Alŭ Trà Cong, ƀuôn hgŭm An Hòa (kdriêk An Lão hđăp) dôk ti gŭ jơ̆ng čư̆ Gai. Dlông čŏng čư leh anăn ping čư̆, lu boh tâo prŏng bi dăp, arưp aram srăng klưh hroh êjai hjan prŏng. Nguyễn Thị Hoa, sa čô hlăm alŭ Trà Cong brei thâo, ñu leh anăn lu mnuih ƀeh leh lu blư̆ klei klưh hroh, boh tâo hŏng lăn mơ̆ng čŏng čư̆ klưh, ngă kơ êlan klông jhat rai, klah hjăn.

“Tơdah klưh hroh sa klŏ dưn srăng ktŭng ba lu klŏ boh tâo mkăn. Mnuih ƀuôn sang amâo thâo bĭt ti êlan đuê̆. Čư̆ dơ̆ng boh tâo klŭng truh kơ êlan prŏng, ka lač ôh hlăm ƀuôn.”

 Phạm Thị Lệ Thùy – K’iăng khua bruă sang čư̆ êa ƀuôn hgŭm Hoà An brei thâo, Trà Cong jing sa hlăm 6 alŭ mâo klei arưp klưh hroh lu hĭn, mâo dŭm anôk arưp aram hĭn. Alŭ wăl mprăp leh hdră êlan mbĕ mnuih ƀuôn sang nao ti anôk êđăp ênang êjai mâo klei hưn brei răng klưh hroh:

“Hlăm boh klei msĕ si hnơ̆ng hưn brei răng klei truh yan adiê, ƀuôn hgŭm srăng ngă grăp hdră êlan dưi bi klă čiăng rơ̆ng hlăm grăp boh klei srăng dưi mbĕ mđuĕ, nao ti anôk êđăp ênang kơ mnuih ƀuôn sang. Anăn jing dŭm sang hră, anôk ti alŭ Xuân Phong Nam, alŭ Vạn Long, alŭ Vạn Khánh”.

Nao mbĭt hŏng klei arưp aram klưh hroh, đa đa alŭ wăl ti Ngŏ Gia Lai mâo klei arưp aram mâo klei êa lip lêč. Msĕ si jing alŭ wăl hnoh êa Ói, ti alŭ 1, ƀuôn hgŭm An Toàn. Hlăm yan hjan hlĭm, yan angĭn êbŭ, êa êtăng, mâo đa đa klei hmăi kơ anak mnuih. Čiăng bi hrŏ klei truh tơl, bruă sang čư̆ êa alŭ wăl kpơ̆ng mdhă hưn brei răng, dăp mnuih ngă bruă, răng mgang klei êđăp ênang, amâo brei mnuih ƀuôn sang găn êa êjai êa đĭ. Đinh Văn Bằng – Khua alŭ 1, ƀuôn hgŭm An Toàn brei thâo.

“Ƀuôn hgŭm mâo êpul kahan ƀuôn ngă bruă, ti alŭ mâo êpul răng mgang klei êđăp ênang leh anăn phung êdam êra nao gak răng ti dŭm hnoh krông. Hâo hưn kơ mnuih ƀuôn sang  ngă djŏ hdră bi mdrơ̆ng hŏng klei angĭn êbŭ êa lêč, amâo mâo brei găn êa êjai êa đĭ.”

Nguyễn Văn Vân – K’iăng khua bruă sang čư̆ êa ƀuôn hgŭm An Toàn brei thâo, kyua kreh bi mdrơ̆ng hŏng klei truh yan adiê, să mâo leh dŭm êpul, kdrăp yua bi mdrơ̆ng, đru dŏng êjai mâo boh klei mjêč. Êngao kơnăn, gưl bruă nah gŭ, bruă sang čư̆ êa ƀuôn hgŭm An Toàn mkŏ mjing hdră êlan mbĕ đuĕ mnuih ƀuôn sang êjai mâo klei hưn brei răng klei truh yan adiê.

“Ƀuôn hgŭm mkŏ mjing leh hdră êlan čŏng pô, êjai mâo klei truh yan adiê brei êpul ngă anôk gak răng. Êjai mâo klei găl srăng ƀuôr mnuôr êa čiăng kơ mnuih ƀuôn sang găn êrô. Êjai mâo lăn boh tâo klưh srăng ba êdeh êdâo, hmei srăng mưn đa đa knơ̆ng bruă hriê kčao, ƀuôr mnuôr čiăng đru kơ mnuih ƀuôn sang leh anăn răng mgang ngăn dŏ êjai găn êlan.

Klă sĭt brei ƀuh, ti Gia Lai, bruă gang mkhư̆ klei truh yan adiê dưi hluê ngă hluê si grăp krĭng. Krĭng ktuê krông Pa, krông Ayun amâodah jŭm dar ênao Ayŭn Hạ kñăm mbĕ mđuĕ mnuih ƀuôn sang mơ̆ng krĭng êa lêč, bi kjăp guê êa, ksiêm dlăng knơ̆ng êa. Alŭ wăl knông hŏng ênao êa, êa ksĭ, krông prŏng srăng hưn brei răng hnưm, rơ̆ng kơ klei êđăp ênang êlan êa leh anăn răng mgang kan hdang. Êjai anăn, ti dŭm ƀuôn hgŭm čư̆ čhiăng msĕ si An Hoà, An Toàn srăng mđing kơ dŭm anôk mâo klei arưp aram klưh hroh leh anăn mprăp kơ hdră êlan mbĕ mđuĕ mjêč. Bi mdrơ̆ng hŏng klei hjan hlĭm ti Gia Lai kyuanăn amâo djŏ knŏng jing bi mdrơ̆ng hŏng yan adiê amâo mâo jăk, ƀiădah lŏ jing kriê dlăng klei jŭ jhat ti wăl anôk, lăn ala kơ grăp krĭng./.