Hruê kăm êgao, Knơ̆ng bruă kreh knhâo leh anăn mrâo mrang čar Dak Lak bi mguôp hŏng Knơ̆ng bruă kreh knhâo mrâo mrang čar phú yên leh anăn Dăng kông dua čar mkŏ mjing klei bi hriăm yua kdrăp mbĭt kơ knuă druh, phung mă bruă ƀuôn hgŭm ti Dak Lak leh anăn Phú Yên. Hdră mtô kñăm kơ bruă yua 2 kdrăp, mâo: Kdrăp hâo hưn mgaih msir hră mơr knŭk kna čar Dak Lak leh anăn kdrăp kriê dlăng hră mơar leh anăn gĭt gai:

Nguyễn Văn Thản, Khua knơ̆ng bruă Dăng kông Dak Lak, anôk bruă mâo bruă sang čư̆ êa čar Dak Lak jao ba yua dŭm kdrăp hưn mthâo mrâo mrang đru kơ klei mŭt mbĭt dua čar Dak Lak leh anăn Phú Yên, êbeh 1000 anôk bi kƀĭn ti 102 ƀuôn hgŭm mbĭt hŏng dŭm êbâo čô knuă druh, phung mă bruă mơ̆ng 2 čar nao hriăm. Anei srăng jing êpul kmeh gơ̆ng ngă bruă tŭ mă leh anăn ngă hră mơar knŭk kna mơ̆ng čar Dak Lak mrâo.

 “Dŭm êpul knuă druh mơ̆ng 5 -7 čô dôk ti adŭ mă bruă dưi nao hgŭm mtam. Mbĭt anăn mkŏ mjing mtam ti dŭm anôk bi kƀĭn mơ̆ng dŭm ƀuôn hgŭm mrâo mkŏ mjing, mkŏ mjing klei găl kơ knuă druh, phung mă bruă nao hgŭm. Hmei djă kngan ktrâo bruă, mtô kơ phung knuă druh, phung mă bruă ti 34 ƀuôn hgŭm mrâo mơ̆ng Phú Yên, brei diñu găl ênưih hĭn êjai tuôm hlăm boh sĭt, amâo mâo brei diñu bi kngar êjai mă hră mơar mơ̆ng mnuih ƀuôn sang.”

Êlâo kơnăn, bruă Đảng čar Dak Lak ba mdah leh phung khua gĭt gai kmeh gơ̆ng ti dŭm ƀuôn hgŭm mrâo. Čar ăt mkŏ mjing 6 êpul ngă bruă mtô lač, ktuê dlăng leh anăn gĭt gai klei kbĭn kluôm bruă Đảng wưng thŭn 2025 – 2030 ti dŭm anôk bruă mrâo.

Hlăm klei kƀĭn hyuă kjăp bruă Đảng nah gŭ, bruă sang čư̆ êa leh anăn dŭm êpul bruă kđi čar – yang ƀuôn ti ƀuôn hgŭm mrâo, Nguyễn Tuấn Hà, k’iăng khua bruă sang čư̆ êa čar Dak Lak mnă klă:

“Phung khua bruă sang čư̆ êa kdriêk mâo leh klei hriăm, ƀiădah klei hriăm anăn drei amâo mâo dưi yua 100% êjai ngă khua bruă sang čư̆ êa ƀuôn hgŭm mrâo, ñu mdê hĭn, êlâo dih bha gưl knŏng ƀiă, ară anei 1 êbâo bruă klam srăng mlih hlăm klei mĭn. Diih ti dŭm anôk bruă mkăn leh anăn ngă khua ƀuôn hgŭm srăng mđing kơ klei anei, ƀiădah drei ăt ngă ngơi mơh hlăm sa mta srăng dleh dlan bruă klei drei bi klă leh anăn đua klam.”

Hluê si hdră kčah, hlăm dua hruê 25 leh anăn 26/6, anôk bruă knŭk kna ƀuôn hgŭm mrâo ti Dak Lak srăng lông ngă. Êlâo kơnăn, dŭm alŭ wăl mprăp leh mnơ̆ng yua, kdrăp yua, adŭ bruă điện tử leh anăn hdră êlan drông mnuih ƀuôn sang, mgaih msir hră kčŭt hưn.

Nguyễn Đình Trung, Khua bruă Đảng čar Dak Lak mñă ktang: gưl lông ngă tal anei čiăng bi klă kluôm dhuôm ai dưi mkŏ mjing, gĭt gai leh anăn mgaih msir boh klei sĭt mơ̆ng êpul phung mă bruă mrâo. Hluê anăn, hmao ƀuh dŭm klei dleh dlan, kpăk gun čiăng mâo hdră êlan mgaih msir êjai klă klơ̆ng ngă bruă.

 “Drei lač lông ngă, ƀiădah mta phŭn jing sĭt. Anei jing bruă mprăp čiăng kơ truh hruê 1/7 drei ngă sĭt amâo lŏ mâo klei bi kngăr. Leh anăn bruă knuă amâo čang guôn hlei pô ôh, tơdah phung khua gĭt gai amâo mâo ngă ti nah gŭ srăng guôn bruă leh anăn klei ngă bruă êmưt. Kyuanăn drei tuôm mă bruă leh srăng čŏng pô leh anăn lông ngă pô leh anăn khua ƀuôn hgŭm mrâo srăng đua klam kơ klei lông ngă mơ̆ng bruă kđi čar ti nah gŭ anăn.”