Hlăm dŭm kdrêč êlan pral Vĩnh Hảo – Phan Thiết; êlan dơ̆ng prŏng mrô 27, 28B, kčŭn čư̆ Prenn… mâo leh lu anôk bi knăl kơ klei anăp klưh jhat, ngă hmăi amâo mâo êđăp ênang kơ klei găn êrô kơ êdeh êdâo lehanăn mnuih, mbĭt hŏng klei klưh hroh êlan klông, lŏ ngă klei gun kpăk hlăm lu kdrêč êlan hlăm čar msĕ si êlan Đạo Nghĩa - Quảng Khê; êlan DT715 găn ƀuôn hgŭm Hàm Thuận… bruă sang čư̆ êa dŭm ƀuôn hgŭm, lehanăn dŭm dhar bruă djŏ tuôm čar Lâm Đồng mâo tiŏ nao leh êpul êya lehanăn êdeh êdâo mghaih msir dŭm anôk klưh hroh, lŏ kuai êlan êa đoh. Pơ̆ng mdhă knăl hưn anôk huĭ hyưt kơ mnuih ƀuôn sang thâo.

Ti anăp boh klei dleh dưi ksiêm dlăng anei mơ̆ng yan adiê, knơ̆ng bruă sang čư̆ êa čar Lâm Đồng mâo leh hră mơar gĭt gai, dŭm êpul êya bruă hlăm mnuih ƀuôn sang dŭm bruă sang čư̆ êa, ƀuôn hgŭm lehanăn dŭm alŭ wăl knơ̆ng čŏng mâo hdră êlan mdrơ̆ng hŏng klei amâo mâo jăkmơ̆ng adiê hjan prŏng klei êa lêč, klưh hroh lăn. Čar Lâm Đồng ară anei mâo 8 bĭt êlan dơ̆ng prŏng hŏng boh taih jih jang giăm 1.400km lehanăn 1.300km êlan dơ̆ng gưl čar. Kyua lu kdrêč êlan ka lŏ mkra wĭt ôh, lehanăn dôk hlăm čư̆ čhiăng, snăn ênưih tuôm hŏng klei klưh jhat êlan, ngă luič klei êđăp ênang prŏng êdi hlăm yan hjan, angĭ êbŭ./.