Tui si klei hâo mdah ti anôk bi kƀĭn knơ̆ng bruă sang čư̆ êa čar Daklak, mkŏ mjing leh hrue mbrue (8-9), truh hrue 28/8, kluôm čar mrâo bi liê leh êbeh 3.939 êklai prăk kơ bruă duh bi liê kluôm thŭn 2025, djăp 1/3 hdră kčah. Dŭm bruă prŏng mâo bruă mkra êlan dơ̆ng pral Khánh Hòa – Buôn Ma Thuột, êlan ktuê hang ksĭ Phú Yên, alŭ wăl duh mkra Nam Phú Yên, alŭ wăl duh mkra Hòa Tâm, kdrŭn ksĭ Bãi Gốc… dôk tuôm hŏng klei gun kpăk kơ hră mơar, lehanăn bruă ruh mgaih anôk ala. Êjai anăn, mâo lu bruă êngao kơ ênoh bi liê mơ̆ng knŭk kna msĕ si bruă duh mkra mnia mblei, dŭm alŭ wăl hiu čhưn ênguê lăn mnga êa mơak, alŭ wăl duh mkra kdrăp mrâo ăt êmưt hlue ngă.

Ti anăp klei msĕ snăn, Tạ Anh Tuấn, Khua knơ̆ng bruă sang čư̆ êa čar Daklak mtă kơ dŭm knơ̆ng dhar bruă, alŭ wăl mghaih msir bi pral bruă duh bi liê kluôm, yap anei jing bruă phŭn pioh kơ klei mđĭ kyar. Dŭm mta klei dleh dlan kơ lăn ala, kơ bruă čiu hnô, mghaih msir anôk ala, bruă rŭ mkra brei mghaih msir bi leh hlăm mlan. Boh nik, Khua knơ̆ng bruă sang čư̆ êa čar Daklak mtă amâo mâo lui ôh kơ phung mă bruă awăt êdu mă bruă, ñĕ đuĕ mơ̆ng klei êmưt hlăm bruă knuă, ngă lui liê hlăm klei duh bi liê kluôm, Knơ̆ng bruă sang čư̆ êa čar Daklak gĭt gai leh bruă ksiêm, bi mlih hdră duh bi liê kơ thŭn  2025, ktuh êyuh prăk kăk kơ dŭm bruă phŭn, mâo klei dưi bi liê ngăn prăk kjăp, mprăp kơ jih jang bruă kơ wưng thŭn 2026 – 2030. Mjing klei bi mlih kjăp hlăm dŭm bruă prŏng, đru hlăm klei mđĭ kyar êbeh 10% hlăm wưng tinăp./.