Hlăm anôk rŭ mdŏng êlan mlir să mkŏ Ea Wer leh anăn Ea Ñuôl (čar Dak Lak), mnuih mă bruă dôk mkra gơ̆ng êlan, dơr gơ̆ng tiu, kač kdriêl êlan… čiăng bi leh dŭm kdrêč knhal tuč, hnưm ba ktuê êlan čiăng ba yua. Trần Anh Dương, Khua Knơ̆ng bruă êlan kban Dương Hiền (să Ea Nuôl, čar Dak Lak) brei thâo, hdră bruă mâo boh dlông 3,9 km, ênoh bi liê 18,5 êklai prăk, kyua tlâo pô rŭ mdơ̆ng hlue ngă, wưng rŭ mdơ̆ng mơ̆ng 2/2024 truh 9/2025. Ară anei bruă rŭ mdơ̆ng kyua anôk bruă duh mkra klam bruă bi leh 95% hnơ̆ng. Khădah snăn, bruă bi liê kơ anôk bruă duh mkra adôk ƀiă, hlăk êjai hnơ̆ng rŭ mdơ̆ng ăt brei  rơ̆ng. Dương brei thâo:

Hdră bruă mlir să anei ngă mơ̆ng hlăk mlan 2 thŭn 2024 truh ară anei, ƀiădah ară anei mrâo bi liê 2,5 êklai prăk hlăm ênoh rŭ mdơ̆ng 8,5 êklai prăk. Ară anei hdră bruă giăm leh, knŏng adôk dŭm anôk bruă điêt msĕ si gơ̆ng êlan, dŭm kdrêč đơ điêt… Hdră bruă leh ƀiădah bi liê prăk ka năng ôh, hmei hiu čan čiăng rŭ mdơ̆ng, sa mlan dơ̆ng srăng bi siñê jih klei kuôl kă ƀiădah ka tĭng tla snăn dleh dlan snăk.”

 Hlăm hdră kčah bi liê knŭk kna thŭn 2025, kdriêk Ƀuôn Đon (hđăp) mâo čar Dak Lak mbha 106 êklai prăk čiăng tĭng tla nư kơ dŭm hdră bruă jao mơ̆ng thŭn êlâo leh anăn pŏk ngă mrâo dŭm hdră bruă êlan klông, mdơ̆ng anôk bruă knŭk kna, anôk bruă sang hră, anôk bruă mdrao mgŭn hlăm thŭn anei. Cao Ngọc Duy – Khua Anôk bruă kriê dlăng hdră bruă kdriêk Ƀuôn Đon (hđăp) brei thâo, truh wưng anei, anôk bruă mrâo bi liê 40 êklai prăk, mâo 39% hdră kčah. Duy brei thâo thiăm, hnơ̆ng bi liê prăk knŭk kna êmưt mơ̆ng akŏ thŭn leh anăn mơ̆ng hruê 1-7 truh ară anei mjưh mtam.

“Hlăm hdră bi mŭt mơ̆ng hruê 1/7, prăk bi liê jao kơ Knơ̆ng bruă ngăn prăk kriê dlăng. Khădah snăn, truh wưng anei ka mbha ôh kơ pô bi liê, kyua anăn bruă bi liê mơ̆ng hruê bi mŭt truh ară anei, phung rŭ mdơ̆ng msĕ si amâo dưi tĭng tla ôh. Wăt leh hdră kčah prăk bi liê dưi dăp, ƀiădah amâo mâo klei bi mklă dưi jao kơ pô bi liê ôh snăn hmei ăt kăn dưi bi liê rei. Êngao anăn, kyua bi mŭt dua gưl, mnuih mă bruă dua gưl mơ̆ng Anôk bruă ka dưi bi leh, mrô kđăm ka mâo, ngă truh kơ bruă bi liê truh wưng anei ƀiă hĭn mkă hŏng dŭm thŭn êlâo.”

Trương Công Thái, K’iăng Khua Knơ̆ng bruă sang čư̆ êa čar Dak Lak, klei hâo hưn leh čar bi mŭt leh anăn lui gưl kdriêk mơ̆ng hruê 1/7, jih jang dŭm Anôk bruă kriê dlăng hdră bruă gưl kdriêk jao kơ 3 Anôk bruă kriê dlăng hdră bruă gưl čar leh anăn ară anei lŏ dăp jing dŭm anôk bruă krĭng wăl. Hdră anei ngă mâo wăt bruă bi mlih mrô, bi mlih kơ mnuih mă bruă, mbĭt anăn lŏ mkŏ mjing anăn, hmăi kơ hnơ̆ng bi liê prăk kơ bruă knŭk kna kơ hdră bruă rŭ mdơ̆ng klă klơ̆ng. Trương Công Thái brei thâo, ti anăp klei anăn, Knơ̆ng bruă sang čư̆ êa čar gĭt gai leh jih hnơ̆ng bruă bi liê êpul bruă, mđĭ pral hră mơar mkăp mlih mrô leh anăn pŏk ngă mbha gưl klă mngač hlăm bi liê prăk knŭk kna:

 “Truh wưng anei klă klơ̆ng dŭm anôk bruă ti kdiêk êlâo dih jao kơ gưl čar snăn bi leh mlih mrô kđăm, mkra anăn tài khoản leh anăn bi leh klei mnuih mă bruă. Snăn, knhal jih mlan 9 anei srăng mđĭ pral hnơ̆ng tla kơ ênoh prăk ka bi leh ƀiădah mrâo êgao êmưt. Mbĭt anăn hmei ăt mtă kơ phung bi liê, phung rŭ mdơ̆ng mjêč ngă hră mơar tĭng tla hnơ̆ng rŭ mdơ̆ng êlâo anăn čiăng rơ̆ng bruă bi liê prăk leh anăn đru kơ phung rŭ mdơ̆ng mâo prăk lŏ mă bruă.”

Êngao kơ  bruă kƀah mrô kđăm truh kơ klei êmưt bi liê prăk, Dak Lak ăt mđĭ ktang bruă mtô bi hriăm - mbha bruă plah wah dŭm anôk bruă,alŭ wăl. Hlue si Huỳnh Gia Hoàng, K’iăng Khua Knơ̆ng bruă ngăn prăk čar Dak Lak, tơdah klă bruă klam mơ̆ng grăp anôk bruă, snăn jih 2 klei gun kpăk prŏng kơ klei bi liê prăk leh anăn ruh mgaih anôk ala ti čar, dưi msir mgaih klă klơ̆ng:

“Drei yap jing phung knuă druh dŭm alŭ wăl mâo klei mtŭk mtŭl. Kyua anăn dŭm knơ̆ng, dhar bruă pŏk leh adŭ mtô mjuăt čiăng mbha klă bruă klam plah wah dŭm tĭng leh anăn hlăm klei dưi hlei pô hlăm să amâodah čar čiăng hlue ngă. Mơ̆ng anăn, tơdah mâo hriăm mjuăt snăn ară anei diñu thâo leh bruă klam hlăm bruă ruh mgaih prăk bi liê knŭk kna leh anăn wăt kơ bruă ruh mgaih anôk ala.”

Tơdah ya klei gun kpăk kơ êpul bruă, phung mă bruă, hră mơar leh anăn bruă klam djăp mta dưi msir, ênoh prăk bi liê knŭk kna srăng dưi bi leh, mjing boh kdrŭt kơ dŭm hdră bruă bi leh djŏ hdră. Anei ăt jing knhuang yuôm bhăn čiăng kơ Đăk Lăk mđĭ kyar anôk bruă nah gŭ, đru mđĭ kyar bruă duh mkra-ala ƀuôn kjăp hlăm boh klei leh bi mŭt.