Êlan dơ̆ng ala čar 26, hlăm 40km mơ̆ng Ƀuôn Ama Thuôt, yan anei khăng kpăk đuôm ktang snăk. Êdeh container, êdeh mdiăng mnơ̆ng ktrŏ, êdeh kai leh anăn êdeh p’phŭt mdiăng durian, bi kniêt hlăm êlan điêt. Grăp blư̆ mâo êdeh container gai kŏ, êlan klông hlăm kdrêč êlan dơ̆ng ala čar anei khăng hĭn mơh dleh dlan. Ayŏng Đinh Quang Huy, mnuih ƀuôn sang ti să Ea Knuêč brei thâo:

 “Hŏng dŭm thŭn giăm anei, bruă găn êrô dŭ mdiăng mnơ̆ng lŏ hma, boh nik durian, đĭ ktang ngă gun kpăk hlăm êlan klông wăt hruê mlam. Kâo akâo kơ knŭk kna hnưm bi liê pŏk mlar ktuê êlan čiăng kơ mnuih ƀuôn sang găn êrô, dŭ mdiăng mnơ̆ng dhơ̆ng găl ênưih hĭn”

Ayŏng Trần Văn Định, sa čô mgăt êdeh containett hŏng êbeh 10 thŭn ngă bruă dŭ mdiăng durian ba čhĭ kơ ala tač êngao leh anăn nao dŭm čar, ƀuôn prŏng, brei thâo:

Êlâo dih, tơdah durian ka đĭ kyar ƀiă mnơ̆ng, nao mơ̆ng Krông Pač truh kơ Ƀuôn Ama Thuôt knŏng hlăm brô 25-30 mnĭt. Ƀiădah truh ară anei, hnơ̆ng durian lu, êdeh êdâo dŭ mdiăng đĭ ngă kơ boh klei gun kpăk mâo kjham, êlan hlăm brô 30 km luč truh 1-2 mmông, boh nik sui hĭn. Tơdah dua boh êdeh container nao mklăk êlan snăn ngă kniă jih kdrêč êlan êdeh mkăn, huĭ hyưt snăk. Ayŏng adei mgăt êdeh čang hmăng Knŭk kna bi liê pŏk mlar êlan čiăng kơ bruă  dŭ mdiăng mnơ̆ng dhơ̆ng găl ênưih hĭn.

Trung tá Lương Xuân Ngọc, Khua êpul kahan ksiêm êlan klông mrô 2 kahan ksiêm čar Dak Lak hâo hưn, êlâo dih, grăp hruê knŏng mâo hlăm brô 3.000–5.000 êdeh êdâo găn êrô hlăm Êlan dơ̆ng ala čar 26  kdrêč găn dŭm să ti kdriêk Krông Pač (êlâo dih) nao ti Ƀuôn Ama Thuôt. Ară anei, ênoh anei đĭ leh êbeh 10.000 êdeh êdâo/hruê, hlăm anăn mâo dŭm êtuh êdeh container leh anăn dŭm êbâo êdeh mdiăng mnơ̆ng, êdeh kai mdiăng durian. Trung tá Lương Xuân Ngọc brei thâo, klei bi kna găn êrô hlăm Êlan dơ̆ng ala čar 26 ară anei dôk jing bruă klam phŭn mơ̆ng kahan ksiêm hlăm êlan klông:

 “Hmei pral dăp nanao 3 êpul mă brăk gak răng, bi kna leh anăn ktrâo atăt hlăm êlan klông hlăm mmông mâo lu êdeh mơ̆ng 15h truh 19 mmông grăp hruê. Mbĭt anăn, mbha phung knuă  druh hlăm êpul hâo hưn, mtô mblang, pŏk ngă kơ êbeh 50  khua sang hjiê, êbeh 150 čô mgăt êdeh container leh anăn hlă brô 200 gŏ êsei mnuih ƀuôn sang mâo êdeh kai hlue ngă kjăp klei dŭ mdiăng durian êđăp ênang, rơ̆ng êlan klông găl jăk, ñĕ kơ klei đuôm kpăk.”

Êlan dơ̆ng ala čar 26 dlông 151 km, jing ktuê  êlan êlan klông phŭn mkŏ čar Dak Lak hŏng Khánh Hòa, mkŏ Êlan dơ̆ng ala čar 1A leh anăn êlan kdrŭn ksĭ dŭ mdiăng mnơ̆ng dhơ̆ng lŏ hma kơ dŭm ƀăng jang knông lăn nah Dưr. Lương Huy Hoàng – Khua Knơ̆ng bruă kriê dlăng leh anăn mkŏ mjing êlan dơ̆ng mrô 26 brei thâo, Êlan dơ̆ng ala čar anei mâo bi liê mkra mđĭ lu wưng, kyua anăn mâo boh prŏng 11 m, mâo kdrêč 9 m, đa kdrêč knŏng prŏng 6 m. Êdeh êdâo găn êrô ăt đĭ hlăk êjai anôk bruă êlan klông nah gŭ kƀah sa anăn  kyua anăn ngă klei đuôm kpăk. Hlue si Hoàng, čiăng msir bi jih boh klei anei, brei pŏk mlar kdrêč  adôk jing 11m, djăp hnơ̆ng čuăn êlan III, ƀiădah ăt ka dăp ôh prăk bi liê.

 “Hmei čih mkra leh klei akâo kơ Knơ̆ng bruă sang cư̆ êa čar Dak Lak bi liê prăk mkra mđĭ kdrêč êlan anei. Tơdah dưi mkra mđĭ, êlan srăng mkŏ jăk hŏng êlan dơ̆ng êran pral Khánh Hòa -Ƀuôn Ama Thuôt kơ anăp, găl ênưih kơ bruă ba čhĭ mnơ̆ng dhơ̆ng lŏ hma, boh nik durian. Bruă mđĭ kdrêč êlan anei čiăng hlăm brô 800 êklai prăk, ênoh prăk anei knŏng yua kơ bruă rŭ mdơ̆ng, bi djiêô êlan dưi čuăl mkă leh kyua anăn amâo lŏ mâo ôh bruă ruh mgaih anôk ala.”

 Tơdah Êlan dơ̆ng ala čar 26 kdrêč găn dŭm să Ea Knuêč, Krông Pač, Tân Tiên leh anăn Ea Phê, čar Dak Lak dưi bi liê mkra mđĭ kluôm, ktuê êlan anei srăng jing êlan phŭn mkŏ dliê hŏng êa ksĭ Ƀuôn Ama Thuôt – Khánh Hòa dơ̆ng bi leh dưi ba yua. Êlan klông dưi bi leh srăng pŏk êlan kơ bruă dŭ mdiăng, ba čhĭ mnơ̆ng dhơ̆ng lŏ hma, boh nik durian, pral hĭn, êđăp ênang hĭn leh anăn găl ênưih hĭn. Mơ̆ng ară anei, krĭng phŭn pla durian mơ̆ng Dak Lak srăng mâo thiăm klei găl čiăng nao kbưi, ba boh tŭ dưn kơ bruă duh mkra lu hĭn./.