čar, mduôn Y Jiê hmăng hmưi:

“Mnuih ƀuôn sang čiăng anôk bruă Đảng ruah phung mâo klei thâo klei jak gĭt gai mnuih ƀuôn sang, ba bruă duh mkra mdrŏng ktang hĭn, klei hdĭp mnuih ƀuôn sang trei mđao hĭn. Mnuih ƀuôn sang hlăm čar dưi mâo klei đru mkra thiăm êlan klông, knơ̆ng kdơ̆ng êa, sang hră mơar čiăng kơ anak čô dưi hriăm hră leh anăn mâo bruă mă.”

Wưng thŭn 2020 – 2025, čar Dak Lak ngă hrăm mbĭt dŭm hdră êlan, hdră bi hrŏ ƀun krĭng mnuih djuê ƀiă hŏng ênoh prăk êbeh 4.220 êklai prăk. 1.866 gŏ sang dưi đru rŭ mdơ̆ng sang dôk, 5.228 gŏ sang dưi đru ko hdră duh ƀơ̆ng, hnơ̆ng gŏ sang ƀun hrŏ hlăm grăp thŭn leh anăn truh knhal jih thŭn 2025 knŏng adôk êbeh 10%.  th

Võ Trần Quang,  K’iăng khua êpul bruă hâo hưn leh anăn čung ba mnuih ƀuôn sang čar Dak Lak brei thâo, hdră mtrŭn klei kƀĭn kluôm wưng thŭn 2025 – 2030 mdưm lu mta kñăm kơ mđĭ kyar bruă duh mkra, ala ƀuôn, mbĭt anăn lŏ dơ̆ng dŭm hdră bi hrŏ ƀun, boh nik ti krĭng mnuih djuê ƀiă.

“Bruă Đảng čar ăt bi klă lu bruă klam knăm kơ duh bi liê leh anăn ngă dŭm hdră êlan djuê ana hlăm wưng anei ti alŭ wăl. Hlăm anăn gĭr bi hrŏ 2% hnơ̆ng gŏ sang ƀun kluôm čar leh anăn bi hrŏ 3% kơ dlông ti krĭng mnuih djuê ƀiă.

Mnuih ƀuôn sang dŭm djuê ana čar Dak Lak đăo knang, hmăng hmưi mơ̆ng klei kƀĭn kluôm bruă Đảng čar tal 1 wưng thŭn 2025 – 2030, čar srăng mâo dŭm klei kdlưn hĭn, klei hdĭp mnuih ƀuôn sang srăng lŏ mlih ktang hĭn./.