Êpul gơ̆ng bruă ƀuôn sang čar Dak Lak kƀĭn bi trông, bi mklă hdră mgrŭn mbha, mkra mlih hdră kčah bi liê mđĭ kyar kñăm ngă Hdră kñăm ala čar; bi mklă jao phung mă bruă knŭk kna hlăm thŭn 2025; bi mlih klei kñăm yua dliê čiăng ngă dŭm hdră bruă phŭn; mâo Klei bhiăn mă bruă mơ̆ng êpul gơ̆ng bruă ƀuôn sang  čar, dŭm anôk bruă, êpul bi ala leh anăn phung bi ala êpul gơ̆ng bruă ƀuôn sang. 

Ăt hlăm klei bi kƀĭn, Êpul gơ̆ng bruă ƀuôn sang čar Dak Lak gưl X, wưng 2021 – 2026 mkŏ mjing leh klei ruah mbŏ K’iăng Khua Êpul gơ̆ng bruă ƀuôn sang čar čar. Hŏng boh tŭ ênoh hră mplĕ mâo êbeh 86,2% čô bi ala tŭ ư, Êpul gơ̆ng bruă ƀuôn sang čar Dak Lak mâo leh hdră mtrŭn bi mklă Từ Thái Giang dưi ruah ngă K’iăng Khua Êpul gơ̆ng bruă ƀuôn sang čar Dak Lak gưl X, wưng 2021 – 2026. Cao Thị Hòa An K’iăng Khua anôk bruă Đảng čar, Khua Êpul gơ̆ng bruă ƀuôn sang čar mñă klă: leh êbeh dua mlan pŏk ngă, bi mŭt dua čar, bruă sang čư̆ êa alŭ wăl dua gưl grăp knhuang dưi bi leh, ngă bruă tŭ dưn, đru ba knŭk kna giăm mnuih ƀuôn sang hĭn, hmao msir boh klei hlăm klei hdĭp.