Anei jing thŭn tal êlâo bruă sang hră mơar čhuang hlăm gưl mrâo leh bi mŭt čar daklak mbĭt hŏng čar Phú Yên. Hŏng akŏ: “Klei bhiăn kjăp– mbruă – Đĭ kyar pral”. Leh klei bi mŭt mbĭt, bruă sang hră maơr čar Daklak pŏk mlar êbeh 1.370 boh sang hră, mơ̆ng sang hră hđeh điêt truh kơ gưl 3, lehanăn sang hră mjuăt bi hriăm nanao. Kluôm čar ară anei mâo leh êbeh 700.000 čô hđeh hriăm hră mbĭt hŏng 38.400 čô knuă druh kiă kriê, nai mtô djăp kơ bruă pioh mjuăt bi hriăm. Mta kñăm hlăm thŭn hriăm anei, čar Daklak ktưn bi djăp hŏng ênoh čuăn ala čar truh 55%, hnơ̆ng ênoh hđeh dưi hlăm klei bi lông jih gưl 3 êbeh 98% lehanăn lŏ bi hrŏ êwang bi kpleh hnơ̆ng mjuăt bi hriăm plah wah krĭng mâo klei găl hŏng krĭng dôk hlăm klei dleh dlan kơ bruă sang hră mơar./.

Ti Gia Lai, êbeh 760.300 čô hđeh ti 1.200 boh sang hră nao leh ti Knăm mphŭn pŏk thŭn hriăm mrâo 2025-2026. Yan adiê êđăp, amâo mâo hjan mjing leh ai êwa jăk kơ knăm mơak jih jang mnuih atăt hđeh nao sang hră. Thŭn hriăm anei, kluôm čar Gia Lai mâo 760.300 čô hđeh hlăm 23.017 adŭ hriăm hŏng 37.347 čô nai mtô, knuă druh mă bruă. Khă snăn, anôk bruă ăt dôk kƀah êbeh 3.500 čô mkă hŏng ênoh čuăn, hlăk anôk bruă nah gŭ ti lu anôk, boh nik krĭng knông lăn jhat rai, dôk kƀah.

Ti anăp, anôk bruă sang đru kčĕ hŏng Anôk bruă sang čư̆ êa čar Gia Lai lŏ ruah 1.428 čô nai, mbĭt anăn mkŏ dăp wĭt djŏ hŏng klei čiăng mtô bi hriăm, boh nik hŏng dŭm klei hriăm mrâo hluê Hdră mtô bi hriăm thŭn 2018. Anei jing knhuang nao yuôm bhăn kñăm rơ̆ng boh tŭ hdră mtô bi hriăm hlăm thŭn hriăm mrâo./.