Mơ̆ng hruê 29/9 – 1/10, ti Ƀuôn Ama Thuôt, Bruă Đảng čar Dak Lak mkŏ mjing klei kƀĭn phung bi ala gưl tal 1, wưng thŭn 2025 – 2030. Nao hlăm klei kƀĭn mâo 449 čô bi ala kơ êbeh 137.000 čô đảng viên hlăm Anôk bruă Đảng čar Dak Lak.

Klei kƀĭn kluôm wưng păn bruă anei, Dak Lak mkŏ mjing hdră mtrŭn hŏng hdră Bi mguôp – êngiê – hdră bhiăn – kdlưn hĭn – đĭ kyar, mdưm mta kñăm mđĭ kyar bruă duh mkra kah knar 10,5% sa thŭn, hnư hrui wĭt kah knar grăp čô mâo 153 êklăk prăk hlăm thŭn 2030, hnơ̆ng gŏ sang ƀun krĭng mnuih djuê ƀiă hrŏ hlăm brô 3% hlăm sa thŭn, bruă mkŏ mjing Đảng bi mŭt mơ̆ng 3-4% đảng viên hlăm sa thŭn, grăp thŭn mâo êbeh 90% êpul bruă Đảng, đảng viên bi leh jăk bruă kam dưi jao…

Êngao kơnăn bruă ksiêm wĭt wưng păn bruă êgao (2020 – 2025), ba mdah dŭm hdră tă, bruă klam, hdră êlan leh anăn hdră mtrŭn kơ wưng thŭn 2025 – 2030, Klei kƀĭn kluôm ba mdah dŭm klei bi klă mơ̆ng phŭn bruă kđi čar kơ mnuih mă bruă hlăm Êpul khua bruă Đảng čar wưng thŭn 2025 – 2030. Hlăm klei kƀĭn mkăp Klei kƀĭn kluôm bruă Đảng čar Dak Lak mkŏ mjing tlam mbruê, Klei kƀĭn bi tŭ ư ruah êpul khua gĭt gai mâo 12 čô leh anăn 3 čô hlăm êpul čih hră.