Bruă mprăp kơ Klei bi kƀĭn bruă đảng čar Dak Lak tal 1, wưng 2025-2030 dôk mŭt hlăm wưng mjêč. Dŭm bruă ngă hâo hưn  mtô mblang dôk dưi pŏk ngă hrăm mbĭt, lu jơr lu hdră, mjing ai êwa jăk mơak hlăm phung knuă druh, đảng viên leh anăn mnuih ƀuôn sang.

Mĭn tĭng, Klei bi kƀĭn srăng mkŏ mjing hlăm knhal jih mlan 9 anei. Anei jing klei bi kƀĭn kđi čar yuôm bhăn kñăm ksiêm wĭt bruă knuă wưng êgao, kčah hdră kñăm đĭ kyar 5 thŭn kơ anăp, mđing kơ klei bi kƀĭn phung bi ala kluôm ala tal XIV mơ̆ng Đảng. Truh ară anei, 106 bruă đảng gưl dlông hlăm čar bi leh Klei bi kƀĭn. Čiăng hâo hưn djŏ klă kơ Klei bi kƀĭn, Knơ̆ng bruă dhar kreh, mjuăt asei mlei leh anăn hiu čhưn ênguê bi hgŭm dŭm dhar bruă srăng mkŏ mjing hưn hŏng phung čih klei mrâo êlâo leh anăn  êdei kơ klei bi kƀĭn.