Hruê 22/11/1904, Bruă sang čư̆ êa Indochin ba mdah hdră mtrŭn bi ktlah čar Dak Lak jing sa hlăm 20 čar, ƀuôn prŏng hlăm ênuk Prăng. Dak Lak ară nei mâo ênhă, mnuih ƀuôn sang hlăm êpul dŭm čar, ƀuôn prŏng ba anăp hlăm lăn čar, mbĭt anăn jing anôk mkŏ êlan klông yuôm bhăn mơ̆ng Lăn Dap Kngư, mâo klei găl čiăng bi mguôp, mkŏ wăl đĭ kyar, mkŏ mjing boh kdrŭt mtrŭt mđĭ klei bi mguôp bruă duh mkra mnia mblei, dhar kreh, yang ƀuôn hŏng dŭm alŭ wăl hlăm krĭng Lăn Dap Kngư, krĭng kwar krah leh anăn dŭm anôk bruă duh mkra prŏng mơ̆ng lăn čar.

Nao hgŭm leh anăn blŭ hrăm hlăm knăm, k’iăng Khua knŭk kna Nguyễn Hòa Bình mñă klă bruă klam yuôm bhăn mơ̆ng čar Dak Lak hŏng alŭ wăl leh anăn ala čar dưi bi klă hŏng lu hdră êlan mơ̆ng gưl dlông. Čar Dak Lak čiăng kñăm mlih mrâo klei bi hmô bruă duh mkra mâo mta kñăm hŏng đa đa kmeh gơ̆ng msĕ si: Mđĭ kyar dŭm mta mnơ̆ng dhơ̆ng bruă lŏ hma, mnơ̆ng hlăm dliê, hnơ̆ng prŏng, hnơ̆ng tŭ jăk, mnia mblei lu, mtrŭt mđĭ bruă lŏ hma, mkra mjing mnơ̆ng hlăm dliê, rông kan hdang leh anăn ba yua pui kmlă doh. Kñăm kơ bruă kriê pioh, bi lar knhuah gru dhar kreh djuê ana mơ̆ng mnuih djuê ƀiă nao mbĭt hŏng mđĭ kyar bruă hiu čhưn ênguê yang ƀuôn, mtrŭt mđĭ klei mkŏ krĭng, mjĕ mjuk, bi mguôp plah wah dŭm alŭ wăl, rơ̆ng kơ klei êđăp ênang leh anăn bruă hŏng tač êngao.