Hlăm klei kƀĭn trông, khua gĭt gai čar Gia Lai hưn kơ hdră tă đĭ kyar. Klă klơ̆ng, ti alŭ wăl Gia Lai Ngŏ ( čar Bình Định hđăp), čar kñăm kơ bruă tuh tia mkra mjing, dhar kreh – hiu čhưn ênguê, mđĭ kyar pui kmlă doh, kdrŭn ksĭ leh anăn anôk bruă logistics.

Bi ti alŭ wăl Gia Lai yŭ (Gia Lai hđăp) srăng mđĭ kyar dŭm anôk pla mjing prŏng, ngă tŭ dưn dŭm hdră pui kmlă doh hluê si hdră čuă mkă pui kmlă VIII, mđĭ kyar anôk bruă wăl mkra ƀăng jang knông lăn Lệ Thanh, iêo jak mnơ̆ng dhơ̆ng mơ̆ng Campuchia čiăng mkra mjing, mkŏ mjing boh tŭ dưn hơĭt kjăp.

Êngao kơ klei iêo jak duh bi liê, Gia Lai ăt ksiêm dlăng, ruh mgaih klei dleh dlan kơ dŭm hdră dôk êmưt, mđĭ kơhưm klei duh bi liê. Phạm Tuấn Anh, khua bruă sang čư̆ êa čar Gia Lai brei thâo, wăl duh bi liê mnia mblei mrâo dôk dưi bi hơĭt mơ̆ng čar truh kơ nah gŭ:

Gia Lai bi hơĭt wăl duh bi liê. Hmei jao leh dŭm hnơ̆ng čuăn KPI truh kơ grăp knơ̆ng, dhar bruă leh anăn 135 êpul hgŭm. Dŭm alŭ wăl srăng knăm nao klă, mlih mrâo hdră ksiêm dlăng jing đru bruă, dlăng kơ mnuih ƀuôn sang leh anăn knơ̆ng bruă jing mta kñăm – jing phung ba yua mơ̆ng anôk bruă knŭk kna. Čar srăng ƀuah mkra phung knuă druh, phung mă bruă knŭk kna amâo mâo jăk, ngă klei dleh dlan kơ klei mđĭ kyar mbĭt mơ̆ng čar leh anăn bi kpăk êpul êya knơ̆ng bruă. Kâo hmăng hmưi dŭm knơ̆ng bruă ăt mâo hdră bruă lač sĭt, ngă sĭt leh anăn mâo boh tŭ dưn.

Nao hlăm klei kƀĭn, nai prĭn Trần Du Lịch – khua êpul gơ̆ng đru kčĕ hdră êlan ngăn prăk lăn čar lač, ai dưi mơ̆ng bruă sang čư̆ êa alŭ wăl 2 gưl mrâo jing ai iêo jak klei duh bi liê. Mơ̆ng klei anei, lu knơ̆ng bruă srăng hriê duh bi liê kơ Gia Lai:

 “Bi hrŏ jia, lui jia lăn jing yuôm bhăn, ƀiădah klei yuôm bhăn jing knơ̆ng bruă čiăng jing bruă knŭk kna mâo tur knơ̆ng mkŏ mjing, bruă sang čư̆ êa srăng jing pô đru kơ knơ̆ng bruă. Si srăng ngă, knơ̆ng bruă hriê ti Gia Lai mă bruă djŏ, amâo mâo rŭng răng srăng tuôm hŏng klei dleh dlan”.

Hlăm klei kƀĭn trông, bruă sang čư̆ êa čar Gia Lai jao leh 69 klei bi klă hdră êlan duh bi liê, hdră mơar duh bi liê leh anăn siêñ hră bi hdơr bi mguôp, hŏng ênoh 4,7 êklai USD. Hlăm ênoh anăn, mâo 27 hdră dưi jao klei bi klă duh bi liê leh anăn hră tŭ yap duh bi liê hŏng ênoh prăk hlăm brô 26.400 êklai prăk (knar hŏng wwbwh 1 êklai USD). Hlăm anăn mâo 13 hdră bruă tuh tia, 14 hdră bruă mkŏ mkra, anôk bruă tuh tia, dŭm hdră pui kmlă doh leh anăn sang êa drao.

Êngao kơnăn, 42 hdră dưi bi klă hŏng hră bi hdơr duh bi liê, hŏng ênoh prăk mĭn tĭng 93.400 êklai prăk (knar hŏng giăm 3,6 êklai USD). Anei jing ênoh mrô lu, bi êdah klei đăo knang mơ̆ng êpul êya knơ̆ng bruă hlăm hdră êlan mđĭ kyar čar, jing tur knơ̆ng yuôm bhăn čiăng mkŏ wĭt bruă duh mkra, mđĭ hnơ̆ng ngă bruă, hnơ̆ng jak leh anăn ai bi ktưn. Dŭm hdră kñăm kơ bruă pui kmlă doh, pla mjing leh anăn kan hdang, mđĭ kyar dliê bi mguôp hŏng rông êmô, rŭ mdơ̆ng anôk mkra mjing boh mnga. Nguyễn Thị Lan Hương – khua êpul gơ̆ng knơ̆ng bruă mkra mjing leh anăn ba čhĭ Việt Phúc, brei thâo:

Hmei duh bi liê kơ anôk bruă lŏ hma kdrăp mrâo mrang ti Čư̆ Sê. Anei jing hdră êlan phŭn hlăm bruă lŏ hma hŏng dŭm anôk bruă mâo klei dưi, anôk kriê pioh gen leh anăn wăl anôk yua kdrăp mrâo mrang. Hmei hmăng hmưi hdră jing anôk mkŏ dŭm kdrăp mrâo mrang, mbĭt anăn mprăp hrăm mbĭt hŏng mnuih ƀuôn sang, êpul hgŭm bruă leh anăn ƀĭng ngă lŏ hma.

Klei kƀĭn trông mtrŭt mđĭ klei duh bi liê thŭn 2025 ti Gia Lai amâo djŏ knŏng pŏk lu klei găl bi mguôp hŏng ênoh dŭm êklai USD, ƀiădah lŏ mñă klă klei gĭr mơ̆ng čar hlăm bruă mkŏ mjing wăl duh bi liê klă mngač, găl leh anăn hơĭt kjăp. Hŏng hdră tă đĭ kyar knơ̆ng bruă kơ grăp krĭng, mbĭt hŏng klei hrăm mbĭt mơ̆ng bruă sang čư̆ êa alŭ wăl dua gưl leh anăn knơ̆ng bruă, Gia Lai dôk bi klă kơhưm jing anôk lu klei găl, anôk bi kƀĭn dŭm ai dưi mđĭ kyar bruă duh mkra mtah, bruă lŏ hma kdrăp mrâo, bruă tuh tia mkra mjing leh anăn pui kmlă doh. Anei srăng jing boh kdrŭt yuôm bhăn čiăng ba Gia Lai jing anôk đĭ kyar mrâo mơ̆ng Lăn Dap Kngư hlăm wưng kơ anăp.