Êlan knhal bruă duh mkra nah Ngŏ – êlan dar Êlan dơ̆ng mrô 19, kdrêč găn ƀuôn prŏng Biển Hồ, mphŭn ngă bruă mơ̆ng thŭn 2022, hŏng ênoh prăk 1.325 êklai prăk, mâo boh taih giăm 15km, ară anei dôk bi pral klei ngă bruă, wăt kơ yan adiê amâo mâo jăk, gĭr bi leh êlâo kơ hruê 19/12 thŭn anei.

Mbĭt hŏng anăn, Gia Lai dôk mprăp kơ dua hdră ala čar kñăm: êlan dơ̆ng pral Quy Nhơn – Pleiku leh anăn êlan êdeh treng pral Dưr – Dhŭng. Čar ngă leh klei tĭng mkă, ksiêm dlăng, mprăp kơ mnơ̆ng yua leh anăn mkăp hlăm brô 11.000 êklai đru kơ klei čiu tla, ruh mgaih anôk ala, mkŏ mjing tur knơ̆ng ngă dŭm hdră prŏng, đru mkŏ krĭng leh anăn mtrŭt mđĭ klei đĭ kyar hơĭt kjăp.