Găn 120 thŭn mkŏ mjing leh anăn đĭ kyar, Dak Lak ară anei mâo ênhă, mnuih ƀuôn sang hlăm êpul dŭm čar, ƀuôn prŏng dôk mrô sa kluôm ala; bruă duh mkra đĭ kyar jăk, mđĭ lar hnơ̆ng đĭ kyar kah knar mâo 8%/thŭn hlăm bŏ 20 thŭn hŏng anei. Boh nik, Dak Lak lŏ jing anôk bi kƀĭn lu klei jăk siam kơ ênoh yuôm dhar kreh djuê ana, klei bhiăn hdĭp mda mơ̆ng 49 djuê ana hdĭp mda. Nao leh anăn blŭ hrăm hơêc hmưi kơ bruă Đảng, bruă sang čư̆ êa leh anăn mnuih ƀuôn sang dŭm djuê ana čar Dak Lak, K’iăng Khua knŭk kna Nguyễn Hòa Bình mtă kơ čar Dak Lak brei iêô mkrum ai ktang, ba yua tŭ dưn klei găl, klei mâo đĭ kyar, mđĭ ktang boh kdrŭt đĭ kyar; mlih mrâo gru hmô bruă duh mkra, boh phŭn jing mđĭ kyar dŭm mta mnơ̆ng dhơ̆ng lŏ hma, dliê kmrơ̆ng mâo klei găl, hnơ̆ng prŏng, hnơ̆ng jăk, ba čhĭ kơ ala tač êngao lu; mđĭ bruă lŏ hma mkra mjing lŏ hma, dliê kmrơ̆ng, kan hdang leh anăn mkra mjing êa pui êwa čuh doh; mkŏ mjing bruă kđi čar doh mngač, kjăp ktang, kpă ênô, ngă bruă, kyua mnuih ƀuôn sang; mđĭ kyar bruă duh mkra- ala ƀuôn, răng mgang wăl hdĭp mda, rơ̆ng klei hdĭp mda ala ƀuôn; rơ̆ng êđăp ênang ala ƀuôn.

Ti knăm anei, bi ala Khua gĭt gai Phŭn bruă dhar kreh, mjuăt ktang asei mlei leh anăn Hiu čhưn ênguê hưn mdah bi mklă leh anăn mđup brei klei tŭ yap mnơ̆ng yuôm bhăn ala čar “Kdrăp ktĭr boh tâo Drai Dua” kơ čar Dak Lak. Êngao anăn, Anôk bruă ksiêm dlăng klei kdlưn hĭn ala čar ăt mđup brei 3 klei kdlưn hĭn ala čar kơ Dak Lak mâo: Dak Lak jing čar mâo ênhă leh anăn hnơ̆ng kphê prŏng hĭn Việt Nam; Ênao Lăk, kdriêk Lăk, čar Dak Lak jing ênao êa čŏng mâo mâo ênhă prŏng hĭn ti Lăn Dap Kngư- Việt Nam; Đang dliê knŭk kna mkuôm York Đon, čar Dak Lak mâo ênhă dliê luh hla hlăm yan không prŏng hĭn Việt Nam./.